Breaking; Nihin kan Halkha khualipi thawngpang vun theih cu dah a poi tuk e!!

East Lairam Khualipi Hakha Ah Christmas Le Kumthar Tuah A Si Lai Lo
============================
Hakha Christian Minister’s Fellowship nih 2022 Christmas ( 25 Dipa) le Kum Thar ( 2023 Tangkawng 1) tuahnak kong ah HCMF cu (2022/9/11, UPC ah tuahmi) biachahnak an ngeimi cu Khrihfabu kip nih zulh cio dingin HCMF nih Khrihfabu kip sinah ca an pek hna.

Kan ram sining ruangah Christmas le Kum Thar hi kan tuah khawh lo nak kum 2 a si cang. Tukum zong kan caih than tikah dohthlennak caah riantuan cuahmah lio a si i hi lio ah sathah in sunhhlei tuah hi cu ahohmanh kan i nuam hrimhrim lai lo. A phunphun in khua kan ruah tikah a luancia kum bantukin pumhnak le Pathian thangthatnak in Biakinn ah kan tuah cio hi a tha bik ko tiah kan ruah. Cucaah kan dihlak theihthiam bu in le a tanglei bantuk hin zul cio hna usih tiah bia kan chah.

Tukum 2022 Christmas le Kum Thar cu ( sathah le rawldumtinak) in tuah lo ding. Christmas le Kum Thar ni ah Biakinn cio ah pumhnak le thangthatnak tu hlunghlai te’n tuah cio dingin kan lung a tling. Biakinn/sang le veng zongah a bu pi’n sathah/rawldumtinak tuah rih lo ding. Biakinn chung cu mahle duhning cio in tamhnak ( Decoration) tuah cio ding, Biakinn leng cu Biakinn Signboard lawng tamh ding. Lengtual ( Compound) tamh lo ding. Pumpak inn cio zong innchung lawngah tamhnak tuah ding.

Tual le lam ah tamhnak tuah lo ding. Atulio thil kan tonmi ruangah faak pi’n ruahmi le biachahmi a si caah cohlan khawh i zuam cio hna usi. Pathian thangthatnak tu in Christmas le Kum Thar tuah cio dingin kan in sawm hna. Vuivainak um lo te’n nan cohlan cio naklai Bawi Khrih min in kan in nawl hna tiah HCMF nih nawlnak an tuah.

Hi kong he pehtlai in Hakha Khrihfabu pakhat i Church Pastor pakhat nih cun ” Christmas le Kum Thar tuahnak kong hi kan caihmi cu a um rih lo a sinain, tu bantukin kan pale nih nawlnak an tuah bantukin kan nih cu sa tu i hleh in kan i pe lai, nikum zong savo in kan i phawzam ” tiah a chim. Crd-The Lairam Times

US, Indianapolis ah a ummi Saya Ṭha Cung Bik tawlrelnak in Mizoram ah aa dormi Chin miphun ralzam hna sinah Rs. 439,300 man puan, angkilum le facang dip (bag) 45 an bawmh hna tiah theih a si. Khuasik a sik chin lengmang i ramleng in kuatu ngei lo ralzam cheukhat cu lungrethei ngai kan um. Culioah atu bantukin puan le angkilum an kan bawmhmi cu kan i lawm taktak ko tiah Lawngtlai ralzam Camp ah a ummi pakhat nih The Chin Post ah a chim.

An bawmhmi hna cu Lawngtlai ralzam Camp hmun 8, TABC PCH Khawhri, Khawhri ralzam Camp, H. Bualpi, Sangau ralzam Camp (Sangau hi tuzarh niruk ni ah an pek hna lai) le Champhai ralzam Camp (facang dip 45) hna an si. Hi bawmhnak a tawlreltu Saya Ṭha Cung Bik nih cun “Mizoram chung i kan miphun ralzam hna hi ramleng in bawmtu a ngeimi cu an tlawmte, bawmtu a ngei lomi, harsa ngai in a ummi an tam tuk. Puanlum le angkilum ṭhiṭha a ngei lomi an tam, cucaah atu bantukin bawmhnak kan pek hna hi a si” tiah The Chin Post ah a chim.

Cu lawng si loin bawmhnak dingah tangka a thawhtu hna cungah aa lawmhnak le an bawmh khawh ri lomi ralzam dang hna zong bawmh dingin an i zuamnak kong zong Saya Saya Ṭha Cung Bik nih a chim fawn. Tutan ralzam bawmhnak caah tangka a thawhtu hna hna cu Pu James Val Lian Bawi te chungkhar (Virginia), Pu Thang Hlei te chungkhar (Virginia), Pu Solomon Chan te chungkhar (Midland), Pu TC Thlaceu te chungkhar (Indianapolis), Salai Sang Hu Lian (Dallas), Pi Khuang Cawi te chungkhar (Indianapolis), Pu Bawi Lian te chungkhar (Indianapolis), Salai Thawng Ṭha Lian (Hawaii), Pu Za Bawi Kung te chungkhar (Indianapolis), Pu Zion te chungkhar (Colorado) le min langhter a duh lomi (Indianapolis) hna an si.

Hi bawmhnak vialte Mizoram lei ah ṭuanvo a latu cu Saya Tlir Lian Thang (Aizawl) a si. Saya Ṭha Cung Bik sin in siaherh bia tlawmpal!
Kan ram buai caan a sau pah cang caah ralzam camp kip an harsa ngai. Mizoram NGO hna zong an tha a ba ngai cang. Chinram rah sii-inn ṭha kan ngeih ti lo caah Aizawl hi kan sii-inn a si cang.

Tlunkalnak le damlo i thlopnak tangka an harsa ngai. Tlunkalnak kongah mitampi an lungre a thei. Kawlram mipi thinlung re a theih caah Pathian a kaltakmi, pumh a huam lomi le thlarau thazang a dermi an tam. Ram a harsat ruangah fawitein tangka hmuhnak lam a kawlmi, rit-hai sii a zuarmi le a dik loin tangka hlep (corruption) a karh chin lengmang. Cucaah tuan ah kan tei khawh nakhnga kan zatein kan ṭan cio a herh tuk.

CNO/CNDF Nih A Voikhatnak Thilṭhit Cawnnak An Tuah! Chin National Organization(CNO)/ CNDF nih a voikhatnak thilṭhit cawnnak cu nizan November 10 ah Mizoram ramkulh, Aizawl khua ah an tuah, tiah theih a si. Thilṭhit cawnnak cu CNDF ralkap hna, Mizoram Zokhawthar ah aa dormi ralzam hna, CNDF headquarter pawngkam ummi khuami le CDF-Mindat in ralkap hna telh in thilṭhit a cawngmi 12 he nizan November 10 ah honnak an tuah, tiah theih a si.

Hi thilṭhil cawnnak an tuahhnawh channak a ruang cu, ralkap thilthuam mah tein an i ṭhit khawh nakding le fawi zaang deuh in an cawk zuar khawh nakding ah thilṭhit cawnnak an tuah hi a si. A hlan ahcun India ram lei in thilthuam kan cawk ko nain kan herh caan le kan duh caan ah a rak phan kho lo. CNO/CNDF ralkap thilri vialte kanmah tein kan i ṭhit khawh ahcun thil fawi deuh ngai a si cang. Thilthuam mi ṭhitter cu aman a fah tuk caah kanmah tein kan i ṭhit khawh cang ahcun tangka kongkau zong ah kan tha a dam ngaingai cang lai, tiah CNO/CNDF in chungṭuan(Secretary 2) Mai Olivia Yinhua Thawng Luai nih a chim.