CDF Cawlcanghnak ka Lunghmui, Nunnak Tampi a Liam nain Lungdongh ding a si Lo!

US Ralkap Jonah Mang; “CDF Cawlcanghnak ka Lunghmui, Nunnak Tampi a Liam nain Lungdongh ding a si Lo”
=======
US ralkap ah ramrian a ttuan cuahmahmi kan Laimi Jonah Mang nih atulio Chinram chung SAC ralhrang a do cuahmahtu CDF a hmuhning le thazaang peknak bia pawl a chim hna.

“Atulio CDF an cawlcangh ning ka theih tikah ka lung an hmui ngai. Lai pasal tha bak an si. Nunnak zong tampi a liam nain lung dongh ding a si lo. Kan unau nunnak a pemi hna hi kan lung ah chiah in thazaang (Motivation) tu ah hmang hna usih. A dongh tiang kan doh loh ahcun an nunnak an pekmi kha zeihmanh lo a si sual lai. Teinak hmuh duh ahcun Sacrifice a hau hmasa ti hi thei hna u sih,” tiah The Chin Journal biahalnak ah a chim.

Ralhriam lei in a thawng deuhmi SAC ralhrang hi tei khawh a si ko lai nin a caan cu a rau kho, tiah a langhter chap.

“SAC ralkap hi hriamtlai pawl nih hin an tei khawh ko la tiah ka zumh. Asinain, ramdang lei bawmhnak a um lo ahcun a fawi lai lo. Aruang cu an hriamnam hmanmi hi ai dang tuk. Kanmah Lairam lei ah cun kan tei ko hna lai nain anmah umnak Kawlram (Headquarters) ah kan tei lo ahcun san a tlai lo tiah ka hmuh fawn,” tiah a chim.

SAC ralhrang tei nakding ah a caan a rau lai nain lungrual tein a dongh tiang kan doh ahcun kan tei lai. “SAC tei duh ahcun ahmasat bik ah lungrual a hau. Kan lung aa rual le kan i tinhmi a fian paoh ahcun SAC hi tei khawh hrimhrim a si ko. Caan sau ngai (years) a rau lai tiah ka ruah fawn. Cu ruang ah cun tei duh ahcun a dongh tiang lungrualte le lungsau tein pakhat le pakhat i bawmh hi a herh,” tiah a langhter chap.

Jonah Mang hi 2019 ah US ralkap ah a lut i, Italy ram US ralkap (Airborne Unit) ah kum 2 rian a rak ttuan. Italy in South Korea ram ah an tthial tthan i atulio hi South Korea ram US ralkap (12C-Bridge Crew) ah rian a ttuan lio a si. Credit: The Chin Journal

𝐋𝐮𝐧𝐠𝐥𝐚𝐰𝗺𝐧𝐚𝐤; Tutan ah Chintube nih a pekmi, Chin Humanitarian of the Year 2021 People’s Choice Award cu keimah nih ka tinco caah Chintube chairman le a ngeitu a simi. Rosie Bawitha Par cungah siseh, President Pu Vanceuuk le executive member nan dihlak cungah siseh, Chintube thazaang a petu nan dihlak cungah ka lunglawmhnak bia ka chim.

Hi bantukin ka minung hawi le miphun dawtnak thlaici a rak ka tuhtu, tleicia ka nu Pi Sui Can le ka pa Bishop Dr. CK No Chhum cungah lunglawmhnak ka chim. Sifah ah siseh, siṭhat ah siseh, a ka dirkamh zungzaltu ka nupi, Lal Rem Siami siseh, ka fale cungah siseh, unau hna nan cungah siseh kaa lawm.

Hi bantukin award tiang hmu kho dingin rian ka ṭuannak ah thazaang a ka petu, mino te ka si ko bu zongah hruaitu dirhmun tiang dir kho dingin a ka sersiamtu. Ka rianṭuan hawi nan dihlak cungah ka thinlung tak tein lunglawmhnak bia ka chim. Nanmah loin hi dirhmun hi ka phan kho lo ti kha van nolh ṭhan ka duh.

Tutan ah hi bantukin kan ram nih muihnak a tonmi lakah a mui cemmi can chung i lungfah buin rian ka ṭuannak ah a ka bawmtu le, A ka vote tu nan dihlak zong nih hin lungfah buin ka rianṭuannak thazaang nan pek i, nan ka vote mi a si ti ka theih ruangah.

Tutan ka hmuhmi laksawng siseh, pumpak cio in an ka kuatmi laksawng le tukum chung i Award ka hmuhmi vialte chungin laksawng ka hmuhmi dihlak pinah. A let khat, keimah phaisa chuah in, nanmah a ka vote tu le thla a ka campiaktu mipi nan sin i lawmhnak leiba chamnak ah.

Ralzam ka unau hna sinah ka kuat dih lai ti zong kha hi Chintube nih a tuahmi Award zan ah nan sinah lunglawmhnak van phuan ka duhmi a si. Kaa lawm. Pathian nih kan miphun umpi in, a mithmai kan pe sehlaw, rak kan veng zungzal ko seh. 𝐓𝐡𝐚𝐰𝐧𝐠 𝐓𝐡𝐚 𝐓𝐡𝐚𝐧𝐠