Tuluk Ca Aa Tial Mi Kuak Zuknak In Sipin Zung Riantuan Minung 3 Siizung An Phan
=========
Yangon ramthen South Dagon peng ah Tuluk ca aa tial mi Kuak a zu mi Sipin zung riantuan minung 3 cu lungfim lo in an um caah siizung an phan tiah kan theih. August 10 zanlei sang ah South Dagon peng sangthen 24 chungah hmunhnawm a char lio mi Sipin zung riantuan minung 6 chung ah 3 cu Tuluk ca aa tial mi Kuak bawm cu lamkam ah an hmuh i an zuk caah an hnarthi a chuah pin ah lung fim lo in an um i siizung an phak hi a si. “An zuk lio ah cun zeiti hmanh an um lo, caan tlawmpal ah lung mih in an tlu hna, Kuak an zuk bangmi cu siibawi sin ah kan pek” tiah mibawmtu khua mi pakhat nih a chim.
Punjab Pa Nih A Chungchuak Fanu A Thah Mi Ruak Cu Cycle In Khuachung Ah A Hnuh I A Chawh Pi. Amah chungchuak a fanu hi inn chung in leng a chuah i arak kir lei ah amah hringtu a pa nih a zumhar mi hriamnam hmang in a thah tiah palik chung in ṭuanvo ngeitu hna nih an langhter. August 10, ah hringtu pa nih a fanu RUAK hi Cycle hmangin a hnuh i khuapi chung a chawpi hnu Punjab tlanglawng lampi ah a hlonh lio cu CCTV nih fianglang ngai in a rak tlaih tiah palik hna nih an chim.
Ṭuanvo ngeitu palik hna nih India Today a chimh ning in, “a chungkhar hna zong palik nih inn chungah khumh in kan ven hna thilsual tuahtu apa zong kan kawl cuahmah lio asi” tiah an langhter.
Ṭuanvo ngeitu hna nih an chim ning in, a fanu inn a chuahtaak cang micu amah telawng arak kir ṭhan caah apa thinhun celhlo nih atu bantuk in a rak thah hi asi tiah an langhter chih.
Hawaii Ramlak Kanghnak In Minung 36 Naak Tlawmlo An Thi. Hawaii ramlak Maui hmunhma kanghnak in minung 36 naak tlawmlo an thi cang tiah ṭuanvo ngeitu hna nih an langhter. Thlichia/ṭotho nih hin meikanghnak a fahter chin chin caah chungkhar khuasaknak inn tampi le rianṭuannak hmunhma a rawk tiah theh asi. Tualchung minung thong tampi cu hmun himnak ah ṭhial ansi cang hna. Chaitṭhat zohkhenh tu phu nih bawmhchanhnak zong ṭhawng chin chin in an kalpi tiah ṭuanvo ngeitu nih an langhter.
Tulio dirhmun ahcun tualchung hi a him tilo caah a herh ning in meithat tu phu hna cu cawlcanghnak la dingah cozah nih a nawl hna tiah theih asi. Maui ah khualtlawng luhchuah khap asi i, hi hmun ah hin i dorchungnak inn 5 an ser chih. Cunglei helicopter hmangin meialh hi hmih dingah an cawlcang tiah kan theih.
President Joe Biden Thah Ding In A Hrocer Tu Robertson FBI Nih An Kahthah. CCN news nih a langhter ning in, Utah khuapi ah khuasa mi Craig Robertson cu August 9, ah FBI nih an kahthah tiah theih asi. FBI nih an langhter ning in, Mr Roberston nih hin online chungin American president Joe Biden thah dingin a ṭhihphaih tiah an langhter.
August 9, zing suimilam 6:15 tluk ah FBI nih an kahthah mi Robertson nih hin America president Joe Biden hi Salt lake khuapi Utah lei panh in a kal lai ti a theih bak in online chungah vunra seh sniper in ka rak kahthah lai tiah ṭhihphaihnak a tuah tiah an langhter.
Australia Ram Ah Chungkhar Pakhat Ah Minung 3 Pa Eisualnak In An Nunnal Liam. Australia ram chungkhar pakhat ah minung 4 rawl eiṭimi lak in minung 3 cu (Mushroom) eisualnak in an nunnak a liam tiah theih asi. July 19, khan hi thihnak konglam he pehtlaiin Australia palik hna nih chungkhar rawlchum tu nu cu a umnak inn ah fuh in tonbiaruahnak an tuah cang tiah an langhter.
Sihmanhsehlaw amah zong damloin aum lio si caah zeihmanh buainak anpe lo tiah an chim. Australia palik nih August 8, tiang khan chungkhar pakhat minung 4 cung ah pa (Mushroom) eisualnak in a thi mi 3 le damlo in a ummi rawlchumtu nu konglam hi hlathlainak an tuah tiah theih asi.
France Ram Mitlamtlinglo Hna Khuasik Thla Dinhnak Caan Hmang Ding In Kalmi Hna Umnak Inn Kanghnak In Minung 11 An Thi. France ram khuachak lei lam mitlamtlinglo hna khuasik thla dinhnak caan hmang ding in kalmi hna umnak inn (Vacation Home) pakhat ah August 8, khan meikanghnak a chuah i minung 11 an thi tiah The Associated Press nih a langhter.
Meikangh chuahnak hmun ah meithattu phu hna cu rianrang in kalter ansi i, meialh hi caan raulo teah an hmihkhawh colh tiah Haut-Rhin prefecture nih a chim. Meikanghnak hmun in minung 17 cu chanhchuah ansi i pakhat hi a dirhmun derthawm caah rianrang in sii-innpi ah an tlikpi colh tiah a chimchap.
Nunnak liam mi hna hi Wintzenheim khuapi in meng 90 tluk a hlatnak hmun France khuapi Nancy in khuasik thla dinhnak caan hmang ding in ara mi bu ansi hna tiah an langhter. Hi kong he pehtlai in, France president Emmanuel Macron a chim micu hi mibu chungah hin mitlamtlinglo le an hawikom cheukhat hna an i tel tiah chim in nunnak liammi chungkhar a tuarpinak hna zong a langhter tiah theih asi. Credit: Lungmili Media