Mocha Cyclone Cu Thazaang A Ṭhawng Ngaimi Thlichia Ah Aa Thleng Cang – World Meteorological Organization(WMO)
=================
May zarhhnihnak in Myanmar ram le Bangladesh ram ah thlichia a hrang lai tiin zumhmi Mocha Cyclone cu a faak ngai mi le a thazaang a ṭhawng ngai mi thlichia ah aa thleng cang i minung tam ngai harnak a pek khawh hna, tiah Geneva hrambunh vawleicung khuacaan tuaktantu World Meteorological Organization(WMO) nih ralrinpeknak thawng an thanh.
Myanmar ram chaklei hmun cheukhat le Bangladesh ram hmunrawn ah ti a lianh khawh pinah mincimhnak zong a chuak kho, tiah WMO in chimphuannak nawlngeitu Clare Nullis nih a chim. Mocha thlichia cu May 14 in Bangladesh ram Cox’s Bazar khua le Rakhine ramkulh Kyaukphyu in a pawngkam hrawng ah a lut lai, tiah khuacaan tuaktantu nih ralrin peknak an tuah.
Mocha thlichia cu suimilam pakhat ah meng 100 leng in a hrang kho i, Sittwe pengkomh le Maungdaw pengkomh ah pe 12 in pe 16 tiang sang in ti a lian kho. Kyaukphyu pengkomh ah pe 9 in pe 12 tiang sang in ti a lian kho fawn, tiah zumh a si. UNOCHA nih cun, thlichia a hran hlan ah Rakhine ramkulh in minung sing 60 tluk bawmhchanh an herh i, sing 12 hi umnak inn ngei loin harnak an tong, tiah an langhter.
Bangladesh nichuah thlanglei in aa semmi Cyclone Mocha thlichia cu suimilam 6 chung ah thazaang a ṭhawng ngai mi Cyclone thlichia ah a cang kho i, May 14 ah Bangladesh ram Cox’s Bazar le Rakhine ramkulh, Kyaukphyu kar Sittwe khuapi pawng tiang a phan kho, tiah khuacaan tuaktantu hna nih nihin May 12 zinglei ah an thanh.
Mocha thlichia cu suimilam pakhat ah meng 60-70 tiang a kal kho, tiah zumh a si. India khuacaan tuaktantu zung nih, Mochia thlichia cu nihin May 12 zinglei in a thazaang a ṭhawng chin khomi a si i, meng khat ah 135 tiang a hrang kho, tiah an ruahdamh. Mochia thlichia cu Rakhine ramkulh, Chin ramkulh, Ayeyarwaddy ramṭhen, Magway ramṭhen le Sagaing ramṭhen tiang a phan lai, tiah khuacaan tuaktantu Win Naing nih a chim.