Ramṭhen Hmun Thum Ah Vanral I Vennak Ding Bomb Khor 1000 Leng Kan Cawh Cang Tiah NUG Nih An Thanh
=====================
SAC nih Myanmar ram hmun tampi ah vanlawng in kahdohnak a tuah lengmang ruangah, Sagaing ramṭhen Magway ramṭhen le Taningtharyi ramṭhen ah tualchung mipi hna umnak sianginn pawng hrawng ah van ral i vennak ding ca ah bomb khor 1000 hrawng an i cawh cang.
Siqngngakchia hna cacawnnak hmunhma le sianginn umnak hmun ah van ral le hriamngan ral in i runvennak ding ah khor 835 kan cawh cang, tiah NUG Ministry of Humanitarian Affairs and Disaster Management (MOHADM) nih an thanh.
“Atu ah cun SAC ralkap nih vawlei lei nakin van lei kahdohnak hi an hman deuh cang. Vanlawng in bomb a thlak i,
kahdohnak a tuah hnu ah tang lei in ralkap nih rallam an rak sial ve, cucaah a si khawh chung in kanmah lei kan himnak ding ca ah timhcianak kan ngeih ve a herh,” tiah Sagaing ramṭhen chung um mipi ralkap pakhat nih a chim.
A luancia June thla chung ah khan Sagaing ramṭhen, Magway ramṭhen le Taningtharyi ramṭhen chung ah bomb khor 339 cawhpiak an si i bomb khor cawh ciami dihlak hi 1175 a si, tiah NUG nih a thanh.
SAC nih tualchung mi hna umnak zong hrial lo in vanlawng in kahdohnak a tuah caah mipi nih van ral i vennak tuah a herh. Cucaah ralhrial mi hna caah caan karlak i dornak bomb khor cu bawmchantu hna thazaang he sianginn lawng siloin ralhrial umnak sakhan hna zong ah kan cawh khawh cang, tiah an langhter.
Nihin July 4 ah tuahmi a voi 22nak NUG cozah meeting ah SAC tank 2 a hrawktu Chin ralkap phu cu NUG nih kyats sing 4,000 lawmhpinak laksawng a pek, tiah theih a si. “A luancia April 13 lio ah Chin ralkap ṭangṭi phu hna nih Hakha peng Chuncung khua pawng ah SAC ralkap Tank pahnih telh in an motor vialte an rak hrawh khawh dih thawng kan rak theih tikah kan khuaruah a har ngaingai.
Lawmh zong kan i lawm i dohthlennak ah kan tha a tlung chinchin,” tiah NUG Prime Minister Mahn Win Khaing Than nih a chim. Hi bantuk teinnak nganpi a kan hmuhpiak khotu Chin ralkap ṭangṭi phu hna telh in SAC nih nawlngeihnak an lak thawk in thinlung thazaang le nunnak tiang pek in SAC ralkap a dohtu Chin miphun dihlak upatnak kan in pek hna, tiah NUG Prime Minister Mahn Win Khaing Than nih cun a chim.
Chin ralkap phu hna nih SAC ralkap Tank pahnih an hrawhmi cu fahternak he an chuahpi i chekhlattu hna nih fehternak an tuah. Cu hnu ah phaisa kyats sing 4,000 cu CNF/CNA+CDAs ṭuanvo ngeitu hna sinah kan pek hna, tiah NUG nih an thanh.