Breaking News; Thawngpang Tha Kho Taktak Bak An Vun Kan Thanh Hoi E!!!

Tigyaing Ah SAC Gate KIA Le PDF Nih An Doh, SAC Ralkap 20 An Thi, 3 Hriamthil He Tlaih An Tong
============
Sagaing ramṭhen, Tigyaing Myataung lam tonnak ah a ummi SAC checkgate cu KIA le PDF phufonh nih nihin February ni 2 ah an kahdoh hna caah SAC ralkap 20 an thi, minung 3 an hriamthil he tlaih an tong tiah theih a si.

February 2, zinglei suimilam 5:00AM ah Tigyaing peng Myataung lam tonnak checkgate ah ummi SAC ralkap cu KIA, tualchung hriamtlai pahkahphah le PDF phufonh nih kalhnawh in an kahdoh hna caah SAC ralkap 20 hrawng an thi.

SAC ralkap 2 le khuabawi pakhat tiin minung 3 cu meithal saumi, kuanfang le cazin catlap pawl he tlaih an tong tiah theih a si.

Tigyaing peng Myataung gate ah a ummi SAC ralkap kahdoh an ton caah bawmtu ding ah thlahmi SAC ralkap motor 2 cu PDF nih bomb puahhnawh in an kham hna tiah Takaung tualchung hriamtlai phu in chim phuannak nawlngeitu nih a chim.

State Planning and Administration Council chungtel ah an ka telh hi a hlankan in ka theihcia lo caah ka cohlan ding le cohlan lo ding kaa fiang rih lo tiah Pu Gin Kam Lian nih a chim.

Zomi Congress for Democracy (ZCD) party general secretary Pu Kil Kam Lian cu SAC nih uknak a laak kum 2 a tlin ni February 1 ah SAC chairman Min Aung Hliang nih State Planning and Administration Council chungtel ah a khumh tiah theih a si.

” A hlankan in chimhcianak a um lo caah, ka ca ah a har ngai. Kei cu thithlum le zunthlum zawtnak ngeimi ka si. Party chung zong ah ka ṭuanvo a ngan caah tutan thil hi ka cohlan le cohlan lo kaa fiang rih lo. Pathian sin ah thla ka cam, Pathian nawl si ko” tiah Pu Gin Kam Lian nih cun a chim.

Pu Gin Kam Lian cu 2015 thimnak lioah ZCD party in Tedim peng ah Amyota Hluttaw palai ca ah thimmi a rak si. 2020 thimnak ah Tedim peng ZCD party in zuamnak a lut ṭhan nain a rak tling lo. ZCD party cu 1990 thimnak lioah teinak a rak hmutu party a si i NLD party he ralkap ukchan lio zong ah hmunkhat ah a kalṭimi Chin party pakhat a si.

Sagaing ramthen, Wetlet peng ah a luancia January thla khat chung ah tualchung mi hna umnak inn 2,000 hrawng khanghpiak an tong, ngakchia pakhat telh in tualchung mi 5 thah an tong tiah tualchung Media nih an langhter.

SAC ralkap nih kum khat tluk ngakchia pakhat le kum 17 hrawng a simi ngakchia pakhat telh in minung 5 an thah hna tiah Wetlet Information Network phu nih an chim.

January ni 24, ah private motor pakhat in chuah aa timmi chungkhar pakhat cu Wetlet in an chuah ah SAC ralkap nih an kah hna caah motor chung cuangmi kum khat tluk ngakchia pakhat a nunnak a liam tiah Wetlet Informational Network phu nih an chim.

” Wetlet khuachung um ngam lo ruang ah motor in a chuakmi chungkhar cu lampi ah SAC ralkap nih an dirter hna, motor khalh lio a si caah dirter an si cu an thei lo. Cucaah atu bantuk hin SAC ralkap nih an kah colh hnanak a si i an fate cu a lu ah kuan nih tlenglak a hliamh caah a nunnak a liam.

A dang pakhat nih a liang ah kuan hliam a tuar” tiah Wetlet Informational Network phu chungtel pakhat nih a chim.
SAC ralkap nih a luancia 2023, January thla khat chung ah Wetlet peng khua 9 ah inn 2,000 reng lo an khangh.

Cu pin ah a dang khua 5 ah tualchung mi hna umnak inn an khangh rih, inn zeizat khanghpiak an ton fiang in theih a si rih lo tiah Wetlet Informational Network phu nih an chim.

SAC Nih ASEAN Biahrennak A Zulh Lo Ahcun Mithmai Zoh Loin Ṭuanvo Kan Laak Cang Lai — Indonesia President, ASEAN biahrennak 5 cung ah Indonesia cu zulhphung ning tein kan kal lai i, Myanmar ram buaibainak vialte hi ASEAN cung ah Myanmar nih a khinh lai ding cu kan cohlang kho lai lo.

ASEAN biahrennak 5 an zulh lo ahcun mithmai zoh loin ṭuanvo kan laak cang lai, tiah SAC nih nawlngeihnak an laak kum 2 tlin camtuak ah Indonesia President Joko Widodo nih a chim.

Cu pin ah Myanmar ram ah a ran khawh chung in ralbawi, General pakhat kan thlah lai. Anih hi Indonesia ram siamremhnak ah a rak i tel vemi a si, tiah Indonesia President nih cun a chim.

Myanmar ram ah va tlun hnawhchan biknak a ruang cu; Indonesia ram hi zeitindah Democracy ram kan rak ser i zeitluk in dah kan rak cawlcangh timi va chimh-ruah ding ah ralbawi pakhat thlah kan timh hi a si, tiah Indonesia President nih cun Reuters ah a chim.

Indonesia President nih ASEAN biahrennak 5 hi SAC nih an zulh lo ahcun mithmai zoh loin ṭuanvo kan laak lai tiin a chim ko nain zeibantuk ṭuanvo laak ding kong tu cu a chimfianhnak a tuah lo.

Cu pin ah Myanmar ram ah ralbawi pakhat thlah ding in a chimmi kong zong ah ralbawipa a min cu a langhter lo, tiah theih a si. Crd-The Chin Post

Sagaing ramtthen khuapi pakhat PDF fonh nih an lak, Ralhrang nih an uk mi Sagaing ramtthen khuapi pakhat cu PDF fonh nih an lak khawh tiah theih a si. Sagaing ramtthen Homalin District Shwe Pyi Aye khuapi cu February 1 khan kah hram an thok i an lak khawhnak kong HPDF nih an langhter.

Hi kahdohnak hi Homalin People Defense Force (HPDF), HPDF 124 le HPDF Moe Gyo fonh hna nih an tuah mi kahdohnak a si. Hi khuapi hi U Tha Shwe chan lio ah rak tlak mi khuapi a si. Khuapi chung kahdohnak ah a cei deuh mi ralhrang nih Helicopter in PDF fonh cu an rak kah hna.

Cun hi hmun hrawng ahhin kahdohnak fak a chuak kho tthan, ralhrang lei ttang Shanni National Army (SNA) cawlcanghnak hmun zong a si caah mizapi i ralring cikcek u tiah cathanh ahcun an langhter chap.

Nihin February 1, chun suimilam 11 hrawng ah SAC ralkap nih raltuknak Jet Fighter pahnih le raltuknak MI – 35 Helicopter pakhat in Thantlang khua ummi Chin ralkap pawl a kah hna, tiah kan theih.

Raltuknak vanlawng nih cun bomb voi 6 hrawng a thlak i MI-35 Helicopter nih Machine gun in a kan kah len, bomb a thlaknak hmun hi TBC Biakinn hrawng ah a si, tiah a hmunhma ummi pakhat nih The Chin Post a kan chimh.

Chin nuhrin covo a kelvengtu phu Chin Human Right Organisation(CHRO) nih an langhter ning ah, SAC ralkap nih uknak an laak hnu kumhnih chung ah Chin ramchung milu hmunli ṭhen hmunkhat cu mahle umnak hmun chuahtak in an i ṭhialkam i, inn 2100 hrawh a si tiah an langhter.

Kumhnih chung ah hin minung 421 leng nunnak a liam i, cu chung ah tualchung mi(civilian) 285 an thi. Cu lak ah cun nu 72 le ngakchia 25 an i tel. Cu pin ah tlaihkhih a tong mi 1431 an um, tiah an langhter. CHRO langhter ning ah uknak laak hnu in Chin ramchung ah inn 2100 cu a rawkral.

Inn tam deuh hi SAC nih a khangh in an khangh. Innlo a rawkralmi lak ah hin Thantlang cu innlo a rawk tam biknak a si. Mipi umnak inn pinah Biakinn 50 zong an rawkral.

SAC ralkap cawlcanghnak ruangah ramchung mi tampi nih mahle umnak hmun an chuaktak i, atu dirhmun ah ramleng chuaktak in ralzam dirhmun a phan mi minung 50,000 an phan. Hi pin ah ramchung ah innlo chuaktak in aa ṭhialkam(ralhrial) mi 70,000 an um i an dihlak in Chin ramchung minung hmunli ṭhen hmunkhat cu an i ṭhialkam tiah CHRO nih an langhter.

Mindat peng Ung khua chungah SAC ralkap nih hriamngan an kah caah khuami 4 hliamhma an pu, tiah theih a si. January 31 zanlei sml 3:30 hrawngah Khah Lah Yah 274 Battalion ralkap hna nih, hriamngan duh poh in an kah caah Ung khua chung ah hriamngan kuan a tla, tiah tualchung mi pakhat nih a chim.

“Zanlei ah SAC ralkap nih hriamngan an kahmi thawng kan theih i hriamngan kuan cu Ung khua ah a tlak caah minung 4 hliamhma an pu i, motor pakhat le inn zong an rawk,” tiah The Mindat Post ah a chim. SAC ralkap nih duh poh in hriamngan an kah caah Ung khuami kum 40 nu pakhat le kum 15-20 kar nu 3 hliamhma an pu i an hliamhma a faak ngaimi zong an um, tiah theih a si.

SAC ralkap nih January thla chungah Mindat peng ah vanlawng in voi 10 hrawng kahdohnak an tuah pinah hriamngan zong duh paoh in an thlah, tiah theih a si.

January thla chungah SAC ralkap nih Mindat peng ah hriamngan duh poh in an kah ruangah tualchung mi 9 hliamhma an pu i inn le biakinn 10 nak tlawm lo a rawh pinah motor 2 zong a rawk, tiah theih a si.

Hakha peng CDF nih kum hnih chung ah kahdohnak voi 166 kan tuah i cu kahdohnak ah SAC ralkap 510 an thi, 222 hliamhma an pu. Hakha CDF lei in ralkap 19 nih ram le miphun ca ah an nunnak an pek i, 41 hliamhma an pu, tiah nihin Febuary 1 ah cathanh an chuah.

SAC ralkap nih kum hnih chungah tlaihkhihnak le hriamngan kahnak an tuah ruangah tualchung mi 14 an nunnak a liam pinah 6 hliamhma an pu. Minung 374 tlaih an tong i inn 30 mei in an khangh, tiah an cathanh ahcun an langhter.

Ram le miphun luat nakding ‘Pau dohthlennak’ ah i tel ve cio dingin le khuapi chungah kahdohnak tuah cang dingin an langhter.

Dohthlennak ah hnahnok mi tuahsernak poh kan doh lai i SAC nih thimnak tuah an timh mi ah teltumnak a ngei mi le thimnak hlawh a tlin nakding ah bawmchantu poh fak piin dan kan in tat hna lai, tiah cathanh an chuah.

SAC nih nawlngeihnak an lak hnu in a lam kip in Hakha peng chungah SAC ralkap uknak duhlonak langhternak ah minung 5,000 leng, CDMer 4,000 leng le hriamtlai 3,000 leng nih ram le miphun luatnak ding caah ralkap kan doh cuahmah, tiah an langhter.

Nihin Feb 1, Bangkok Ah SAC Ralkap Uk Duhlonak An Langhter, SAC nih nawlngeihnak an lak kum 2 tlin ni, nihin Febuary 1 ah Thailand ram um Myanmar rammi hna nih Bangkok khua, Embassy of Myanmar zung hmai ah SAC ralkap uk duhlonak an langhter.

Ralkap uk duhlonak a langhtertu hna nih mizapi sinah nawlngeihnak pek ṭhan ding, hramhram uknak a hram in bongh ding le phung lut loin tuah timhmi thimnak hrawh ding in an au, tiah theih a si.

Aung San Suh Kyi le President Win Myint zuk i put in lam an zawh i NUG cohlannak angki an i hruk pinah puan sen zong an lu ah an ṭem, tiah theih a si. Bangkok ah lam a zawhtu hna hi Thailand ram ummi Myanmar rammi 500 hrawng an si, tiah theih a si.

Mindat Peng Ah SAC Ralkap Nih Hriamngan An Kah Caah Ung Khuami Nu Pali Hliamhma An Pu, Mindat peng Ung khua chungah SAC ralkap nih hriamngan an kah caah khuami 4 hliamhma an pu, tiah theih a si. January 31 zanlei sml 3:30 hrawngah Khah Lah Yah 274 Battalion ralkap hna nih, hriamngan duh poh in an kah caah Ung khua chung ah hriamngan kuan a tla, tiah tualchung mi pakhat nih a chim.

“Zanlei ah SAC ralkap nih hriamngan an kahmi thawng kan theih i hriamngan kuan cu Ung khua ah a tlak caah minung 4 hliamhma an pu i, motor pakhat le inn zong an rawk,” tiah The Mindat Post ah a chim.

SAC ralkap nih duh poh in hriamngan an kah caah Ung khuami kum 40 nu pakhat le kum 15-20 kar nu 3 hliamhma an pu i an hliamhma a faak ngaimi zong an um, tiah theih a si. SAC ralkap nih January thla chungah Mindat peng ah vanlawng in voi 10 hrawng kahdohnak an tuah pinah hriamngan zong duh paoh in an thlah, tiah theih a si.

January thla chungah SAC ralkap nih Mindat peng ah hriamngan duh poh in an kah ruangah tualchung mi 9 hliamhma an pu i inn le biakinn 10 nak tlawm lo a rawh pinah motor 2 zong a rawk, tiah theih a si.

Yangon Le Mandalay Ah Silent Strike An Tuah, Yangon khuapi ah SAC ralkap uk duhlonak langhternak can ah mizapi cu dai tein kan um i zalam cungah motor le minung zong kan chuak lo, tiah tualchung mi hna nih an chim. Nifatin in mi chawkvai an tam biknak Yuzana Plaza hmaiah zing sml 9:50 in mizeihmanh an um ti lo i, motor zong a lutchuak an um ti lo, tiah theih a si.

Cu ṭhiamṭhiam in nihin Febuary 1 silent strike tuah caan, zing sml 10:00 a tlin hlan in Mandalay khuapi zalam thluan ah minung, cycle le motor zong aa chawkmi an um ti lo, tiah tualchung mi hna nih an chim.

Zing sml 8:00 hrawng in zalam cungah mi zeihmanh an chuak ti lo. Dai tein anmah le inn cio ah an um i SAC a dirkamhtu sipin zung rianṭuantu hna lawng lam an zawh, tiah Mandalay khua ummi hna sinin theih a si.

Hakha peng CDF nih kum hnih chung ah kahdohnak voi 166 kan tuah i cu kahdohnak ah SAC ralkap 510 an thi, 222 hliamhma an pu. Hakha CDF lei in ralkap 19 nih ram le miphun ca ah an nunnak an pek i, 41 hliamhma an pu, tiah nihin Febuary 1 ah cathanh an chuah.

SAC ralkap nih kum hnih chungah tlaihkhihnak le hriamngan kahnak an tuah ruangah tualchung mi 14 an nunnak a liam pinah 6 hliamhma an pu. Minung 374 tlaih an tong i inn 30 mei in an khangh, tiah an cathanh ahcun an langhter.
Ram le miphun luat nakding ‘Pau dohthlennak’ ah i tel ve cio dingin le khuapi chungah kahdohnak tuah cang dingin an langhter.

Dohthlennak ah hnahnok mi tuahsernak poh kan doh lai i SAC nih thimnak tuah an timh mi ah teltumnak a ngei mi le thimnak hlawh a tlin nakding ah bawmchantu poh fak piin dan kan in tat hna lai, tiah cathanh an chuah.

SAC nih nawlngeihnak an lak hnu in a lam kip in Hakha peng chungah SAC ralkap uknak duhlonak langhternak ah minung 5,000 leng, CDMer 4,000 leng le hriamtlai 3,000 leng nih ram le miphun luatnak ding caah ralkap kan doh cuahmah, tiah an langhter.

PDF, CDF le NUG Dirkamhnak le Dohthlennak Kum 2 Tlin Lamzawhnak Mizoram Ralzaam Camp ah an Tuah, Myanmar Dohthlennak kum 2 tlun camtuak nihin February 1 zinglei ah Mizoram, Lunglei khua, Thaizawl ralzam camp ah lamzawhnak an tuah hna, tiah thawng kan theih.

Lamzawhnak ah, “PDF, CDF le NUG dam tein um hram u,” timi thlacampiaknak catar an i thlir. Hi ralzaam camp ah a ummi ralzaam tam u hi Matupi peng chung mi an si hna.