BREAKING!! SAC ralhrang nih NLD Hluttaw Palai Hlun Le A Chungkhar Hna Cu!!

SAC Ralhrang Nih Homalin Pengkulh NLD Hluttaw Hlun Le A Chungkhar An Tlaih Hna!!
=====================
Sagaing ramthen, Monywa khuapi ah aa dor mi Homalin pengkulh NLD party ramthen Hluttaw Palai hlun U Kyaw Swe Win le a chungkhar hna cu, nizaan October ni 5 zaan lei sangah Monywa khuapi ah SAC ralhrang nih an tlaih hna tiah theih a si.

“Nizaan zaan suimilam pa 10:00 ah an tlaih hna. An nu le a fa zong an i kal pi hna. U Kyaw Swe Win cu Homalin no.1 mee hmun in NLD party ramthen Hluttaw palai hmunah teinak a hmu mi a si. Shani miphun mino pakhat a si. tiah Monywa ramkhel tuahtu pawl nih an chim.

Hluttaw Palai U Kyaw Swe Win an tlaih nak kong he pehtlai in Chin Dwin Tiva, Shani Social Media chimphuan ngeitu pakhat nih,” Homalin pengkulh ah pohma-505 in tlaih dingin cathanh an chuah mi ah U Kyaw Swe Win zong aa tel ve. Cu kong he pehtlai in an tlaih mi a si kho. An tlaih lio ah an nu le a fa zong an i tel tiah theih a si,

Tuni zaan lei tiangah ah cun pehtlaih khawh zong an si lo.” tiah a chim. U Kyaw Swe Win an tlaihnak kong he pehtlai in Monywa pengkomh humhimtu phu sinah pehtlaih nak ngeih an si ko nain pehtlaih khawh an si lo tiah VOM nih a tial.

Relchap, Mandalay Mi An Tamnak Hmun Ah Tthilchuhnak A Chuak, Nu Pahnih Thah An Tong, Mandalay, mi ai chawkhlatmi an tamnak no.72 lam, 118/119 lam kar ah nihin October 6, zinglei suimilam 4:00 hrawng ah sidawr pakhat cu misual nih an luhhnawh hna i nu pahnih a thah hna tiah tualchung mi nih an chim. Thah a tongmi nu pahnih hna hi chungkhat an si tiah theih a si. Cu misual nih cun sui le phaisa zeimawzat ai kalpi tiah theih a si.

Mi nunnak lak in thil a firtu mi sualpa cu kan tlaihkhawh cang tiah SAC ralkap le palik lei ṭang media hna nih an langhter na in, misual pa tlaihkhih a tonnak kong ah fehter khawh a si rih lo. Mandalay khuachung lampi ah thil chuhnak, misial damiah nih mi nunnak thah le inn cheukhat luhhnawh in thil firpiak tibantuk cu nitin ngawt in a cang tiah theih a si.

Thailand Ram Tualleng Sianginn Luhhnawh In Kah An Tong, Ngakchia Telhin Minung 36 An Thi, Thailand, Nong Bua Lamphu pengkomh chung tualleng sianginn pakhat cu palik bawi a rak ṭuan balmi pakhat nih luhhnawh in meithal in a kah hna ruangah ngakchia telhin minung 36 an thi tiah theih a si. Meithal in a kaptu pa nih cun a nupi le a fa zong a kah chih hna tiah Thailand media nih an langhter.

Meithal kahnak ruangah nunnak liammi cazin hi a tutiang ah minung 36 an si, cuchung ah cun ngakchia 24 an i tel tiah theih a si. Cun hliamhma tuarmi hi minung 12 an si i, pengkomh sizung ah thlopbulnak an tuah hna tiah theih a si. Meithal a kaptu hi palik bawi a rak ṭuan balmi a si i, meithal in a kah hna hnu ah a nupi le a fa zong a kahthah hna i a zaam, amah le amah a nunnak zong ai la tiah theih a si.

Meithal a kaptu hi palik bawi a rak ṭuan balmi Panya Kamrab(kum 34) a si i, rithaisi cawk zuarnak kong ah pehtlaihnak a ngeimi a si caah a reng in chuah le palik sinak in rianchuah a rak tongmi a si tiah theih a si.

Khin U Peng Ah SAC Ralkap Nih Motor 127 Le Khualtlawng Mi 300 Leng Zarhkhat Chung An Hren Cang Hna, Sagaing ramṭhen, Khin U peng ah SAC ralkap nih lam an kham caah motor 127 le khualtlawng mi 300 leng cu, zarhkhat leng an hren cang hna, tiah tualchung mi hna nih an chim.

Shwe Bo pengkomh Khin U peng Ye U-Nyaungpinkyi Suh-Nyaungpinthar-Shwe Bo motor lampi cu SAC ralkap nih, a luancia September 30 in lam cu thetse tom in an kham caah Ye U-Shwe Bo lam in a kalmi motor 127 le khualtlawng mi 300 leng cu zarhkhat leng an hren cang hna, tiah theih a si. “Hren a tongmi khualtlawng 300 leng cu pawngkam khuami hna nih rawl voikhat ei ah kyats 1,000 in an zuarh hna. A lak in rawl a petu zong an um,” tiah Khin U khuami pakhat nih a chim.

SAC ralkap nih Khin U peng cu pehtlaihnak, eidin le lam an phih hna i, Kandaw in Tikone(ကန်တော်, သီးကုန်း) khua karlak lam vialte zong an phih dih. Inn hmai ah an chiahmi cycle hna zong pakhat hmanh tang loin SAC ralkap nih cycle 60 leng an lakpiak dih hna. Liecence a ummi cu kyats sing 2 in an tlanhter hna. Liecence a um lomi cu an pe ti hna lo, tiah theih a si.

“Khin U peng cheukhat hmun ah cun datsi, chiti le eidin dangdang hna zong a lut kho ti lo. SAC ralkap nih facang, i pehtlaihnak, tangka, um kalnak lam hna cu phih dih an i tim,” tiah tualchung mi hna nih an chim.

Janpan Rammi Hmanthlak Thiam Kubota Cu SAC Nih Thong Kum 10 Thlak Dingin Bia An Khiahpiak, Yangon ramṭhen, Taungdagon peng ah hmanthlak thiam(Filmmaker) Toru Kubota cu, SAC ralkap uk duhlonak a langhtertu hna he a luancia July 30 ah an rak tlaih hna i, nizaan October 5 ah SAC nih thong kum 10 thlak dingin bia an khiahpiak, tiah theih a si.

Janpan Media cheukhat nih, Toru Kubota cu Yangon ramṭhen, Taungdagon peng ah a luancia July 30 ah ralkap uk duhlonak a langhtertu hna he hmunkhat ah SAC ralkap nih an rak tlaih hna, tiah an ṭial. Toru Kubota cu electronic pehtlaihnak upadi in taza an cuai i kum 10 thong thlak ding in bia an khiahpiak. Cun Lah Wah Kah upadi phung a buar caah dantatnak an tuah rih, tiah Janpan Media cheukhat nih cun an langhter.

Rakhine Ramkulh Ah SAC Ralkap Nih Anmah An Hawile Ralkap Lila An Tlaih Hna, Rakhine ramkulh, Kyauktaw peng Kansaung(ကန်စောင့်) tlang ah umhmun khuarmi Khah Mah Yah 539 Battalion chungin SAC ralkap 12 cu, nizaan October 5 zaanlei ah anmah Battalion chung ralkap lila nih an tlaih hna, tiah theih a si.

Nihin October 6 ah SAC ralkap 3 cu Sittwe(စစ်တွေ) khua MABE Battalion ah an kuat hna i, a tangmi ralkap 9 cu a dang Battalion ah an hren hna, tiah tlaih a tongmi ralkap he aa naihniammi sinin theih a si. “Ralkap 12 an tlaih hna pinah an nupi le zong an tlaih chih hna, an fale lawng an luat. Zeiruangah dah an tlaih hna ti cu kan hngal lo. Kan lungre a thei tuk ve,” tiah a chim chap. Cu pinah nizan October 5 ah Ann khua palik sakhan in palik 10 cu SAC ralkap nih an tlaih hna, tiah palik he naihniam in a ummi hna nih an chim.

Shwe Bo-Mandalay Lam Ah Umhmun Khuar Ai Timmi SAC Ralkap Cu Hriamngan In Kah An Ton Caah 7 An Thi, Sagaing ramṭhen, Walet peng Shwe Bo-Mandalay lam cung um Sai Naing Gyi(စိုင်နိုင်ကြီး) khua ah SAC ralkap cu, umhmun khuar ding in an i timhtuah lioah hriamngan in kan kah hna i, SAC ralkap 5, officer 1 le pyusawhti 1 an thi, tiah Burma Rangers (ShweBo) nih an thanh.

October 4 ah Walet peng Sai Naing Gyi khua ah SAC ralkap cu umhmun khuar ding in an i timhtuah lioah Burma Rangers (ShweBo) le ṭangṭi phu Nattaung(နတ်တောင်) Naga phu hna i bawm in 60mm hriamngan in an kah hna caah SAC ralkap officer 1 telh in ralkap 6 le pyusawhti 1 an thi, tiah theih a si.

Cu kahdohnak ah SAC ralkap hliamhma a pumi an tam i, SAC ralkap pawl cu Shwe Bo lei ah an kir. Hriamngan in kah an ton hnuah Sai Naing Gyi khuami 20 leng an tlaih hna i mei in an khangh hna, tiah theih a si. Sai Naing Gyi khua pawng Sai Naing kuaih ah SAC ralkap pawl cu atu le atu bomb puahhnawh an tong, tiah tualchung mi hna nih an chim.

Thailand Ram Thach Pengkomh Ah Myanmar Rammi 14 Tlaih An Tong, Thailand ram Thach(တာခ့်) pengkomh ah ramri tan a rami Myanmar rammi 14 cu, niazan October 5 zinglei ah kan tlaih hna, tiah No.35 Thai ramri hngak ralkap nih cathanh an chuah. Melamat hmunram in zinglei sml 1:00 ah thawng kan theih i, Myanmar rammi 14 cu ramlak an kal cuahmah lioah kan tlaih hna, tiah an langhter.

An tlaih hna lioah Thai agent nih a zamtak hna. Tlaih a tongmi hna lakah pa 10 le nu 4 an i tel, Karen ramkulh Ba An(ဘားအံ) khuami an si. Myawaddy khua pawng Thaungyin(သောင်ရင်း) tiva cu tilawng in an tan hnuah anmah don dingin motor a umnak lei ah ke in an kal lioah an tlaih hna hi a si, tiah theih a si.

Tlaih a tongmi hna cu Thailand ram khuapi Bangkok ah rianṭuan ding in aa thawhmi an si i, minung pakhat nih agent sinah Thai Batch 20,000 cio an pek, tiah theih a si. SAC nih nawlngeihnak an lak ruangah ramchung ah rianṭuan awk a har pinah dollar man a kai tuk caah Myanmar rammi hna cu, kyats sing 15 in sing 40 hrawng dih in Malaysia le Thailand ah a kalmi an tam hi a si.

Min Aung Hlaing Nih Nawlngeihnak A Lak Ruangah Puma Energy Companny Cu Myanmar Ram In An Chuak Cang, SAC hruaitu Min Aung Hlaing nih, nawlngeihnak a lak ruangah Puma Energy Companny nih datsi le vanlawng diesel cawk zuarnak rian vialte a tuahmi cu kaltak in Myanmar ram kan chuah tak cang, tiah cathanh an chuah.

Singapore hrambunh Trafigura Energy Companny kuttang Puma Energy cu, Myanmar ram ah chawleh chawhrawlnak a tuahmi vialte zuar dih ding in minsen a thut cang. Puma Energy Asia Sun le National Energy Puma Aviation Services (NEPAS) hna telh in Puma Energy nih a ngeihmi share vialte zong a zuar dih i, Myanmar ram a chuah tak cang lai, tiah theih a si.

Puma cu Myanmar ram chungah datsi le vanlawng diesel tam bik a phak tertu a si. Puma Energy Companny cu SAC nih nawlngeihnak an lak hnu 2021 in an rian vialte an ngol i, kum 2022 ah Myanmar ram an chuah tak hi a si.

Tedim Khua Hrambunh 269 Battalion Ralkap Nih Bomb An Phummi A Puah Ruangah Pa Pakhat A Nunnak A Liam, Nu Pakhat Hliamhma A Pu, Chin ramkulh, Tedim khua um 269 Battalion ralkap nih bomb an phummi a puah caah pa pakhat cu, October 3 zaan sml 9:00 hrawng ah a nunnak a liam, nu pakhat zong hliamhma a pu, tiah theih a si.

“Zaan sml 9:45 tluk ah bomb a puak i pa pakhat cu a hmun ah a thi colh. Nu pakhat tu cu hliamhma a pu i Kalaymyo ralkap sii-inn ihkhun 100 umnak ah an kalpi. Pa pakhat a thimi ruak tu cu an vui cang,” tiah tualchung mi pakhat nih a chim.

A thimi pa cu Tedim khua Sakaw lam sang ummi San Chu rawl dawr ngeitu a vapa a si i, hliamhma pumi nu zong hi dawr ngeitu nu i a nau a si ve. Puahkehnak kong he pehtlaiin tualchung mi hna nih cun 269 Battalion ralkap nih an hmanhmi bomb a si lai, tiah an zumh. Tualchung mi cheukhat nih a thimi pa hi SAC ralkap pension Captain pakhat a si, tiah an chim ko nain fiang tein hngalh a si lo.

Ye Khua Ah SAC Ralkap Kuttang Rianṭuantu Khuabawipa Kahthah A Tong, Mon ramkulh, Ye khua Thiri Zeyar(သီရိဇေယျာ) sang ah SAC kuttang rianṭuantu khuabawipa Min Thein cu, nizaan October 5 zing sml 10:00 hrawngah kahthah a tong, tiah tualchung mi hna nih an chim. Khuabawi Min Thein cu a inn hmai lakphak dawr a ṭhut lioah MSRO phu nih meithal in an kahthah hi a si.

MSRO ṭuanvo ngeitu Ar Kah nih, “Khuabawi Min Thein cu SAC ralkap he i bawm in tualchung mi cu an tlerh lengmang hna caah kan kahthah,” tiah a chim. Min Thein cu a luancia kum 2010 lio in khuabawi a rak ṭuanmi a si i, SAC nih nawlngeihnak an lak hnu in ralkap he i bawm in rian a ṭuanmi a si. Anih hi SAC ralkap thawng petu dalan minthang a si, tiah theih a si. Crd-The Chin Post