BREAKING; Thawngpang kan theih mi vialte lak ah mipi kan thinlung an kan suk dihtu thawngpang chia!!

Nihin Thawngpang Kan Theih Mi Vialte Lak Ah Mipi Kan Thinlung A Kan Suk Dih Tu Thawngpang Chia Cheukhat Pawl!
=======================
Karenni ram khuate pawl ah SAC ralkap nih hriamngan a kah i hngakchia telh in mipi 8 an thi, SAC nih mipi tampi an umnak khuate chungah hriamngan a kah caah hngakchia telh in Karenni mipi 8 an thi tiah Karenni Nuhrin Covo phu nih a thanh. Karenni ralkap pawl fakpi in a dohtu SAC ralkap pawl nih kahdohnak um lo piin mipi pawl an umnak khuate chungah hriamngan a kah hramhram tiah theih a si.

“September thla chungah SAC ralkap kahmi hriamngan nih a khen ruangah mipi 8 an thi cang. Cu chungah hngakchia 3, mino 1 an i tel. Adang cu kum upa cang mi an si. SAC ralkap nih an kahmi hriamngan pawl hi kahdoh a chuahnak hmunhma pawl nak in kahdohnak a chuah lo caan zinglei le zaanlei deuh ah an kah caah Crime Against Humanity a buar hrimhrim kha hmuh khawh a si” tiah Karenni ram Nuhrin Covo phu Director Banya Khung Aung nih a chim.

September 28 zaan ah SAC ralkap nih hriamngan a kah i Demoso peng biakinn ah ca a cawng liomi hngakchia 1 hliam a tuar bantuk in September 27 chun zongah Loikaw, Konetha khuate ah a ummi nu pakhat cu SAC ralkap hriamngan nih a khen caah a thi.

Manle Khua Ah Phungki Telhin Minung 3 An Tlaih Hna, Tualchungmi Cu Phaisa in An Tlanhter Hna, Sagaing ramṭhen Indaw peng Manle khua cu nihin September ni 29 zinglei ah SAC ralkap pawl cu meithal puahpah in an rak lut i phungki pakhat le tualchungmi 3 an tlaih hna tiah theih a si. Cu an tlaihmi hna cu phaisa in rak tlanh uh tiah SAC nih tualchungmi hna cu thawng an thanh hna tiah theih a si.

SAC ralkap pawl cu Manle khuami a dam lo mi mino pakhat, Sii sayamah pahnih le phungki pakhat cu an tlaih hna i tualchungmi a dang cu a himnak ah an zaam dih tiah theih a si. Zinglei ah Tanbu (တန်ဘို) khua le Laynaung(လယ်နောင်)kar ah kahdohnak a chuah i tualchung hriamtlaiphu hna nih bomb in an kahdoh hna tiah theih a si. Cu kahdoh nak ahcun SAC ralkap lei a thi le aa hliam mi cu kan thei kho lo nain tualchung hriamtlaiphu lei in ralkap 2 an nunnak liam tiah theih a si.

Yangon Khuachungah Seitka (ဆိုက်ကား) Khaltu Pakhat Le Mino Pahnih Kahthah An Tong, Yangon khuachung Pabedan Mahar Thein Taw Gyi ah nihin September ni 29 zaanlei ah SAC ralkap pakhat kahthah a tong tiah theih a si. Cu SAC ralkap pakhat kahthah a ton hnu ah SAC ralkap pawl nih Seitka khaltu pakhat le mino pahnih cu an tlaih hna i an kahthah hna, nu pakhat zong kuan nih a khen caah hliam a tuar tiah mithmu tu hna nih an chim.

Mithmutu pakhat nih a chimnak ahcun Seitka cungin mino pakhat nih meithal aa chuah i SAC ralkap pakhat cu a kah i a hmunah a thi colh, cu hnu ah SAC ralkap adang pawl nih Seitka khaltu le mino pahnih cu an tlaih hna hnu ah an kahthah hna, cun nu pakhat zong kuan nih a khen i hliam a tuar, lam zong SAC ralkap nih an phih dih i checkhlatnak an tuah tiah a chim.

Nikhat chungah SAC ralkap chungtel 70 leng an thi, 13 nih hliam an tuar-NUG, September 28, nikhat chung a cangmi kahdohnak ah SAC ralkap chungtel 70 leng an thi tiah NUG nih cathanh an chuah. A tu i kan langhter mi SAC ralkap a thimi zat langhtermi nak in a leng ah a thimi an tamdeuh kho tiah an langhter.

Hramhram uknak latu SAC ralkap hna nih mizapi cungah thahnawnnak le hremnak an tuahmi ah mipi lei zong nih man nunnak a himnak ding caah mah le mah i runvennak an tuah. NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah an langhter. PDF le tualchung hriamtlai phu lei in minung 1,500 luan hrawng an nunnak a liam tiah NUG caan karlak president Duwa Lashi La nih a chim.

Monywa pengah SAC ralkap nih tualchung mi pakhat le PDF chungtel pakhat an thah hna, Sagaing ramṭhen, Monywa peng Htanaungtaw(ထနောင်းတော) khua pawngah SAC ralkap nih rian in a rak ṭinmi tualchung mi pakhat le tualchung hriamtlai phu chungtel pakhat cu an kah thah hna hnu ah khuachung mipi umnak inn 7 hrawng an khanghpiak hna tiah tualchung media nih a langhter.

September 27, zinglei suimilam 8:00 hrawngah Monywa peng Tawpuh Myauk(တောပုမြောက်) khua in SAC ralkap hna cu motor 3 in minung thazaang tampi he Htanaungtaw(ထနောင်းတော) chaklei khua ah lut in tualchung mi umnak inn 4 an khanghpiak hna tiah theih a si. SAC ralkap hna nih cun khuachung tualchung umnak inn hna ah lut in an thil an thlokpiak dih hna, an duhmi thil an i lak tiah khuami nih an chim.

Zaanlei suimilam 5:00 hrawng in Monywa in rianṭuan khawh ah a rak kir mi Ko Aung Kyaw Min cu Htanaungtaw(ထနောင်းတော) pawng lampi ah an kahthah. Cu ka pawng ahcun MPDF chungtel pakhat cu SAC ralkap nih an tlaih i an hrem hnu ah an thah tiah Monywa-Amyint Road thawngdik thanhtu nih an langhter. Cu hnu ah Htanaungtaw(ထနောင်းတော) khuami minung 40 nak tlawnlo cu SAC ralkap hna nih an tlaih hna tiah khuami nih an chim.

Hakha ah siangakchia nu pakhat sinin Covid zawtnak an hmuh caah October 3 tiang sianginn an khar lai, September 27, ni ah Hakha siangsangrun sianginn pakhat ah siangakchia nu pakhat sin in Covid zawtnak hrik an hmuh caah Hakha khuachung sianginn hna cu October 3 tiang an khar lai tiah theih a si.

” Siangakchia pakhat sinin Covid zawtnak hrik hmuh a si caah sianginn kan khar, Home study tuah dingin sayamah nih a kan cah, cun a ra laimi zarhchung October 4 ah exam tuahding a si caah cu ni ahcun sianginn kai cio dingin an kan chinh, a tu hi cu saya/sayamah te zong sianginn an kai rua lo” tiah siangakchia pakhat nih a chim. A luancia July 28 ni Hakha no.1 siangsangrun ah puahkehnak a rak chuah caah siangakchia cheukhat cu sianginn an kai ti lo nain, September thla hnu in hin sianginn kaimi anmah kel te an si ṭhan tiah theih a si.

“Sianginn cu a caan kel tein kan kai ko, naite ah siangngakchia minung 2 an zaw i siikhan an i zohyer ah pakhat sin in Covid zawtnak hrik an hmuh caah sianginn kan khar, mah le inn cio ah home study an kan tuahter, sayamah te nih exam tuahding ni ah sianginn kai ṭhan ding in an kan chimh” tiah siangakchia pakhat nih a chim.

A tulio Hakha khuachung ah sianginn a kaimi hi 2000 hrawng an si i, SAC ralkap kuttang um education department i cawnning thar he ca an cawng. Hakha khuachung ah siangsangrun 4 a um i cu chung ah cun siangsangrun 2 lawng sianginn an on khawh tiah theih a si.

Thailand Ram Ah Myanmar Mi 95 A Tlaih Than Hna, Thailand ram Kanchanaburi pengkomh chungah phungning loin a lutmi Myanmar mi 95 an tlaih than hna tiah theih a si. September 28 ni zinglei ah Thailand palik checkhlatnak a tuah i mawtaw pakhat cungah 21, a dang pakhat cungah 18 tiin an tlaih hna hi a si. Cupinah hmundang pakhat ah minung 39 an tlaihchap hna daah a zapi 95 an si tiah theih a si. Kawlram in Thailand Ramah phungninglo in luh dingah a tuahpiak tu puaisa an um i phaisa tampi an laak hna tiah theih a si.

India ram ah Bible sianginn kai ding ai timmi Chin pa pakhat damlonak in a nunnak a liam, India ram, Andhra ramkulh ah Bible sianginn kai ding in a phanmi Chin ramkulh Matupi peng (Yangon khuasa) mi mino Salai Thang San Maung(kum 21) cu nihin September 28 zaanlei ah damlonak in India ram Bangalore ah a nunnak a liam tiah theih a si.

Salai Thang San Maung cu tukum chungah India ram a phanmi a si, Bible sianginn kai ding in timhtuahnak a ngei nain, Kal fah zawtnak le a Thin a ṭhatlo caah sianginn zong ṭha tein a kai kho lo. Sii i thlopnak phaisa tlamtlinlo ruang ah sii lei thlopbulnak aa tuah kho lo tiah theih a si. Salai Thang San Maung cu Nihin September 28, zaan ah a nu le pa umnak Yangon ah kir ding in vanlawng ticket a cawk cang nain, ruahlotuk in nihin September 28 zaan ah a nunnak a liam tiah theih a si.

September thlakhat chungah Covid-19 zawtnak in minung 24 nunnak liam, SAC ralkap kuttang um ngandamnak lei vuanci zung nih checkhlatnak an tuahning ah September 1 in September 28 tiang Covid-19 zawtnak ruangah minung 24 nunnak a liamcang i, minung 7,138 nih cu zawtnak an i chawnh tiah theih a si. Nizaan September 28, nikhat chungah Covid-19 zawtnak hmuhmi dihlak hi minung 381 an si i cuchung ah minung 2 nunnak a liam tiah SAC ralkap kuttang um ngandamnak zung nih an thanh.

2022 January 28 in September 19 tiang Covid-19 zawtnak ruangah nunnak liammi 138 tiang an phan. Zawtnak ruangah nunnak liammi hna chung in zatuak 70 cu zunthlum, thikai, lung zawtnak, thin lei zawtnak, kal lei zawtnak, cuap lei zawtnak le cancer zawtnak a rak ngeimi an si tiah SAC kuttang um ngandamnak lei zung nih cun an langhter.

NLD cozah chan ah cun Covid-19 zawtnak a ngei tiah fehter mi hna cu a dang tein thlopbul an si i, zawtnak a ngeimi chungkhar cu Quarantine ah umter an si nain, SAC ralkap nih hramhram uknak an lak hnuah cubantuk i zohkhenhning cu an tuah ti lo.

Cu SAC ralkap pawl cu thazaang 175 hrawng an si , September ni 28 lio zongah Aungkone(အောင်းကုန်း)khua inn 4 an khangh pinah mino pakhat zong an rak thah bal cang. Cun Indaw le Maeya kar ah tualchung hramtlaiphu he an rak i kap i ralphaw ah Hinnu (ဟင်းနု) khuami pakhat cu an rak tlaih i an thah beh tiah theih a si.

Matupi khuachung ah meithal puahthawng a thang, Chin ramkulh, Matupi le Hpanaing khua kar ah nihin September 29, zaanlei suimilam 6:50 hrawng ah meithal puahthawng a thang i suimilam 7:00 tiang ah thawngpang a dai rihlo tiah tualchung mi nih an chim.

Matupi peng a luancia ni tlawmpal ah khan SAC ralkap le tualchung hriamtlai phu kar kahdohnak a chuak i, September 25 ni a cangmi kahdohnak ah SAC ralkap lei minung 4 an thi, 8 nih hliamhma an rak tuar tiah theih a si. Cun September 27, ni kahdohnak zongah SAC ralkap lei in minung 4 an thi ṭhan, minung 6 nih hliamhma an tuar tiah CDF-Matupi nih cathanh an rak chuah.

Matupi khua chung lamthluan ah, SAC nih Thantar a senmi an phun hna!! Chin ramkulh, Matupi khua chung lam thluan ah SAC nih Thantar a senmi an phun tiah theih a si. A luancia September 20 thokin Mindat khuachung lamthluan ah cun cu Thantar a senmi cu an phun cang. Cun Paletwa khua lei lam zongah, cu Thantar cu an phun ve tiah theih a si.
Hakha ah cun Thantar a senmi cu an phun lo nain i thuhnak khor ni fatin in an cawh tiah theih a si.

Cu Thantar a senmi an phun mi cu, hihi cu SAC nih khuachung in khualeng nan chuah ahcun kan in kah hna lai ti langhternak caah an phun mi a si tiin bia chokvai tampi kan theih tiah khuami hna nih an chim. SAC nih hi ti bantukin Thantar a senmi an phunnak cu hi hmun hi kan i hmuitinhnak hmun a si an ti duhnak zong a si kho men tiah CDF-Matupi in tuanvo ngeitu pakhat nih cun a chim i, cu kong he pehtlaiin CDF-Matupi sin ah zeihmanh theihternak le ralrin peknak an tuah hna lonak kong zong a chim.