Chinram lei ah Ralhrang minung (200) cu Christmas ni bak ah chap an si.

Herod Le MAH Lawng Nih Christmas Ah Mi An Thah.
======
Misualbik Hitler hmanh kha Christmas ahcun Raldoh aa ngolh bak dakaw. Judah Miphun nuai 7 leng thattu pa Hitler. MAH le Ralhrang Rallokap cu, Christmas ah, mi an thah khun. Karen cu Vanlawng in voi (7) khel te, Christmas ni bak ah an kah hna.

Zan zong ah an kah rih hna. Khuadei lai zong ah, vanlawng bakin an kah hna. Christmad Ni ah, Karen mi (38) cu an nung bakin mei an khangh hna. Save The Children (Hlanlio Merlin) riantuan tu pahnih zong an tlau. Chinram le Karenni ah Save The Children cu riantuan an ngol bak ve.

Chinram lei ah Rallokap (200) cu Christmas ni bak ah chap an si. Motor le Hriam lian pipi he, Chinmi le Krifa thah dih awk ah an hung thlah hna. Kawlram hmundang zong ah Rallokap tampi chap in thlah an si, Christmas Ni thengmang ah.

Christmas a thlum al nak le Immanuel ngai ngai cu; Ram lak ah, Tuukhal hna sin ah, zan tim ah, a tlung. Khuapi le Biak Inn ah a tlung lo. MAH Inn le Herod Inn ah cun, Christmas a tlung ve lo. Zeitikhmanh ah aa Christmas khawh ding ansi lo.

Jesuh cu Izip ah kum (12) renglo a refugee. Nang le Kei cu Kala ram le Vunrang hna sinah kan Refugees ve. Christmas laksawng hi Refugees ti awk in? Herod Christmas cu; Kum (2) tang Judah ngakchia vialte thah nawn dih kha asi.

Herod cu a thut hmun ah, a ruh a tlawngh dih i a thi ti asi. Christmat ah Mithah tu MAH zong hi an luat ve lai lo. Zoh cio ko usih, Kan Pathian cu a nung caah. Herod kut in Bawipa Khrih a khumzualtu cu Sawmpalak bu te asiko. Thawnnak thazang le Santlaihnak a ngeih lomi Sawmpalak bu te cu Khrih chanchuahtu ah thlah asi.

Christmas dindeihnak le Immanuel Pathian aa ngeihtu nang le kei khamhtu le Chanchuahtu hi; zei ah kan rel hna i, an thang kan chiat hna i, an mual kan pho zungzal mi, san an tlai lo tuk kan ti mi hna; CNA/CDF ansi te lai.

Adikmi Christmas Tuahtu CDF le Thantlang Fanau Rual. Ramlak Christmas cu Thantlang fanau le Tuukhal hna lawng nih tuah/hmang khawh mi asi. Vawleipi ah Christmas tuah hmasatbik tu cu Tuukhal hna an si. Ramlak ah, Zan khuamui lakah, Dei lai ah, tuahmi Christmas puai asi. Khuapi le Biakinn ah tuahmi Christmas asilo. Hlarem sak piaktu ah Vancungmi an si. Vanlo Gospel team le Cinrung Hlarembu an si lo.

Thantlang fanau vialte, riaklang va bang kan vai lio i Runreplo Run Inn le Biakinn a ngeih lo mi bang; Christmas hmannak Lungrawn khua le Krifabu a ngeih lomi kan hluan lio can; “Kan caah Christmas hi a thlum al khawh hnga maw” kanti lio caan ah, Ramlak um Tuukhal hna Christmas cu Kan caah a si ve ai.

Vanlo Gospel Team ai ah Vancungmi hlarem dawh; Rev. M Thawng Kam le Rev. J No Mang Thawngtha ai ah; Pathian Vancungmi Sermon, kha kan ngai hna. A dawtmi Thantlang fanua hna umnak kip ah Remnak (PEACE – Dindeihnak – Duhdimnun) leng seh tiah Vanmi Hlarem le Thawngtha cu asi.

Tlangbawi Simeon cu kum hnih a ngak hnu lawng ah a cung ah/ asin ah Christmas a tlung. Krih Bawipi he i ton kha Christmas tinak asi. Jesuh kum (2) a tlin hnu, Jerusalem Temple an kalpi lio ah, Simeon sinah Christmas a tlung. Thantlang Fanau kan caah cun, Tuzan ah, Ramlak ah, Mi khua ram ah, Christmas lawmhnak le Deihnak kan cung ah a tlung.

Thantlang fanua caah cun Tuzan le Nihin ah Christmas a tlung. Ramlak um Tuukhal hna sinah, Tuzan ah, Bethlehem ah, Mi Khamtu Immanuel a chuah cang. Cu Gospel cu Thangtlang Fanau hna kan vakvai nak hmun cio ah a tlung ve.

Herod nih Christmas a hmang ve nain Jesuh thah duh ah asi. Ramlak Christmas cu Thawngtha he asi i Khuapi chung Christmas cu Thawngchia le Thihdar asi. Rama ah Richeal cu hnemh khawh tilo in ik ik hluaimai in a tap lio can asi. MAH cu Kawlram RC Luchip Cardinal Charles Mg Bo he, Christmas a hmang nain, Kawlram pumpi Sunghno nu vialte an tap an ai hram ni tu asi lehlam.

A ruang cu Fanau tampi cu Khuachia MAH le Rallokap kut in an pulh cuahmah caah asi. Herod le MAH Christmas thluachuah cu thihnak siko hmansehlaw, Thantlang Fanau hna Christmas cu Gospel Thawngtha he hmailei kan thlawchuah relcawklo he asi. Thantlang Fanau nan zapi te cung ah Merry Xmas le Happy Xmas. Credit: Joseph R. Thang