CBCUSA nih Ralzaam Zohkhenhnak Kong Ah Mara Cozah Upa he Tonnak An Ngei

CBCUSA nih Ralzaam Zohkhenhnak Kong Ah Mara Cozah Upa he Tonnak An Ngei
==========
SAIHA, Mizoram State, 2021 Dec 6, Nihin sml. 12:00 p.m., ah USA hram bunh Chin Baptist Church (CBCUSA) upa hna nih Mara Autonomous District Council (MADC) cozah upa hna he tonnak an ngei tiah MADC Sahai thanhnak in kan theih.
Chief Executive Member (CEM) Pu N. Zakhai (Mara Wungyichok) nih CBCUSA aiawhtu cheukhat sinah hi bantuk caan i hmuhton khawhnak he pehtlai in lawmhnak bia a chim.

Cun, CBCUSA aiawhtu Dr. Thlaawr Bawihrin, Rev. Sui Hliang Chorei (Women Director, CBCUSA), le Dr. Tial Ling (MP thimmi) hna nih Pu N. Zakhai le a tuanti hawile nih hi bantuk tonnak caan tha ngeihmi cungah lawmhnak an chim.
MADC upa hna le Mara ram mipi hna nih Ralzaam (refugee) an rak dirkamh kong hna cung ah lawmnak cu an chim cio hna. “Phone call le message/e-mail kuat tbk. lawng in a ngah lonak kong, pumpak ton a herhnak kong hna cu Chin State aiawh in lawmhnak bia rak chim an duhnak kong ah LADC (Lai) le MADC (Mara) cozah sin hna ah an rak tonnak hi a si tiin CBCUSA lei aiawhtu hna nih an chim.

Mara Ram mi zapi nih Ralzaam kong he pehtlai in an tanpi nak vialte cungah thinlung dikin in lawmhnak an chim. Hmailei caan zongah tanpi cuahmah khoh nak hnga nawlnak zong an chimchih.

MADC Hon’ble CEM Pu N. Zakhai, nih CBCUSA aiawhtu le Chin ramkulh lei biaknak upa hna sinah “India ram Mizoram State i MADC, LADC hna an rak chuak, kan unau Chin State ah kan miphun hna cu Kawl Ralkap nih hramhram uknak lak ruangah harnak tampi an tonnak hna biatak in kan tuarpi hna tiin” a kan tuar pinak a langhter.

“Nanmah upa hna le na riantuannak hna kan theih tikah kan nin upat hna, kanmah zong kan tuah khohnak kam kip in bawmh khohnak lam kan ruat peng” tiin Mara Cozah upa (Chief Minister rank) lubik N. Zakhai nih duhsaknak a hun langhter chap.

Kanmah hi cozah kan si nain tuan khohmi cu a um lo. Sihmansehlaw, MTP timi Mara Thyutlia Py (Mara Mino Bu), MSO (Mara Students Organization), Biaknak lei Khrifa Bu le Mara Ram mipi hna he i komh in bawmhnak hna ah thazaang kan chuah cio i, nihin ni tiang in tha le zaang cun ngaihchiah chawva ah Mara mipi nih lungthiang tein bawmhnak ka tuah peng mi a si.

Hi bantuk kan tuah khohnak tlawmte ah a sunsak i lawmhnak bia nan rak chim mi hi “Kan Bawipa Pathian duhning zong a si”, hmailei caan zong ah nihin nan tuah sernak nih thluachuah a tlunpi hrim lai timi zumhnak zong ka ngei. MADC ah nan rak kan tlawng mi cung zong ah keimah le ka tuanpi hawi zapi te nih Mara Ram mipi aiawh in nan cungah lawmhnak kan chim lengah hmaikal simi dirhmun ah nan pehzulh cuahmah ding in duksaknak zong kan in pek. Credit: The Chinland Post