Kahdohnak Thawngpang!
===========
Sagaing ramṭhen, Sagaing peng, Sataung khua pawng ni thum chung kahdohnak ah SAC ralkap officer telh in 30 leng an thi, tiah PDF lei nih an chim.
Sataung khua nitlaklei, Paukmataung khua le Thazin khua pawng ah June 13 in June 15 tiang kahdohnak a chuak. SAC ralkap pawl cu PDF thiamhlei ralkap tlawmte nih a thlithup in kan va kah hna, tiah Zero Guerrilla phu hruaitu Thet Kyi nih a chim.
“June 13 zing suimilam 10:00 in kahdohnak a chuak. Kan hriamnam aa thlau tuk caah a thlithup in kan kah hnanak a si. SAC ralkap an lam hruaitu pa telh in ralkap 20 leng an thi. Kanmah lei in ralkap 6 hliamhma an pu ve. SAC ralkap nih Paukma khua zong an khangh,” tiah Thet Kyi nih cun a chim chap.
“Rallam a sialmi SAC ralkap pawl hi Wetlet in Sagaing peng ah an kal. June 13 ah Sataung nitlaklei ah rallam sial in kahdohnak a chuak i, SAC ralkap 10 an thi. June 14 kahdohnak ah ralkap 7 an thi chap. June 15 kahdohnak hi a zual ngai i, ralkap lei hi 20 leng an thih pinah 20 leng hliamhma an pu. Ni thum chung kahdohnak ah SAC lei 30 leng an thi,” tiah Zero Guerrilla phu in ṭuanvo ngeitu nih Khit Thit Media ah a chim.
Dohthlennak caah phaisa kawlnak tuahmi “Myanmar Spring Film Festival Japan” cu a luancia May thla chung ah khan Japan ah a voi khatnak tuah a si i, cu phaisa kawlnak ah cun Kyats sing 2000 leng kan hmuh, tiah Film Festival tawlreltu committee sin in theih a si.
Cu Film Festival cu Japan ram ah a voi khatnak tuah a si i, May 6 in May 28 tiang Tokyo, Yokohama, Nagoya, Osaka, Gunma, Okinawa, Hokkaido ah dohthlennak he aa pehtlaimi movie 7 hmuhsaknak an tuah, tiah theih a si. Cu film festival a tlamtlin khawh nak ding ah ṭuanvo ngeitu pakhat nih cun “kum hnih leng tiang a rau cangmi dohthlennak thazaang a derlonak hi mipi pumpak cio thawng in a si.
Mizapi an thi a dai cang tiah ṭhencheunak bia a chimtu tampi an um lio ah, tutan Film Festival ah hin mipi thazaang hmuh khawh a si,” tiah a chim. Tutan an hmuhmi phaisa hi dohthlennak a tuahtu hriamtlai phu hna sin ah pekchanh a si lai, tiah The Irrawaddy nih a ṭial.
Mon ram, Ye khua, Htimaybaw hlei pawng ah mawṭaw in a rak raa mi SAC ralkap pawl an kah hna i 2 an thi tiah thawng theih a si. June 14 zaanlei sml 5:45pm hrawng ah Ye peng lei in Mawlamyaing-Ye-Dawei lam lei ah mawṭaw 2 he a rak raa mi SAC ralkap pawl cu Hninsung khua le Sanpiah khua karlak,
Htimaybaw hlei pawng ah KNLA B27, C3 nih an kah hna i mawṭaw a 2 ning in a tap i SAC ralkap 2 an thi, 3 hliam an tuar tiah theih a si. A luancia June 10 ah Mawlamyaing-Dawei-Myeik No.8 lam a zul mi mawṭaw pawl SAC ralkap thilri le an minung pawl nan phorh a si ahcun dantat nan si lai tiah KNLA B27 nih cathanh an chuah.