Sagaing Peng Ah PDF Sakhan Cu SAC Ralkap Nih An Luhhnawh I PDF 12 Nunnak Liam
================
Sagaing ramṭhen, Sagaing peng, Kintaw khua pawng PDF sakhan pakhat cu SAC ralkap nih nihin June 25, zinglei ah luhhnawh in an kah i, PDF 12 nunnak a liam tiah tualchung mi nih Khit Thit Media ah an chim. Nihin, zinglei suimilam 4:50 ah Kintaw khua telh in khua 7 ah SAC ralkap nih hriamngan an kah hnu ah an luhhnawh hna.
Kintaw khua pawng ummi PDF sakhan pakhat cu SAC ralkap nih an luhhnawh i PDF zeimawzat cu an tlaih hna hnu ah an thah hna, tiah Khit Thit Media nih a ṭial. “Kaphnih kar kahdohnak a um lo nain, SAC ralkap nih hriamngan an thlah hnu ah khuachung cu an luhhnawh.
PDF an tlaih mi hna cu an lu ah meithal hmuahchih in an kah hna, hriamnam zong zeimawzat an laak. PDF umnak sakhan hi fiang tein an theih caah a thli tein an luhhnawh,” tiah tualchung mi pakhat nih a chim. PDF sakhan luhhnawh an tonnak kong he pehtkai in dohthlennak tuahtu phu cheukhat zong nih bia dik a si ko an ti nain, PDF phu min hi media nih an fehter kho rih lo.
Magway ramṭhen, Seikphyu peng, Seikphyu-Saw lam ah SAC ralkap pawl ni 2 chung pehzulh in bomrap an puah hnawh hna i SAC ralkap 20 an thi, 30 nak tlawm lo an i hliam tiah NUG Ministry of Defense nih a thanh. June 20 zinglei sml 7:50am hrawng ah Seikphyu peng,
Seikphyu in Saw lam lei ah a kal mi SAC ralkap 30 hrawng nih an i cit mi mawṭaw 1 cu Thapyay khuate le Yekyaw khuate karlak ah bomrap lung 4 an puah hnawh hna i SAC ralkap 3 an thi, fak ngai in hliam a tuar mi 20 leng an um tiah an langhter.
June 20 ṭhiamṭhiam, zinglei sml 9:00am hrawng ah Thapyayaye khuate le Yekyaw khuate karlak ah a rak lut mi SAC ralkap mawṭaw 1 bomrap in an puah hnawh ṭhan hna caah SAC ralkap 2 an thi, 5 hliam an tuar tiah theih a si.
Kahdohnak chung ah Pakokku pengkomh PDF B04, C 1 le Seikphyu peng PDF hna bawm in an tuah.
Cubantuk in June 21 chun sml 11:00am hrawng ah bomrap ruang ah a thi mi SAC ralkap pawl rak phor ding in a rak lut mi SAC ralkap mawṭaw 1 bomrap an puah hnawh ṭhan hna caah an mawṭaw a rawk i SAC ralkap 15 an thi, 5 hrawng hliam tiah theih a si. Ni 2 chung bom puah hnawhnak ah SAC ralkap 20 an thi, 30 nak tlawm lo an i hliam. PDF phu pawl him tein an kir kho tiah NUG Ministers of Defense nih a thanh.