CDF-Hakha Nih Ralhrang, Palek le Cozah Riantuan Hna Sinah Cathanh An Chuak!

CDM Tuah A Duhmi SAC Ralkap, Palek Le Cozah Riantuan Hna Sinah CDF-Hakha Sawmnak Cathanh
===============
Sept 16 ah CDF-Hakha nih CDM tuah a duhmi SAC ralkap, palek le cozah riantuan hna sinah a tanglei bantukin sawmnak cathanh a chuah. Min Aung Hlaing le a kuttang ralbawi hna cu anmah hlawknak caah mipi sin in nawlngeihnak an lak riangmang i sualnak ngei lo mipi cu an tlaih an thah hna i an inn an hrawh piak hna.

Cu bantuk thatlonak hna cu rammi ka si timi lungput ngei in doh dingah mipi lei ah fonh a duhmi SAC ralkap, palek le cozah riantuan hna cu kan in don ko hna Kan sinah aa fonhmi hna cu laksawng kan in pek hrimhrim hna lai.

1. SAC ralhak, palek le cozah riantuan hna nih CDM an tuah ahcun chungkhar dihlak caah himnak, ti le rawl le ngandamnak lei vialte tuanvo kan in lak hna lai. 2. Meithal le kuan hna nan rak zampi khawh ahcun laksawng ah sing 50 pek nan si lai.

3. Hriamngan le a kuan hna nan rak i zampi khawh ahcun sing 100 pek nan si lai. 4. Mipi ta a simi cozah zung mawtaw hna nan rak I zampi khawh ahcun laksawng ah sing 50 pek nan si lak. Chinland Defense Force – Hakha; Pehtlaihnak – +9509764650024, +918731058986.

Mortar bomb nih inn a tlak ca ah Hakhathar sang ah nutung pakhat hma a pu. September 16, zaan suimilaam 11: 30 hrawng in Hakha khua ah meithal thawng le bomb thawng pehtlai in theih a si i, Hakhathar No. 1 sang, Lungphuntlang ah a um mi inn pakhat cu SAC lei kah mi bomb nih a tlak ca ah nutung pakhat hma a pu tiah kan theih.

“Bomb a tlak lio hi an ih lio a si i bomb a tlaknak lei hi an tikhaan lei deuh a si. An ihnak hmun ah a peh i a hnakhaw ah hma a pu. A hma cu a nunnak ca thinphaang tuk cu a si lo. A lung zong a fim cang i a thi zong a pit ngai cang. Bomb a tlak ruang ah an inn pawng hrawng zong vawlei aa vorh dih,” tiah sangmi pakhat nih a chim.

Myint Mo Kyaw ti mi Facebook account nih a tial ning ahcun, “Atu kan umnak inn (Minister pawl inn) an rak kah ca ah, ka lei a vengtu hna nih an kah ve hna. Suimilaam 11: 32 in 11:47 tiang an i kap cuahmah. Meithal lawng siloin hika lei nih mortar in pehtlai in an kah hna. A puah thawng hlat nawn in a thang…” tiah a tial.

Tu zaan ah bomb thawng hi voi 15 hrawng thieh a si i Lungphun tlang ah hin SAC lei kah mi mortar bomb tlak thawng voi nga tluk theih a si. Tu tan ah hma a pu mi min le an umnak cu himnak ruah ah kan langhter lo nak a si.
Hakhathar ah inn dang a rawk mi um le um lo theih a si rih lo.

“Inn hnih thum cu a rawk kho men. Inn hngak tu a um lo mi inn an tam pah i chim khawh a si lo. Leng zong ah kan chuak ngam lo i minung kan him le him lo lawng phone in kan i hal kho hna,” tiah sang mi pakhat nih a chim.
Tuzaan bomb le meithal a puak mi ruang ah Hakha khua ah hma a pu mi le inn a rawk mi dang an um le um lo hngalh a si rih lo. September 7 zaan zong ah SAC ralhrang lei kah mi kuan nih Hakha Chin Oo Si sangmi pakhat a khen i hma a rak pu.

CDF- Kanpetlet Kahdoh Nak Cathanh. Tuni September 16 ah Gin Due (ကျင်‌ေဒွး)khua ah thazaang chap ding in a ra mi ralhrang hna cu Magwe ramthen Lawng Sii(လောင်းရှည်) le Chin ramkulh ramri hmun pakhat ah kan mah CDF – Kanpetlet kar ah kahdoh nak a um i ralhrang le minung 7 an thi, ahliam mi an tam.

Kanmah CDF- Kanpetlet lei in a thi mi le a hliam mi kan um lo. Mipi lei zong nih a fiang rih lo mi thawpang le kahdoh nak thawng pang hna cu mizapi hmuhnak le fb cung hna ah nan langhter, nan tar nak hnga lo zaangfah kan nin nawl hna. Credit: The Hakha Post, The Chin Post