Tuzing Chinland Club in bia ka chim canceo ah FB nih kan line a kan thahpiak. Report tu um ti si. Khuaruahhar si ko. Lai holh bakin kan chimmi si ko nain. Cun, anmah FB’s community standard kan buarmi zeizong a um lo.
Biaknak/miphun/nupa/buu/pumpak hnursuannak le biachiakha zeihmanh ai tello. Kan dohthlennak thazang chuah a herhnak tete forhfialnak lawng khi si ko. Lai(Halkha) holh a hmang/thiammi bak nih kan chimmi an ngaih i an kan report timi ruah ah lungfah a zual. Asinain an kan kham kho lai maw–Nemmam. Hmaiah kan nawr chin lai__ kan tei tiang. Mah hi Salai Ceu Bik Thawng nih Nizaan Chinlang Club bia a cjhim lio ah a tong mi asi. By Salai Ceu Bik Thawng
Hakha Khuapi Um Agape Sii-inn Ah Siibawi Pakhat Le Nurse 4 SAC Ralhrang Nih An TLaih Hna; Chin ramkulh, Hakha khuapi hrambunh Agape Sii-inn cu a luancia May 21 zan ah SAC ralhrang nih an luhhnawh i siibawi pakhat le Nurse 4 hna cu ralhrang nih an tlaih hna, tiah theih a si.
“Zan suimilam 11:30 tluk ah SAC ralhrang nih Agape sii-inn an luhhnawh hi a si. Zei ruang ah an luhhnawh ti cu theih a si rih lo, Sibawi pakhat le Nurse 4 an tlaih hna i an kalpi hna” tiah tualchungmi pakhat nih a chim.
SAC ralhrang nih an tlaihmi hna cu Siibawi Sicilia, Nurse Henny, Nurse Sianlun, Nurse Hniang Sung le Nurse J. Mawi ( An dihlak minung 5) hna an si, tiah a chim chih. A luancia May 21 zan ah hin SAC ralhrang nih khualtlung checknak an tuah i minung 20 hrawng an tlaihkhih hna, tiah theih a si.
Hakha-Falam Kar A Tlaumi Chin Mi 2 Hna An Ruak Cu Mei Khangh Cia In An Hmuh Hna; Chin ramkulh, Hakha le Falam karlak ah a tlaumi Tedim tualchungmi 2 hna cu May 22 zing ah SAC ralhrang nih umhmun an khuarnak hmun ah an chungkhar hna nih an ruak in an hmuh hna, tiah theih a si.
An ruak an hmuh hnanak hmun cu Hakha peng, Hniarlawn khuathar pawng, Tiphul lam i SAC ralhrang nih umhmun an rak khuarnak hmun a si. SAC ralhrang nih mahka hmun an chuahtak hnu May 22 zing ah an chungkhar hna nih mei khangh cia in an ruak an hmuh hna hi a si, tiah chungkhar he neihniam mi pakhat nih a chim.
“SAC ralhrang nih an sakhan an chuahtak hnu in a tlaumi hna i an chuangkhar hna nih an va zoh tik ah ruak 2 cu an hmuh. An ruak cu mei in an khangh cang hna caah an muisam zong aa hliah kho ti lo nain a thimi nu nih aa phurhmi Tedim thuam hni pakhat a pawngkam ah an hmuh chih caah fehternak an tuah hi a si” tiah a cunglei mi nih a chim. Nunnak a liammi hna ruak 2 cu Hakha khuapi um an chungkhar sahlawh hna nih an laak cang i, May 23 ah an vui hna lai, tiah theih a si.
Sagaing Kahdohnak Ah PDF 4 An Nunnak A Liam, Ralhrial Motor Lehsualnak In Mipi pakhat A Thi; Sagaing ramṭhen, Sagaing peng chaklei kam ah rallam sialmi SAC ralhrang le tualchung PDF hna karlak ah kahdohnak a chuak i PDF ralkap 4 nih ram le miphun caah an nunnak an pek, tiah tiah theih a si.
Cu pinah SAC ralhrang nih rallam an sial caah ralhrial mipi hna nih an i citmi motor leh sualnak in nu pakhat a nunnak a liam i 6 nih hliamhma an tuar, tiah theih a si. May 19, zing suimilam 6:00 tluk ah Sagaing peng, Pa-du (ပဒူ) khua lei ah rallam a sialmi SAC ralhrang thazaang 30 hrawng cu mipi hriamtlai phufonh nih an kahdoh hna, tiah theih a si. Cu kahdohnak ah SAC nih an hmanhmi bomb lamhsualnak ruang ah PDF minung 4 an nunnak a liam hi a si.
“Mipi hriamtlai phu sakhan pakhat cu SAC ralhrang nih mei in an khanghpiak hna hnu ah ralhrang nih an hmanhmi bomb cu PDF ralkap 4 nih an i lamh sual. SAC ralhrang lei zong an faak ngai caah hnulei an kir ṭhan” tiah K.S PDF nih People’s Spring ah thawng an thanh .
May 21 ah SAC ralhrang nih Kangyikone (ကန်ကြီးကုန်း) khua le Pa-du (ပဒူ) khua cu mei in an khangpiak hna caah khua chuahtak in a zaammi mipi motor lehsualnak in kum 25 nu pakhat a nunnak a liam hi a si i minung 6 nih hliamhma an tuar, tiah tualchung Media hna nih an langhter.
“May 19 lio kahdohnak ah SAC ralhrang an faak ngai caah thazaang an chap i rallam an rak sial ṭhan, SAC hriamngan kahmi nih vulei zong a tlerh dih. Nihin tiang SAC ralhrang le tualchung PDF phufonh karlak ah pehtlaiin kahdohnak a chuak” tiah min langhter a duh lomi tualchungmi pakhat nih a chim. Credite; Lungmili Post