Chin Mi Nih Ral Lakah Zeitindah Kan I Zohkhenh Lai?

Chin Mi Nih Ral Lakah Zeitindah Kan I Zohkhenh Lai?
=============
Nan theihcia bantuk in kawlram hmun tampi le Chin ram hmun tampi ah ralhrang Min Aung Hlaing ralkap le mipi lei ṭang paralṭha ralkap pawl kah dohnak a chuak cang. A chuak chinchin lai. Ralhrang ralkap hi ṭihding cu an si nain, mah tluk ruahsur lakah ramlak tiangtiang zampiak ding cu a si hnga maw? ti hi a ka ruahter ngaimi a si. Ramlak ahhin kan him deuh hlei hnga maw? ti zong a ka ruahter ngai fawn. A ngaingai ti ahcun ramlak ko ah a him lo deuh ti khi ka hmuhning a si.

Asi ahcun kah dohnak a chuak chinchin lai caah zeitindah kan i zohkhenh lai i, kan i runvennak cio lai ti mi keimah hmuhning le siaherhbia hna cu atanglei bantuk an si; 1. Khua kipah ralhrang ralkap an phan tikah nan ṭih hna zongah ramlak tiangtiang mipi zam colh loding a si lai. Asinain ralhrang ralkap le police nih tlaihding ah record ah an chiahmi minung hna bel an um asi ahcun pakhat le pakhat thawng i theihter in a himnak bik hmun ( Safety zone) pakhat khat ah zam colhding a si lai.

2. Khua he nai niam pongkam ah kah dohnak thawng a um sual a si ahcun ramlak ah nan zam colh lai lo. Asinain vanlawng hna in bomb an tlak, inn le lo hna mei an duah bel a si ahcun a himnak hmun pakhat khat ah zamding a si ko.

3. Khua kip nih a himnak hmun (Safety zone) chiah cioding. A himnak bik hmun ah chiahding mi hmun hma hna cu Biakinn, khuami nih ngeihmi innpi ( Hall), Sianginn pawl a si lai. Asinain mah a cunglei pawl hi a him deuh lo ti a si ahcun, khuachung i lentecelhnak hmun kau pawl ah idornak thlam sak cioding a si lai.

4. Mah a cung i dornak hmun paohpaoh ahhin Arangmi-Thantar ( White colour flag) thlai dihding a si lai. 5. Abikin kum 60 cung upa, midam lo, hngachia le nu paoh ṭha tein zohkhenh ding a si lai. 6. Ral tho sehlaw pakhat le pakhat i zohkhenh khawhnak ding caah tiah Emergency Committee serding. Cu Committee upa, khua upa le pastor dihlak nih tuanvo lakding. Abikin, hi bantuk lio ahcun biaknak lei i Pastor pawl kha ralhrang ralkap hmai ah biachinding le mipi nih a herh tiah ruahmi tuanvo pekding a si lai.

7. Pastor pawl nih an ngeihmi thilthuam vialte lakah a thabikmi i tuah in a herhning poah in ralhrang ralkap hmai ah khuami dirkamh le ralṭha tein chawnhbiak, Mipi eidin, sii ai le hnipuang tbk… a herhning in tawlrel piakkhawh i zuamding a si lai. 8. Nungak le nutungno pawl kha ralhrang ralkap hmai ah ṭha tein ṭhutdir thim le ralring tein umkhawh i zuamding a si lai.

9. Inn chungah phaisa, eiding le man ngei thil tbk…. pawl chiah loding le a himbik lai tinak hmun ah khor cawh i, cu ahcun abiapi mi thilri pawl cu chiah cioding a si lai. 10. Mipi dihlak ralkap hmai ah a herhlomi biachim loding le bia an in hal hna tikah, nan holh kan theih lo tiah leh in, a herhning in pastor te kha auh le chim i zuamding a si lai.

11. Țhawng u law, nan ral ṭha ko u, ṭih hlah u, an hmaiah therphang hlah u; zeicahtiah nanmah he a kalmi cu Bawipa nan Pathian a si; an deuh hna lai lo i an hlaw fawn hna lai lo,” a ti. Deuteronomy 31: 6. A zungzal in thlacam u, zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna. 1 THESALON 5:16-18. Kawlram hmunkip ah a ummi Chin mi dihlak Pathian nih a thiangthlarau in, in umpi zungzal ko hna seh! Credit: Pa Hen Thang