Mingin Ah Pyusawhti Ralhrang Sakhan Kahdoh An Tong, 5 An Tlaih Chih Hna
=========
Sagaing ramṭhen, Mingin peng, Ain-kyin-taung pakhat telh in 5 kan tlaih hna, tiah Student’s Revolutionary Force(S.R.F) nih June 12, nihin ah cathanh an chuah.
A luancia June 8, zinglei suimilam 4:30 tluk ah Student’s Revolutionary Force(S.R.F) nih luhhnawh in an kahdoh hna hi a si. Kahdohnak ah phyusawhti ralhrang 3 an thi i, SAC ralhrang pakhat telh in 5 tlaihkhih an si, tiah an langhter.
Hi kahdohnak ah Carbine M-2 meithal zuun 1, 4.8 meithal zuun 2, kah-pah-sah nih a serchuahmi meithal zuun 1, 4.8 kuan 63, 0.30 kuan 114 le phone 3 zong kan laak chih khawh, tiah cathanh an chuahmi ah an langhter chih.
Pekon Peng Kahdohnak Ah PDF 2 Nih Ram Le Miphun Caah An Nunnak An Pek! Shan ramkulh thlanglei Pekon peng ah Karenni hriamtlai ṭangṭi phufonh le SAC ralhrang kar ah kahdohnak a chuak. Cu kahdohnak ah SAC ralhrang nih an kahmi hriamngan khennak in Mobye PDF (MOBYE PDF) Battalion 2 in minung 2 an nunnak a liam, tiah theih a si.
“A luancia June 10 ah Pekon peng, Hkaung-ai (ခေါင်းအိ) khua ah kahdohnak a chuah hi a si. SAC ralhrang nih voi tamngai hriamngan an kahmi ruang ah Mobye PDF Battalion 2 in Sniper ralkap Nar Ta Let le siangngakchia simi ralkap Jyaw Nine hna nih ram le miphun caah an nunnak an pek” tiah Mobye PDF Battalion 2 nih June 12, nihin ah cathanh an chuah.
Nunnak a petu pasalṭha 2 hna hi rinhchanmi le bochanmi an si. Nan ṭuanṭi hawi hna nih upatnak sangbik kan in pek hna i, taantakmi chungkhar hna zong kan in ngaihchiatpi tuk hna, tiah cathanh an chuahmi ah an langhter chih.
CDF-Senthang Nih IDPs Cung Ah An Tuahser Mi Kong CDF-Hakha Council Nih Dohdalnak Cathanh An Chuah; SAC ralhrang ruangah hmun dangdang in Senthang peng chungah ralzam in aa dor mi hna cu Biaknak lei le zatlaang phu hna i bawm i hmun pakhat ah hmunhma chiah piak in bawmhnak an pek hna.
Ralzam camp um mi chung in Commitee dirh le zulhding phungphai zong an ser, cu chungah a bik in Camp chungah ralthuam in luh lo ding le Camp um mi hna nih luhchuah duh paoh ah Committee theih ter hmasa ding tiah zulhphung an nei.
Cu zulhphung cu CDF-Senthang aa ti mi chungtel minung 3 nih nawlngai lo in 2023 April 10 ah tuanvo ngeitu pakhat cu velh in an hrocer. Sual a tuah tu hna cu Senthang Council nawlpek nak in CDF-Hakha Council biaceih bawi nih tlaihding in April 10 ah nawl a chuah i April 24 ni ah Palik hna nih an va tlaih hna.
CDF-Senthang aa ti mi hna nih lam ton nak check gate pakhat ah an hruaitu (တပ်ရင်းမှူး) thit hruainak in ralkap minung 15 hna nih hriamnam tling he hnahnawhnak an rak pek hna pin ah thongthlak a tong mi hna cu hramhram in an chuah pi hna. Cucaah a tuni tiang biaceih lo in an luat. CDF-Hakha Council nih ralkap thazaang le a herh ningin kan cawl kho ve ko nain a herh lo tiang thisen a chuak lai tiphan ah kan lung kan thul. Sualnak a tuah tu hna cu biaceih piak than dingin biafunnak kan nei than.
Cucaah tualchung mipi nih an herh mi deihnak, biaceih khuakhan nak kongkau le zatlaang nun kongkau a dawnkhan tu mizei bantuk phu le pumpak paoh CDF-Hakha Council nih a herh ningin tuanvo kan lak cang hna lai. A cunglei CDF-Senthang nih an thil tuah mi cu fak piin kan doh i hi hnu ah hi ban tuk thil cang ti hlah seh tiah CDF-Hakha Council nih June 10 ah ralrin peknak cathanh an chuah. Crd;Lungmili Post