Chinram ah cheuhra cheukhat hi Tlangbawi/rianțuantu hna lawng pe hna u sih law, inn le lo zong an ngei ve cio lai!

TLANGBAWI LE CHEUHRA CHEUKHAT
=========
Cheuhra cheukhat (tangka) maw a biapi deuh a eitu ding Tlangbawi? A fiangmi cu a eitu ding Tlangbawi kha an si. PATHIAN rianțuantu Tlangbawi an um caah cheuhra cheukhat cu an ei dingin hal lan a si (Nam 18:21,24). kum thumdan i hmuhmi cheuhra cheukhat cu Levi mi le pangeilo le nuhmei le mipem hna zong nan pek hna lai a ti (Deu 26:12-13). Bible nih cheuhra cheukhat a eitu ding fiang tein a langhter mi cu, Tlangbawi ngan le tlangbawi/Levi hna le pangeilo hna le mipem hna le nuhmei hna kha an si.

Biakam thar ahhin cheuhra cheukhat hmannak kong le hman ning kong thlennak tialnak a um hlei ti lo. Asinain, cawnpiaktu cheukhat hna nih, cheuhra cheukhat/thawhlawm cu PATHIAN ta a si caah, KHRIH raithawinak he a pehtlaimi lawngah hman ding a si a timi le hmuh khawh lomi PATHIAN pennak ca lawngah hman ding a si a timi hna an um. Hihi Biakam tharah Bible ah a um hlei lo. A țha an ti ningin an chimmi a si ko.

Cheuhra cheukhat hi biakinn saknak te hna PATHIAN rianțuannak a dangdangte hna ah hman dingin PATHIAN nih a rak halmi hna a si lo. Tlangbawi a rianțuantu hna le an nupi fale hna le PATHIAN mi hna lak i a harsa mi hna nih an khimnak hnga ca i halmi tu a si.

Biakinn saknak cu a dang tein thawh a si (Exo 25:1-8; 36:3, 1Chan 29:1-9). Biakinn thilri zohkhenhnak zong a dang tein thawh a si (Exo 30:14-16). Biakam thar rianțuantu, Lamkaltu Paul nih Juda ram i zumtu sifak hna caah a dang tein thawhlawm a kholh hna (1Korin 16:1-2, Rom 15:25-29). Cun, Thawngțha chim i a khual tlawnnak Mission ca zong a dang tein bawmh a hal hna (1Korin 16:6).

Nihin Chinmi Khrihfa hna hi mi khiar, peeknak lei ah a lungkhong ngaingaimi kan si. Cheuhra cheukhat hi Tlangbawi hna le an chungkhar hna i cawmnak ding lawnglawng in hal kan si. Asinain tlangbawi hna lawng pek kan sian hna lo caah, a kenkip ah Khrihfabu nih hman a si. Cheuhra cheukhat hi Bible ning tein kan hman seh kan ti ahcun, Tlangbawi hna kan pek ding a si i, Khrihfabu ta a si lo ti hi a si.

Chinram ah cheuhra cheukhat hi Tlangbawi/rianțuantu hna lawng pe hna u sih law, inn le lo zong an ngei ve cio lai, cun, an fanu fapa hna zong sianginn țha deuh hna ah an kaiter khawh ve hna hnga. Cun, Khrihfabu chung i ngakțah hna le nuhmei hna le sifaak hna zong an khim ve hnga. Sihmanhselaw, Tlangbawi/rianțuantu hna kha an eikhim hmanh pek an rak si hna lo. Cucaah kum 2000 in 2022 kar i Chinram Tlangbawi/rianțuantu hna cu inn le lo an ngei lo i an fale sianginn țha an chia kho hna lo!

An fa le sianginn kaiman leiba he kan chiah hna! Zeicatiah zumtu hna nih kan chuh hna hna i kan hman kanh dih hna. Cucaah, minung an si ve caah, inn le lo le fanu fapa kong an i ruah chih ve a herh. Asinain a in tein an i in hna! Cucaah hmuhnak dang zong an ruahchih a herh tikah an lung dihlak in BAWIPA le a rian caah i pumpek dih zong a har.

Biakinn sak le a dangdang, Mission ca, Crusade le Camping ca tibantuk hna hi zumtu hna nih a dang tein kan rak thawh hrimhrim ding kha a rak si. Sihmanhselaw, Cheuhra cheukhat hmanh siangdok, sianglodok in kan thawh tikah, cu kan thawhmi cheuhra cheukhat lila zong cu kan zaangraam hoi i, “PATHIAN ta a si caah,” tiin, zerngai le thiamngaiin Tlangbawi/rianțuantu hna vo cu kan chuh hna i PATHIAN rianțuannak caah kan hman diam! Cucu, Pastor cheukhat le Evangelist cheukhat hna nih Bible cawnpiak ning taktak le PATHIAN duh ning taktak bantukin an cawnpiak hoi!

BAWIPA PATHIAN nih a ven bikmi hna cu chiti a thuhmi hna, a aiawh i a rianțuantu, a Lamkaltu, tlangbawi hna hi an si. Cun, ramchung i sifak, ngakțah hna le nuhmei hna an si. Cu hna cu an covo cu kan chuh riangmang hna i PATHIAN rian caah, a pennak caah kan ti hi palh țan a si. BAWIPA rianah țang hna u sih. Asinain cheu hra cheukhat in si loin, cheuhra cheukua kan ngeihmi chungin, BAWIPA nih thluachuah a kan pek ning cio in kan thawh cio ding kha a si.
Kannih cu cheuhra cheukhat lawngpei thawh dingah kan ruah hna cu!

Cu hmanh cu sianghuaha loin kan pek rih! Kanmah he kan ngeihmi vialte he KHRIH ta dawh kan si cu! A ngaingai ti ahcun, peknak lei i a pemhmi hna hi an chambau bal lo. Cheuhra cheukhat lawng a pe lengmang rih mi le cheuhra cheukhat in PATHIAN rianțuan rumro a duhmi cu chunglei a hmin rih lomi zumtu an si.

Atu chan ahcun, cheuhra cheukhat a tam caah, Bank hna ah sing a thongthong in nan chiah hna i tlangbawi rianțuantu hna vo cu, “PATHIAN chaw,” tiin hau nan kulh dih! Hi ruang ahhin, Chin Khrihfa hna nih thluachuah kan hmuh ding zat kan hmu kho hna lo.

Tahchunhnak la ning law, kei hi kum 20 tluk BAWIPA rian ka țuan ve cang. Chungkhar ka ngei nain, innhmun pekhat hmanh ka ngei lo. Cucaah, mi inn hlang in um kan herh. Hiti ningin cun ka nunchung umnak inn ka ngei kho lai lo a fiang ko. Asinain BAWIPA ah ka lawm ko. Lam dangin PATHIAN nih a ka pek te ko lai ti ka zumh ko. Chinmi kan Tlangbawi/rianțuantu hna hi inn ngei lo an tam i an fale siangkainak leiba he an um hna, BAWIPA nih a pekmi hna an covo kha kan chuh hna caah a si. Kan chuhmi hna cun, BAWIPA rianah kan țang ngai kan timi hi BAWIPA lawmhmi a si naisai lo!

Biakam thar a kan serpiaktu BAWIPA JESUH nih, tluangtlam tein an chimmi cu, ” ‘BAWIPA na PATHIAN cu na lungthin dihlak le na ruahnak dihlak le na nunnak dihlak in na dawt lai,’ ti hi a ngan bik le a biapi bik nawlbia cu a si. A hun changtu a biapi bik nawlbia cu, cu bantuk thiamthiam cu a si i, ‘Na innpa cu nangmah naa dawt bantukin na dawt lai,’ ti hi a si. Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khumh dih,” tiah a ti (Mt 22:37-40). Biakam thar cawnpiaktu Lamkaltu Paul zong nih tluangtlam tein, “Nawlbia tling tein zulh cu dawt hi a si ko,” tiah a ti (Rom 13:10).

“THLARAU nih an hruai a si ahcun nawlbia tangah na um lo,” a ti (Galati 5:18). Ka tlanval lio ah, cheuhra cheunga in cheuriat tiang riantuannak ah ka pek i ka hman. Cu chungin cheukhat cu ka umnak Khrihfabu ah ka chiah. Atu cu chungkhar he kan si caah, kan eidin ca i ka hmuhmi cheuhra cheuhnih ka pek i cheukhat rianțuannak caah ka pek. Cheukhat cu ka umnak Khrihfabu ah ka pek. Thlachiar mission ruanțuannak a dang tein ka pek. Biakinn saknak a herh ah a dang tein ka pek. Cun, a kong tello in laksawng ka hmuhmi paoh a zapi in thlacamnak le Ministry rianțuannak ah ka pek dih. Cucun, ka pawng i PATHIAN mi a harsa mi hna kha an khim ve.

Ka ngeihmi vialte le keimah he KHRIH ta kan si. Ka pekmi hi ama ta lila kha ka hei pek țhan ko. A kan hneksak i pei a si ko. BAWIPA nih tangka cu a ei lo i a herh taktak bal lo, kanmah Thluachuah hmuhnak ca kha a si ko. Tlangbawi/ rianțuantu hna vo ca i BAWIPA nih a pek cangmi hna rorum, “BAWIPA chaw, BAWIPA ta a si,” tiin kan chuh hna i, “PATHIAN chaw, thawhlawm cu, cu tin hman ding, kha tin hman ding,” tiin hau kan kulh kanh mi hna hi Biatak a si lo, Lihtak tu a si deuh.

Thlarau tlau a dawtu hna nih, cheukua chungkhan pe u, cucu Biatak a si. Tlangbawi le pangeilo le nuhmei le mipem hna vo cheuhra cheukhat kha thlarau tlau tlaihnak ah nan hman ahcun tlangbawi vo le pangeilo le nuhmei hna le mipem hna vo zong nan fir i nan hman a si. Nehemiah 13:10 “Levi mi hna cu an hmuh ding awk hnga a simi kha an pe hna lo ti kha ka hngalh fawn, cucaah cun Levi mi hna le hlasatu hna cu anmahle an rian cio kha kaltak riangmang in lo ah an zam.” KHRIH Lamkaltu, Tluang Lian (Martar).