Chin Ramkulh Chung Ah Mipi Uknak A Feh Chin Khawhnak Hnga CDF He Biaruahnak Kan Ngei” Colonel Solomon
===========
Chin ramkulh chung, mipi uknak a feh chin khawhnak hnga hmunkip ah a um mi CDF phu pawl he biaruahnak kan ngei tiah CNF/CNA Colonel Solomon nih a chim. Chin ramkulh chung kahdohnak, mipi uknak kong rianṭuanṭinak dirhmun he pehtlai in Colonel Solomon biachimnak muicawl cu The Chin Journal nih June 13 ah a langhter.
“CDF lawng siloin PDF pawl he zong kahdohnak kan tuahṭi. Mipi uknak lei zong ah SAC lei rianṭuannak a rawh dih cang caah CNF le CJDC, CDF hna nih mah tein uknak kan dirh lai tiah CNF he mipi uknak kan dirhṭi, kan ṭuanṭi. CDF hna hnu ah CNA nih a zungzal in a dirhkamh ko. CNA zong nih dirhkamh zungzal ko.
Atu cu kum 2 hrawng a van rauh cang caah ṭha deuh tein uknak phung pakhat le pakhat a feh khawhnak hnga Chin Nation kan dirh lai. Chinland Council dirh ding in CDF an zapi ngawt he biaruahnak kan ngei hna” tiah Colonel Solomon nih a chim.
Hramhram in uknak lak a si hnu Pau dothlennak chung ah peng kip le hmun kip ah Defense Force an chuak cio hna. Cu CDF phu pawl le CNF hi kahdohnak ṭha tein an i bawmh khawhnak hnga caah CJDC dirh in cawlcangh a si.
June 12 ah Karen ram ah caan karlak uknak kan dirh cang tiah an thanh cang i cu bantuk in adang peng tampi zong nih mah tein uknak dirh kho ve ding in NUG caan karlak President Duwa Lashi La nih forhfialnak zong a chim.
Mipi Inn 70,000 Leng SAC Ralkap nih An Khangh Cang; Hramhram in uknak a latu SAC nih 2021 February 1 thawk in Myanmar ramchung hmun kip ah a ralkap samh in mipi inn pawl an khangh/an hrawh lengmang caah 2023 May 31 tiang ah mipi inn 70,000 leng an khangh/hrawh cang tiah Data for Myanmar nih report a langhter.
Data for Myanmar nih February 28 tiang an thanh mi cazin ah mipi inn 60,459 tiang SAC ralkap nih an khangh tiah an rak langhter i March le May thla chung ah inn 9,869 an khangh chap. SAC ralkap nih hramhram in uknak a lak hnu ah a chuak mi hriamtlaih buainak karlak ah SAC ralkap le a kuttang phu tampi hna nih an khangh mi leng ah hriamngan nih a khen mi mipi inn, inn, biaknak lei inn 70,342 tiang a um cang i Sagaing ramṭhen ah an khangh mi a tam bik tiah an langhter.\
Sagaing ramṭhen ah mipi inn 53,816 an khangh i Magway ramṭhen ah mipi inn 10,451 an khangh. Chin ramkulh ah mipi inn 1,637 SAC ralkap nih an khangh cang i thla 3 chung ah inn 152 an khangh tiah theih a si.
Cun Mandalay ramṭhen, Taninthary ramṭhen, Bago ramṭhen, Kayah ram, Chin ram, Shan ram le Karen ram hna zong ah mipi inn 4,000 leng SAC ralkap nih an khangh cang tiah canthanh chung ah hmuh khawh a si. Crd; The Chinland Post