Kum 2 chung ah SAC ralkap 200 kan thah khawh hna tiah CDF Kanpetlet nih a thanh
============
2021 March thla in 2023 May thla chung tiang CDF Kanpetlet le SAC ralhraang karlak ah kahdohnak voi 100 leng a chuak i SAC ralhraang minung 200 hrawng an thi cang tiah CDF Kanpetlet nih May 13 ah cathanh a chuah.
Hi kong he pehtlai in tuanvo ngeitu pakhat nih, “CDF Kanpetlet kan dirhnak hi kum hnih a tling cang. Hi kum hnih chung ah SAC he kahdohnak voi 100 leng kan tuah cang. Hi kan i tuknak chung ah SAC ralhraang 200 hrawng an thi cang. Kanmah CDF lei in kan ralkap minung 12 nih nunnak an pek ve,” tiah THP ah a chim.
Min Aung Hlaing nih uknak a laak hnu in CDF Kanpetlet sinah SAC ralkap minung 15 le palek 50 leng nih CDM an tuah tiah kan theih. CDM a tuah mi hna kong ah, “Meithal he CDM a tuah mi SAC ralkap hi minung 10 an si i meithal lo in a tuah mi hi minung 5 an si,” tiah a chimchap.
Kum hnih chung ahhin Kanpetlet peng khuami pakhat hriamngan nih a khen i a nunnak a liam. Ralhraang Council nih an tlaih hna i an thah hna ca ah sualnak ngei lo rammi 6 an nunnak a liam tiah theih a si.
Mocha thli chia May 14 ah Myanmar ram a lut kho; Mocha thli chia cu Bay of Bengal ah a thazaang a thawng tuk mi thlipi ah aa cang i, May 14 ah Myanmar ram a lut kho, suimilaam pakhat ah meng 110 thazaang in a hraang kho tiah khuacaan lei tuaktaantu hna nih an thanh. India Khuacaan lei Zung nih cun, May 14 chun ah Myanmar ram Kyaukphyu khua le Bangladesh ram Cox’s Bazar khua kar in a tan khawh i suimilaam pakhat ah a tam bik meng 109 tiang a hraang kho tiah nihin ah an thanh.
Cyclone thlipi cu nihin zanlei le thaizing (May 13) ah a thazaang a thawng chin lai i Strom Eye a langh deng tiang in a thazaang a thawng cang tiah India Khuacaan lei Zung nih a thanh.
NUG Cozah, Ministry of Humanitarian and Disaster Management (MOHADM) nih cun, May 14 zaantim ah Rakhine rili kam cu Maungtaw le Sittwe khua karlak in a lut lai tiah a ti.
Thlichia nih a ratpi mi tilet cu Sittwe khua ah pe 12, Sittwe le Kyaukphyu kar ah pe 14, Kyaukphyu le Yanbye karlak ah pe 6 in pe 8 tiang a sang kho tiah an langhter. Cu thli chia ruang ah Magwe ramthen, Bago ramthen, Yangon ramthen, Ayeyarwaddy ramthen ah suimilaam pakhat ah meng 40 tiang thli a hraang kho tiah an langhter.
Htantapin peng kahdohnak ah SAC ralhraang 20 an thi i ralbawi 3 a nung in an tlaih hna; Bago ramthen, Htantapin peng kahdohnak ah SAC ralhraang 20 an thi i SAC ralbawi pathum a nung in an tlaih hna tiah PDF ralkap pakhat chirhchan in Khin Thit Media nih a tial.
May 10, zinglei suimilaam 10:00 hrawng thawk in zanlei 5:00 tiang Htantapin peng, Nyaungpintha khuate pawng ah KNU, PDF phu komh le SAC ralhraang hna kar ah kahdohnak a chuak i ralhraang lei 20 nak tlawm lo an thi, ralbawi pathum a nung in an tlaih hna tiah theih a si.
Kahdohnak ah a thi mi SAC ralhraang ruak hna cu Nyaungpintha khuachung khuami pawl dum ah an vui hna i, ralhraang nih ngakchia pasarih tel in khuami 17 cu mei khangh in an thah hna tiah theih a si.
“May 10, zinglei 10:00 in zanlei 5:00 tiang kahdohnak voi nga a chuak i ralhraang lei 20 nak tlawm lo an thi. 10 hma an pu, ralbawi rank pathum a nung in kan tlaih hna. Ralhraang uico pawl an fah caah ngakchia 7 tel in khuami 17 mei in an khangh hna. A thi mi ralkap ruak pawl cu khuami dum chung ah an vui hna,” tiah PDF ralkap pakhat nih a chim. Credite; The Hakha Post