Tedim Peng, Taingen Khua Kahdohnak Ah SAC Ralkap 15 An Thi
===================
Chin ramkulh, Tedim peng, Taingen khua SAC ralkap sakhan cu Chin ralkap nih nizaan July 11 zinglei ah an va kah hna i cu kahdohnak ah cun SAC ralkap 15 an thi, tiah CDF CDM SIYIN in ṭuanvo ngeitu pakhat nih Delta News Agency ah fehternak he a chim.
“SAC ralkap umnak sakhan chung tiang kan luhhnawh hna i, ruak 15 kan hmuh, an hriam kan laak hnu kan chuahpah ah vanlawng nih an kan kah ruangah kanmah lei in ralkap 4 nunnak a liam i, kan laak ciami hriam zong kan thlak ṭhan,” tiah ṭuanvo ngeitu nih cun a chim.
Chin ralkap lei in nunnak a liam mi hna cu CDF CDM SIYIN in ralkap pakhat, PDF Zoland in pakhat, Kalay PDF in pakhat le KKG B7 chungtel pakhat an si. Taingen khua SAC ralkap umnak sakhan cu CDF CDM SIYIN, PDF Zoland, CNDF, TCDF, KKG B7, PDA le Kalay PDF S2 phufonh nih July 11, zinglei suimilam 5:30 hrawng in chun 12 tiang, suimilam 6 chung an kah hna.
Taingen sakhan ah a ummi palik le SAC ralkap hi thazaang 40 in 60 kar an si lai tiah zumh a si. “SAC ralkap hna umnak sakhan cu laak ding tiang in timhtuahnak kan ngei i an sakhan chung tiang zong kan lut kho nain kan i kah lio ah kan kuanfang nih a kan dihtak, hriamnam zong kan i tinzawh lo ruangah harsatnak tete kan tong,” tiah CDF CDM SIYIN in ṭuanvo ngeitu nih cun a chim.
Tutan kahdohnak a chuahnak khua hi a luancia June 30 lio ah, mipi sinah a hlankan in ralrinnak pek an si caah kahdohnak ruangah tualchung mi hliamhma tuar an um lo, tiah a chimchap. Chin ramkulh Tedim peng Taingen khua ah kahdohnak a chuak mi cu Kalaymyo ralhrang sakhan in an bawmh nak hna hriamngan cu Taungphila le Kyu-tung-pin sang chungah a tlak caah sangchung mi upa pakhat a nunnak a liam tiah kan theih.
July 11 zinglei suimilam 7 tluk ah Taingen khua ralhrang le mipi ralkap kar kahdohnak a chuak mi cu Kalaymyo khua chung ralhrang sakhan khah-lah-yah 228 le hramngan tlaitu Battalion 365 hna nih pehzulh in hriamngan an kah mi chungin 2 cu Kalaymyo sangchung ah an tla.
“Ralhrang hriamngan kah mi cu Taungphila sang chungah a tlak caah kum 50 tluk nu upa pakhat a thi, a thi mi a tapa pakhat zong a taangah hliamhma a tuar ve caah aa thlop lio a si.” tiah sangchung mi pakhat nih a chim.
Kyu-tung-pin sangchung ah a tla mi tu cu minung aa hliam mi an um lo nain sii khan pawngah a tlak caah thilri cheukhat, motor cycle le hriamngan nih inn a peh mi tu cu a um.
Taingen khua kahdoh nak cu Kalaymyo khua chung ralhrang nih zinglei suimilam 6 in zanlei 4 tiangah hriamngan voi 20 in an bawmh hna. Hi kahdohnak ruangah SAC ralhrang a thimi le hliam tuar an tam tiah kan theih.
Vawlei cung tlangsang bik Everest tlaangkam ah Helicopter pakhat a tlak caah a chung um mi minung 6 an thi tiah Nepal ram cozah nih an feh ter. Manang Air nih a ngeih mi Helicopter cu Nepal ram mi Pilot pakhat nih a mawngh i Mexico ram mi minung 5 he July 12 ni zinglei ah Everest tlaang kam ah aa dawh ngai mi Vur tlaang zohding ah an kal hi a si.
Mah hna pawl cu Solukhumbu district in an i thawh i an zoh duh mi tlaang an zoh dih hnu ah Kathmandu khuapi lei ah an khuallam peh dingin timhtuahnak an rak ngei. Asi nain an i thawh minute 10 hnu ah pehtlaihnak a cat.
Mibawmchan tu hna nih kawlhawl nak an tuah colh hna tik ah Everest tlang kam ah Helicoter a rawk mi cheukhat an hmuh hnu in aa cit mi minung 6 zong an thi tiah an feh ter. A thi mi ruak 6 zong an lak hna i Solukhumbu siizung ah an kal pi hna. Helicopter hi zeiruang ah dah a tlak timi an hngal kho rih lo tiah kan theih.