China Minthang Phungki Pa Nih, Jesuh nih a chawnh nak kong le a thatnak, a tlaihchannak kong a chim!!

China Phungkhi Pa Pakhat Nih Jesuh Kong A Chim Mi!!
=========================
Jesuh Pathian nih a chim mi tambik bia pawl cu kan mah Phungki Buddhism he aa pehtlai mi a si. A tu le a tu in ka chim theu ton. Jesuh Pathian cu a dik mi Guru (Saya Kyi) pakhat a si. Kan nih Phungki pawl cu Buddhism kan si. Jesuh Pathian cu kei mah he kan i pehtlai lo tiin tuah a ngah lo. (Jesuh Pathian cu kei mah he kan i pehtlai lo kan i sai lo tiah chim a ngah lo.

Kei mah a kan thlengtu Saya paoh poah hi ka upat tuk hna. Nihin cu Biakinn ah a si caah Jesuh Pathian kong ka chim lai. Jesuh Pathian cu Kei mah Phungki pa ii ka Saya a si. Buddhism ii Dharma pawl caah a mah nih cun thanghnak tampi a ka hmuh ter ton. Ka ih nak hmai ah a mah ii a rang mi ceu nak nih a ka kah.

Jesuh Pathian nih a ka chimh mi cu ” Nang cu sual kan phaw lo. Zeiruangahdah ti a si ahcun nangmah le keimah kan thinlung chungah Jesuh Pathian timi kei mah ka um ruangah hin a si. Na thinlung chungah kei mah timi Saya ka um rih ko. Na kal nak lam le ka kal nak lam cu aa khat mi an si ko.” tiah a ka ti.

Jesuh Pathian sinin kal tak nun le tuar in kawh nak nun ka chawng. Jesuh Pathian nih kaltak nun le tuar in khawhnak nun a ka peek. A ton mi minung chungin a tam bik cu mi sawhsawn lawngte an si. Riansang le nawlngeitu he an i tong bal lo.K ha lio chan ah a lianngan mi Biaknak hruaitu pawl he zong an i tong bal lo.

A ton mi hna lak ah nga tlaitu pawl, mi sawhsawh pawl, chawlehnak a tuahtu pawl le sifak santlailo pawl an si hna. Jesuh Pathian a sining a niam biknak cu a dongh nak bik a zultu pawl he zaan riah hromtinak an ngeih lio, an thut lio ah, Jesuh Pathian nih cun, ” Nan kee kan tawl piak hna lai.” tiah a ti hna.

Zei Pathian a siloah zei bantuk Saya nih an zulhtu hna cu an kee an tawl piak bal hna? Jesuh Pathian nih cun Puan(Pawa) le tihrai cu aa lak ii a zultu hna cu pakhat cio in an kee a tawl piak hna. Cucu Jesuh Pathian a niamhbik nak caan cu a si.

Catholic Church Pope Francis zong nih thongtla pawl minung tampi an kee a rak tawl piak bal hna. Cucu Jesuh Pathian sinin aa cawm mi nun a si. Jesuh Pathian nih cun minung paohpoah hi aa khat tein an kan hmuh dih. Kei mah bantuk in hngakchia pawl cungah a tha tuk. A caan caan ah hngakchia pawl cu minung hna nih an rat pi hna ii Jesuh hmai ahcun hngakchia pawl cu hnachet ngain in an um hna.

A sinain Jesuh nih a zultu hna cu a chimh hna, ” Hngakchia pawl kha ka sinah rakrat pi hna uh. Hngakchia pawl cu ka sinah rak ra hna seh.” tiah a ti hna. Kei zong Jesuh Pathian sinin nun ka cawng. Taiwan ah ka um lio ah, a hmasa bik ah hmai lei ah a um mi hngakchia pawl kha ka kuh hna i ka hnamh hna.

Jesuh nih a chim mi Bia pakhat cu “Orh lei kut nih a tuah mi thatnak kha, keh lei kut kha tonghter hlah.” tiah a chim. Cucu a lianngan tuk mi thil a si. Cucu Buddhism ii Tri- Chakra a si. “Orh lei kut nih a tuah mi thatnak cu, Keh lei kut kha tonghter hlah, timi nih zeikhidah a chim duhnak cu a si?

“Kan tuah mi thatnak kha, kan thinlung chungah i chiah lo” kha a si. Thatnak timi cu tuah awk a tlak mi thil a si. That hmuhnak zong tuah awk a tlak mi a si. Cucu kan thinlung chungah kan khumh a si ahcun kan mah tein thatnak co kan duh kha si. Cu ruah nak cu a dik lo mi a si. Minung timi nih “Kei mah” timi lungput ngeih a hau lo (A ngah Lo),. Kei mah, timi lungput na ngeih ah cun nangmah lawng thatnak co na timh duh caah a si.” tiah a chim.

Cakilh-Cu kong he pehtlai in na hmuh ning le na ruah nak Comment ah rak tial ve. Jesuh a thatnak cu a ngalh ii a chim ko nain a donghnak a bia ah Phungki zong varam kan kai ve ki lai tidawh a si ko. Phungki biaknak le Khrihfa biaknak aa khat ti bantuk in a vun chim. Zeitin nan ruah cio dah. Jesuh a thatnak le zumh awk a tlak nak a theih tuk ko nain Khrihfa cun a lut kho bak lo hih.

Pu Sai Hmung Thihnak Kong He Petlai In CDF-Lautu Nih Fianternak An Tuah ! CDF-Lautu Cu a luancia 2021 May 4 in SAC ralkap dohtu dingah rak dirh a si i, Chin hriamtlai phu hna he voi 70 leng SAC ralkap kan doh ve cang i, kan ralkap 13 zong hliamhma an pu cang, tiah cathanh an chuah.

CDF-Lautu hmunram cu Chin ramkulh a laifang ah a um i, kan hmunram chungah check gate 11 kan chiah. Khualtlawngmi hna zong checkhlatnak ṭha tein kan tuah hna, tiah an langhter. CDF-Lautu cu SAC ralkap a domi kan si caah dalan fimhlawm, dohthlennak a dodalmi, mi ngiathlainak tuahtu le SAC ralkap kuttang minung hna thah ding tiang in aa hmaithlakmi kan si lo pinah kan policy zong ah a um lo.

A ruang tampi ruangah minung 50 leng kan tlaih hna i, thih dan kan pekmi a hohmanh an um lo, dantatnak kan pek hna hnu ah kan thlah ṭhan hna, tiah an langhter. Pu Sai Hmung nih tualchung mi cu pistol zun khat in a tlerhkhawn lengmang hna. MATC/MDF ralbawi zik nih minung thahnak nawl a ka pek tiah aa hrocer i, khuami nih kan sinah report an tuah lengmang caah a pistol zun khat le kuan 7 he 2022 October 9 zanlei sml 3:00 ah kan rak tlaih.

Pu Sai Hmung cu biahalnak ṭha tein kan ngeih hnuah MATC/MDF sinin minung kahthahnak nawl an pekmi kong cu fiang tein a chim caah nihnih chung kan hren hnu October 11 zanlei sml 3:00 ah kan thlah ṭhan. Pu Sai Hmung kan thlah hnu in zarhkhat a rauh ah a ruak in an charnak kong zong kan theih. Pu Sai Hmung thihnak kong he pehtlai in CDF-Lautu nih kan thahmi a si hrimhrim lo i, kan thlah hnu in a chungkhat sahlawh rualchan he zong an i tong ko.

Pu Sai Hmung a thihnak hi MATC/MDF he pehtlaihnak a ngei, tiah an langhter. CDF-Lautu cu SAC ralkap a dohmi kan sin pinah minung pumpak, miphun ṭengngei le miphun dangdang nih sualnak an tuah ahcun a herh ning in dantatnak kan tuah hna. Dohthlennak hnahnawhnak petu paoh cu upadi ning in kan tawlrel hna lai, tiah CDF-Lautu nih cathanh An chuah.

SAC Ralkap Nih Kachin Bible Sianginn Cu Hriamngan In An Kah Caah Siangngakchia 4 Hliamhma An Pu! Shan ramkulh, Kuatkhine khua um KBC bible sianginn cu SAC ralkap nih nizan November 3 zanlei ah hriamngan in an kah caah siangngakchia 4 hliamhma an pu, tiah KIA ralkap sinin theih a si.

Zan sml 8:30 ah Kuatkhine khua um KBC khrihfa bible sianginn chungah SAC ralkap nih hriamngan lung 3 in an kah caah siangngakchia 4 hliamhma an pu. An hliamhma a fak ngai ko nain an nunnak caah thingphang a si lo, tiah an langhter.
SAC ralkap nih hriamngan an kah ruangah Ndau Awng San, Myitung Doi La, Brang San le Sut Ring Awng cu hliamhma an pu, tiah theih a si.

Zahan November 3 zan sml 10:00 hrawng ah KBC bible sianginn ah SAC ralkap nih hriamngan kah nakin siangngakchia 4 hliamhma an put hnu zong in SAC ralkap nih pehtlai in hriamngan an kah, tiah theih a si.

Kalay PDF Le SAC Ralkap Kahdohnak Ah SAC Ralkap 3 An Thi! Nizan November 3 zing sml 3:00 in Kalaymyo in Kalay thlanglei ah rallam a sialmi SAC ralkap 80 leng cu, Myogyi khua le GTI karah zing sml 6: 50 ah bomb in kan puahhnawh hna, tiah Kalay PDF nih cathanh an chuah.

Cu bomb puahhnawhnak ah SAC ralkap 3 an thi i, hliamhma pummi an tam. SAC ralkap nih pawngkam cu minutes 5 chung hrawng an kah hnuah a luancia October 31 ah an rak tlaihmi tualchung mi 3 cu, GTI sianginn in SAC ralkap 40 hrawng nih kadang hmun ah an kalpi hna. Kalaymyo um SAC ralkap nih zing sml 11:00 hrawng in hriamngan in kah an bawmh hna i, hriamngan kuan cu Thohcian khua ah a tlak caah pitar kum 71 hliamhma a pu, tiah an langhter.

Madaya Ah Rallam A Sialmi SAC Ralkap Bomb Puahhnawh An Tong I, Ralkap 3 An Thi, Hliamhma Pumi An Tam! Mandalay ramṭhen, Madaya peng ah ke in rallam a sialmi SAC ralkap cu PDF nih bomb in an puahhnawh hna caah SAC ralkap 3 an thi, ke kiak le kut kiakmi an tam, tiah Nat Soe PDF in an hruaitu Nat Soe nih a chim.

Nizan November 3 zanlei sml 2:00 ah Madaya peng Kaukselay khua le Nyaung Ngoh khua kar ah ke in hmun hnih ah rallam a sialmi SAC ralkap cu bomb puahhnawh an ton caah ralkap 3 an thi, hliamhma pumi an tam, tiah theih a si. Rallam hmun thum in sial ding in timh tuahnak an ngeih lioah an motor Htaw Lar Gyi cu bomb puahhnawh a ton caah SAC ralkap 3 an thi. Ke kiak le kut kiakmi an tam. Daung PDF le Nat Soe PDF i bawm in an puahhnawh hna, tiah theih a si.

Monywa Ah SAC Ralkap Le Pyusawhti Bomb Puahhnawh Ruangah 10 An Thi! Sagaing ramṭhen, Monywa peng Nagatwin(နဂါးတွင်း) khua ah rallam a sialmi SAC ralkap le pyusawhti cu, nizan November 3 ah bomb puahhnawh an ton caah SAC ralkap le pyusawhti 10 an thi, tiah theih a si.

SAC ralkap pawl cu zing sml 7:00 hrawngah pyusawhti an tamnak Tawpu khua in Nagatwin khua ah an lut i khuami inn le lo an khangh. Zanlei sml 5:30 ah pyusawhti 4 cu bomb thianhhlim ding in an kal lioah a voikhatnak bomb kan puahhnawh hna i a hmun ah an 4 ning in an thi, tiah Monywa Peregrine PDF in bawino Lay Paw nih a chim.

SAC ralkap 10 le pyusawhti 10 leng nih khuami an facang, chiti le thilri dangdang an fir i, zanlei sml 6:15 ah bomb in a voihnihnak kan puahhnawh ṭhan hna i SAC ralkap 6 hrawng an thi,” tiah bawino Lay Paw nih a chim. Cu kahdohnak ah Monywa Peregrine People’s Defence Force, Daung brother PDF, Generation Z People Defence Force၊ Eagle PDF, Monywa pengkomh Battalion 1, M.P.D.F le Zar Ma Ni PDF hna i bawm in an kah hna, tiah theih a si.

SAC ralkap nih Nagatwin khua inn 9 nak tlawm lo an khangh i a ciam dih. Tualchung mi 7,000 leng a himnak hmun ah an zam, tiah theih a si. Nihin November 4 zinglei ah SAC ralkap pawl cu Monywa hmunram ah rallam an sial rih ko, tiah PDF hna sinin theih a si.

A luancia November 2 zong ah Monywa khua Suanye Htet(စွမ်းရည်ထက်) datsi dawr pawngah bomb thianhhlim ding in a kalmi SAC ralkap motor 1 cu, Monywa Peregrine People’s Defence Force nih bomb in an rak puahhnawh hna caah SAC ralkap 5 an thi i, 5 hliamhma an rak pu. Crd-The Chin Post