CDF – Senthang Pathian Sin Upnak An Tuah Khawh Cang!
CDF – Senthang Pathian Sin Upnak An Tuah Khawh Cang!
==========
CDF-Senthang Pathian sin upnak tlamtling tein tuah khawhnak caan kan ngei caah Pathian thangthat si ko seh.
Ramchung ramleng bawmchantu vialte nan dih lak cung ah kan i lawm.
Cheukhat cu ralram ah an um lio a si caah thlacam kan bawm hram rih ko uh. CDF- Senthang kan si khawh tawk in Chin ram le Chin miphun caah kan dir ve lai. Kan tei hrim lai!
CNF kan Chairman Pu Zing Cung hruainak in kan unau Global Thau Organisation (GTO) nih CNF caah US$180,000 an kan bawmhnak cu lunglawm tha nuam tein Thau kan unau tampi umnak Columbus, Ohio ah kan va lak. Kan Chin tuanbia thar an kan ttial piak. Khuate pakhat nih mah zah zah phaisa tam dohthlennak ah an pek hi a veikhat nak a si. Kan ni lawmnak kan chim kho lo.
Reitheitak in rian har aa khin mi GTO Chairman Pu Duh Cung le hruaitu vialte cung ah siseh, Phaisa a thawh tu Thau khuami kan unau nan zaapi cung ah siseh hi dawtnak lungthin tak tak in thilttha nan tuah nak cung ah Pathian kan pa tu nih thlachuah in pe chin ko hna seh. Zohchunh awk ttha khua nan si, nan thil tuah mi vialte kan fa le chan tiang an rak chim zungzal lai.. kan ni lawm tuk!
Nihin 01/17/2022 chun cu CNF USA Regional Committee Office ah Indiana Chin Women Fellowship (ICWF) in an hruaitu hna Pi Thong Thluai, Pi Thla Pen le Sazamah Biak Tha Hnem te siaherh nak tak tak he an rak kan leng.
CNF/A vialte le kan miphun caah thla an rak kan cam piak. Thlacamnak lawng si loin, thapek nak bia ttha ttha an kan ruah hlei ah ICWF nih CNF office runnak caah phaisa $1,000 zong an kan pek chih. Kanmah lawng si loin, kan miphun dawtu vialte nih hi thilttha an tuahnak hi nan rak i lawm cio lai ti kan zumh.
Atu lio caan bantuk ah Kan miphun vialte lungrual tein i bawmh cio a herh ning, ttantti-ttuantti kan herh ning a thar in an rak langhter. Hi ICWF kan nu le nih kan miphun caah a dang an ttuan an tuah mi pawl tampi chim ding a um rih. Kan miphun hawi tampi nih zohchunh ding ttha tak tak an si.
An thilttha tuahnak hi kan miphun vialte nih a khua kip, a hmun kip in i cawn ve cio hna uh sih..A ho hmanh tthut sawh awk kan ttha ti lo. ICWF kan nu le pawl Kan ni lawm tuk hringhran!!