Pakistan Motor Puahnak In Chinese Minung 9 Thihnak Kong Ah China Nih Hlathlainak Tuah Ding In Pakistan Cozah A Fial
=========
Pakistan tlangcung ram thil puahnak in motor cansualnak a chuak mi ah minung 13 nunnak liam cu lak ah minung 9 hi Chinese engineer an si hna. Hi kong he pehtlaiin, China cozah nih Pakistan cozah sin ah hlathlainak tuah ding in a fial tiah theih asi.
China cozah nih motor hi bomb an puahhnawh mi si a ti lio ah Pakistan cozah nih cun motor chunglei inzin/seh lei a rawk ca ah si tiah lehnak a tuah ve. Minung 30 tluk phurtu motor hi thil puak mi ruang ah lamthlang ah a ril tiah an chim.
Motor cansualnak in nunnak liam mi lak ah hin ralkap 2 an i tel chih hliamtuar zeimawzat an um. Chiatṭhat zohkhanh tu phu nih hliamtuarmi le mi ruak hi vanlawng in an lak hna hnu ah sii-inn ah an tlikpi hna tiah an langhter.
Hi kong he pehtlaiin, Chinese Foreign Ministry biachimtu, Zhao Lijian nih Pakistan cozah sin ah thilsual tuah tu hi hlathlainak tuah i a herh ning in hremnak pek ding le Pakistan ram ah um mi Chinese hna venghim ding in a chimh.
China Cozah Nih A Liamcia Kum 4 I Mucu Kai Mi Ngakchia Rawl Ei Ding Ah Sawda/Sivai Cawhpiaktu Sayamah A Thah. Ngakchia (Mucu) fimcawng mi hna din-ei ah sawda sivai a cawh piak hna ruang ah ngakchia 1 nunnak liam 24 sii-inn an phanh hnu ah an dam ṭhan tiah theih asi. Ngakchia thah timtu Wang Yun hi kum 2020, September thla khan Henan province Jiaozuo city intermediate peoples courth biaceihzung ah thiam lo canter in thah ding ah bia an khiah piak mi a rak si.
Wang Yun hi kum 2019, March thla i ngakchia ca chimtu sayamah pakhat he buainak an ngeih hnu ah a tu bantuk in ngakchia eiding tirawl ah sawda sivai pakhat a cawhnak hi si tiah an langhter.
Biaceihzung ah thah ding in bia an khiah piak mi cu letṭhan ding in a nawl hna. A sinain, nawlnak a tuah mi cu cohlan piak lo in July 14, khan an thah tiah theih asi.
Nyaung-U Peng PDF Sakhan SAC Ralhrang Nih An Laak; Minung 7 An Thah Hna. Mandalay ramṭhen, Nyaung-U peng chung um tualchung hriamtlai phu Bagan Ogre Force(BOF) hriamthil chiahnak sakhan cu SAC ralhrang nih an luhhnawh hna caah tangka Sing 2,000 man tluk hriamthil an laak piak hna, tiah theih a si. July 13, deilei suimilam 4:00 tluk ah SAC ralhrang thazaang 100 tluk nih an luhhnawh hi a si i mipi ralkap 1 le mipi 6 zong SAC ralhrang nih an thah hna, tiah theih chih a si.
“A hngaktu mipi ralkap 1 kuan nih a khen caah an tlaih. Cu pinah a pawngkam khua mipi 6 zong an tlaih hna i an thah hna” tiah Bagan Ogre Force hriamtlai phu in ṭuanvo ngeitu pakhat nih a chim.
SAC ralhrang nih Kachin ralkap serchuahmi hriam zuun 7, kuan bawm 24, 7.62 kuan 2,000 tluk deng, 380 Pistol zuun 1, 380 kuan le 9MM kuan 70 pinah a dang seh thilri hna zong an laak chih dih, tiah a cunglei upa nih a chim.
Pakan Ogre Force hriamtlai phu hi Mandalay, Sagaing le Magway ramṭhen chung hna ah SAC ralhrang pawl an hram chah ding in a cawlcangmi an si. SAC ralhrang nih an sakhan an laak piak hna hnu ah a pawngkam khua hna zong mei in an khanghpiak hna pinah an hrawhpiak hna i nunnak liammi le hliamhma tuarmi kong ah Bagan Ogre Force nih hlathlainak kan tuah liopi a si, tiah an langhter chih.
A Tlau Mi A Fapa Cu Kum 24 Chung A Kawl Hnu Ah A Hmuh Ṭhan. Chinese ah Guo Gangtang tiah theih mi a fapa hi kum 2 mi a si ah minung zuar in chawlehthal hmang mi hna nih an fir piak tiah theih asi. Hringtu a pa nih kum 24 chung cyclle in km 5,00,000 tluk a kawlhnu ah a va hmuh tiah an langhter.
A fapa firpiak a sinak kong he pehtlaiin, kum 2015 khan video zong in an rak ser, Hong Kong superstar Andy Lau a telnak zong ah langhter a rak si bal. Kum chiar China ah hin ngakchia a thong renglo peng an fir hna tiah theih asi.
Hi kong he petlai in, Ministery of Public security nih a langhter mi cu palik hna nih a fapa thisen le hringtu a pa thisen cu DNA hmang in an zoh hnu ah a chungchuak fa taktak a si tiah fianternak tuah in an langhter. A fapa firtu ah ruah mi, minung pahnih cu palik nih an hnu zul in an dawi hna hnu ah an tlaihkhawh hna tiah Global Times nih a langhter. Credit: Lungmili Media