Breaking News: SSPP Le RCSS Hriamtlai Phu Kahdohnak Thawng Thar

Breaking News: SSPP Le RCSS Hriamtlai Phu Kahdohnak Thawng Thar
===========
June 10, 2021 ni thawk in Mongnawng le Laihka kalnak motor lam cungah le nitlak lei Mongnawng le Kyethi kalnak motor lam cung thlanglei um Loiham tlang hrawngah sakhaan an chiahtu hna RCSS hriamtlai phu thazaang 1200 hrawng le SSPP hriamtlai phu karlak ah kahdohnak a chuahnak hi June 14, 2021 ni tiang in ni 5 chung a si cang. Hi kong he pehtlai in RCSS hriamtlai phu le SSPP hriamtlai phu hna karlak kahdohnak hi Loihum tlang hrawng chung a ummi sakhaan 2 cu RCSS hriamtlai phu nih an control rih ko, tiah thawngpang theih a si.

Shan ramkulh, Loiham tlang hrawng Mongnawng le Laihkha motor lam thlanglei tlang hrawng pakhat chungah hin SSPP hriamtlai phu Wan Hai Headquarter cu thihphaihnak an tuah rih, tiah thawngtheih a si. Hi tlang hrawngah a ummi RCSS hriamtlai phu ralkap pawl cu hnu lei ah tawlh dingah SSPP hriamtlai phu lei nih fakpi in cawlcanghnak kan tuah lai, tiah an chim. Hi kahdohnak ah hin SSPP hriamtlai phu thazaang thong 1 hrawng an hmang hna, tiah thawngpang theih a si.

SSPP hriamtlai phu le a hawikomh hriamtlai phu lei nih an rak bawmh hna i, hi kahdohnak ah an itel ve, tiah Shan ramkulh chung media pawl sinin thawngpang theih a si. Asinain, hriamtlai phu dang an hmang hna le hna lo, thawng fekternak a um rih lo. Hi SSPP hriamtlai phu nih a hawikom hriamtlai phu dang a sawm hna i, an itel timi hi thawng dik a si le si lo, hngalh khawh a si lo.

RCSS hriamtlai phu thazaang hi SSPP hriamtlai phu nakin an thawng deuh ti khawh a si. SSPP hriamtlai phu hi a hawikom pawl thazaang an thawng tuk ve. Thanlwin (Salween) tiva nitlaklei hmunram ah hin UWSA hriamtlai phu ca zongah ral thawknak lei ah abiapi nak a si i, UWSA hriamtlai phu an sining hngak chung an hau, tiah Maung Maung Soe nih a langhter chap.

Hi kahdohnak a thawknak kong he pehtlai in Shan miphun hriamtlai phu 2 a simi hna karlak ah nihin ni tiang daihnak a um kho rih lo. Kawlram chung buaibainak a linsa lio ah hi bantuk in mah le miphun hriamtlai phu karlak ah kahdohnak a ummi hi thazaang i zuam colhnak le ramri kongah thinphang nak ruang zongah a si khomi a si. Cun, Shan hriamtlai phu pakhat lawng um ter dingah tinhmi an ngeih caah a si hnga maw? tiah biahalnak a um ngaingai. Kawlram buainak kong le Shan ramkulh chung buainak kong tiin biatak tein kherhlainak tuah ding le hngak chung dingmi buaibainak pakhat a si, tiah Maung Maung Soe nih a tarlangh.