Chin Ramkulh Ah Bomrap Ruang Ah Hliam A Tuar Mi Le A Thi Mi 80 Hrawng An Um Cang
========
Ralkap nih hramhram in uknak a lak hnu bomrap ruang ah Chin ramkulh chung ah hliam a tuar mi 60 leng le a thi mi 20 hrawng an um cang tiah Mizzima nih a langhter. Hliam a tuar mi le a thi mi chung ah kum 2 in kum 13 kar hngakchia 10 nak tlawm lo an i tel tiah a langhter.
“Kan banh khawh tawk cazin kan lak khawh mi ning ahcun Chin ramkulh thlanglei le chaklei Mindat, Matupi, Kanpetlet le Paletwa hna ah bomrap ruang ah a thi mi an tam chin thluahmah. Hngakchia zong an i tel” tiah min langhter a duh lo mi pakhat, bomrap kong he pehtlai in cazin a la mi nih Mizzima ah a chim.
Cubantuk in Matupi khua luhnak Laymyo tiva kam ah SAC ralkap gate pakhat a um i cu gate pawngkam zong ah ralkap nih bomrap an hmanh dih tiah theih a si. Bomrap ruang ah Matupi khuami 5 nak tlawm lo an thi cang i kum 8 hngakchia 1 zong bomrap ruang ah a ke a bul tiah theih a si.
Myanmar ram ah 2010-2019 tiang kum 9 chung ah bomrap ruang ah a thi mi le hliam a tuar mi 1,900 hrawng an um tiah Switzerland ram hrambunh bomrap kong a ngiathlainak phu (Landmine and Cluster Munition Monitor) nih 2020 December ah a rak thanh. Cu report ning ahcun 2019 kum ah bomrap ruang ah a thi mi 89 le hliam a tuar mi 269 an um i Shan, Kachin le Rakhine ram hna ah a tambik an si tiah a langhter.
SAC Phu Nih Sualnak Ngei Lo Mipi 3,600 Hrawng An Thah Cang Hna; Myanmar ram ah hramhram in uknak lak a si hnu kum 2 leng caan chung ah SAC ralkap nih sualnak ngei lo mipi 3,600 hrawng an thah cang hna i minung 22,842 a tlaih/hren cang hna tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 May 31 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 18,552 an tlaih/hren cang hna i cu chungah minung 6,112 cu thawngthlak ding in biakhiah an si.
Dothlennak he pehtlai in Death Penalty (Thah ding in biakhiah) hnu ah thong chung ah hren a si mi 114 an um i hriawh in thah ding tiah biak an khiah mi 42 telh in minung 121 cu hriawh in thah ding tiah biakhiah an si caah thah ding tiah biakhiah a si mi an zapi te 156 an si cang. Atutiang ah biakamnak he an thlah ṭhan cang mi 4,320 an um tiah a langhter.
Thandaung Ah SAC Ralkap Bomrap An Puah Hnawh Hna, Bo 2 Bawi Telh In 13 An Thi; KNU Brigade 2 hmunhma, Thandaung khua, meng 13 ah aa chawk mi SAC ralkap pawl bomrap an puah hnawh hna i Bo 2 bawi telh in 13 an thi tiah PDF-Thandaung nih an thanh.
A luancia May 29 zaanlei sml 5:00pm luan hrawng ah SAC ralkap pawl cu KNLA le dothlennak phu pawl nih Thandaung khua thlaanhmun in an bawh hna i bomrap lung 2 an puah hnawh hna hi a si.
“SAC ralkap pawl mi ngiat ding in an rak i chawh lio ah bomrap lung 2 kan puah hnawh hna i an thi thluahmah. Hliam a tuar mi le a thi mi ruak pawl cu meng 13 SAC ralkap sakhaan ah an phorh hna” tiah KNU Brigade 2 thawngpetu nih Mizzima ah a chim.
Bomrap puah hnawh an ton caah SAC ralkap pawl nih hriamngan an kah thlorh. SAC ralkap nih an kah mi hriamngan ruang ah khuami nu pakhat a khuk ah hliam a tuar i a fapa zong a hnakhaw a hliam tiah theih a si. Crdt; The Chinland Post