CDF-Thantlang Nih Thantlang Khuachung Tilim Operation 02 Kahdohnak Cathanh A Chuah
=========
Chin ramkulh, Thantlang khuapi ah Chinland Defense Force-Thantlang, Chin National Army le Chinland Defense Force-Zophei fonh nih SAC ralhrang umhmun khuarnak sakhan pawl cu 2023, July 11, zan suimilam 11:00 thok in Tilim Operation 02 min in kahdohnak an tuahmi cu ni 37 a tling cang, tiah CDF-Thantlang nih nizan August 16 ah cathanh an chuah. 2023, July 12 ah Khah-lah-yiah 269 ralhrang 1 cu hriamthil tling he mipi sinah aa fonh, tiah an langhter.
Thantlang khuapi chung ah SAC ralhrang thazaang 160 hrawng nih umhmun an khuarnak Khah-lah-yiah 269 sakhan cu August 14, zinglei suimilam 5:00 tluk in kan kahdoh hna i SAC ralhrang Ṭet-khuai sakhan (Haukabung) cu 5:30 tluk ah kan laak khawh. Kahdohnak cu zinglei suimilam 10:00 tluk tiang a chuak i Thantlang-Hakha kar um auto tlang, TBC, TABC le hmun dang ah ummi ralhrang pawl zong kan kahdoh hna caah kahdohnak faak ngai in a chuak, tiah an langhter chih.
Ni 37 chung kahdohnak ah SAC ralhrang 15 an thi i 30 leng nih hliam an tuar pinah 2 kan tlaihkhih hna. Cu pinah meithal zuun 3, RPG 2, kuan le bomb pawl zong an laak khawh chih, tiah cathanh an chuahmi in kan theih.
Cu kahdohnak ah CDF-Thantlang chungtel 1 le CDF-Zophei chungtel 3 nih ram le miphun caah an nunnak an pek. SAC ralhrang nih kahdohnak a chuah lio ah mipi hna umnak Khuafo khua, Haukabung sakhan le hmun dang dang hna ah nawl buar in bomb a rak thlak hna caah Biakinn 1 le mipi inn 7 zong an rawk, tiah theih chih a si.
SAC ralhrang nih raltuknak vanlawng in voi tampi a kah pinah thazaang a chap hna i kahdohnak faak deuh in a chuak khomi a si caah mipi nih um/kal kan ralrin zong a hau, tiah CDF-Thantlang nih ralrin peknak an tuah chih.
Tilim Operation Ah SAC Ralkap 15 An Thi, Chin Ralkap 4 Nunnak A Liam. Chin ramkulh, Thantlang ah Chin ralkap phufonh nih Tilim Operation 02 min in kahdohnak an tuah i, ni 37 chung kahdohnak ah SAC ralkap 15 an thi, 30 renglo hliamhma an pu. Chin ralkap phufonh CDF-Thantlang le CDF-Zophei in ralkap 4 nih ram le miphun ca ah nunnak an pek, tiah CDF-Thantlang nih nizaan August 16 ah an thanh.
Chin ramkulh, Thantlang khuachung SAC ralkap nih hmunhma an laknak sakhan hna cu Chin National Army(CNA), Chinland Defense Force-Thantlang le Chinland Defense Force-Zophei nih a luancia July 11 in an rak kah. Tilim Operation 02 thawk hnu, July 12 ah Thantlang khuachung um khah lah yiah 269 battalion in ralkap pakhat cu a hriamtling he Chin ralkap sin ah aa fonh, tiah an thanhmi ah cun an langhter chih.
Tilim Operation 02, August 14 zinglei suimulam 5:00 in Thantlang khuachung hrambunh SAC ralkap thazaang 160 hrawng an umnak khah lah yiah 269 telh in, Thantlang le Hakha kar Auto tlanghrawn, TBC, TABC hmunhma cu Chin ralkap nih an kah.
Ni 37 chung Tilim Operation 02 kahdohnak ah SAC ralkap 15 an thi i, ralkap 30 leng hliamhma an tuar pinah ralkap 2 kan tlaih khawh hna, tiah CDF-Thantlang nih an thanh. Cu pinah Thantlang khuachung SAC ralkap umnak Haukabung sakhan cu Chin ralkap nih an lak khawh pinah meithal 3, RPG 2, kuan le bomb hna zong kan lak tiah an langhter.
Tilim Operation 02 chungah SAC ralkap nih raltuknak vanlawng in mipi umnak an kah i, Thantlang peng Khuafo khua Baptist Biakinn telh in tualchung mi hna umnak inn 7 a rawk. SAC ralkap nih vanlei kahdohnak an tuah lengmang pinah ralkap thazaang zong a chap caah kahdohnak a fakchin kho. Cucaah umkal i ralring cio ding in CDF-Thantlang nih mizapi sin theihternak an tuah.
Kyaukkyi Peng Ah SAC Ralhrang Kut In Mipi 11 An Thi; 18 An Tlaih Hna Caah Mipi 8,000 Leng Nih Ral An Hrial! Bago ramṭhen, Kyaukkyi pengchung ah thla 4 chung SAC ralhrang nih an hremnak hna le kahdohnak an tuahmi ruang ah mipi 11 an nunnak a liam i 18 an tlaihkhih hna, tiah Karen Emergency Assistance and Relief Committee sin in kan theih.
Kyaukkyi khuapi ah 2023, May thla in August 15 tiang SAC ralhrang nih cunglei kahdohnak voi 33, Drone in voi 1 le hriamngan kuan 400 leng in voi 37 an kah, tiah theih a si. “SAC ralhrang nih atu bantuk in hriamngan an kahmi ruang ah mipi inn 20 leng aa rawk i siangngakchia 4 hna telh in mipi 6 an thi, minung 13 nih hliamhma faak ngai an tuar.
Cu pinah mipi 18 zong an tlaih hna i minung 2 cu an hrem hna hnu ah an thah hna. Minung 3 hi mei in an khangh thah hna. Cucaah khuate 40 leng in minung 8,000 leng nih khua chuahtak in ral an hrial” tiah Karen Emergency Assistance and Relief Committee nih an langhter.
PDF Ralkap 1 Meithal He SAC Ralhrang Sin Aa Fonh Caah An Sakhan Chuahtak Ding In Ralrin Peknak An Tuah! Magway ramṭhen, Myaing PDF ralkap 1 cu meithal zuun 1 he SAC ralhrang pawl sinah aa fonh. Cucaah amah he aa pehtlaimi mipi ralkap hna nih a rannak in an umnak sakhan ṭhial dih ding in Myaing Pah-kah-phah nih ralrin peknak cathanh an chuah.
Pakokku khuapi tualchungmi pakhat a simi Tattoo (b) Htet Way Yan cu Myaing peng hrambunh Pah-kah-phah hriamtlai phu he kum 2 leng rian an ṭuanṭi hnu ah nizan August 15 zan ah Pakokku peng In-pin khua umhmun khuarmi SAC ralhrang pawl sinah aa fonh, tiah an langhter. SAC ralhrang sin aa fonh lio ah Myaing Pah-kah-phah hriamtlai phu sinin M16 meithal 1 zong Commander theih lo in aa ken chih, tiah an langhter chih.
Tattoo (b) Htet Way Yan hi Pakokku peng hrambunh mipi ralkap hna sakhan pawl, Myaing peng hrambunh mipi ralkap hna sakhan pawl Pah-ah-phah, pah-kah-phah, Pah-lah-phah le ngandamnak lei rianṭuan tu hna umnak zong voi tampi a phanmi a si. Cucaah mipi ralkap hna nih harsatnak kan tonnak hnga lo atu bantukin ralrin peknak kan tuah hi a si, tiah cathanh an chuahmi ah an langhter chih.
Thaton-Bilin Kar Ni 13 Chung Kahdohnak Ah SAC Ralhrang 20 Leng An Thi; PDF 4 An Nunnak Liam. Mon ramkulh, Thaton khuapi le Bilin karlak, Yangon-Mawlamyine lampi cung le a pawngkam hna ah ni 13 chung ah kahdohnak voi 10 a chuak. Cu kahdohnak ah SAC ralhrang 20 leng an thi i mipi ralkap PDF in minung 4 nih ram le miphun caah an nunnak an pek, tiah Tabinshwehti hriamtlai phu sin in theih a si.
July 14 in August 6 tiang Yangon-Mawlamyine karlak um hleidonh cu SAC ralhrang nih remh ding in timhlamhnak an ngeih caah Thaton pengkomh chung um SAC ralhrang Ṭet-mah 44 kuttang um Battalion pawl le Border Guard Forces (BGF) ralhrang fonh nih thazaang tam ngai in rallam an sial caah mipi ralkap ṭangṭi phu hna nih an kahdoh hna hi a si, tiah Tabinshwehti hriamtlai phu nih an langhter.
Kahdohnak cu Karen National Union(KNU) Battalion 1, Battalion 2, Karen National Liberation Army(KNLA) le PDF ṭangṭi phufonh hna an si i SAC ralhrang 20 leng an thi. Mipi ralkap ṭangṭi phu in minung 4 nih ram le miphun caah an nunnak an pek, tiah an langhter chih. Credit: Lungmili Media