SAC Ralkap Sing Hnih Le Cheu An Tling Ti Lai Lo Tiah NUG Nih A Ruahdamh
=============
SAC ralkap chung in ral a tu khomi le zung ṭhumi dihlak fonh ah sing hnih le thongkul leng in sing hnih le thong sawmli(220,000-240,000) kar lawng an taang cang, tiah NUG runvennak zung nih an ruahdamh.
Ramchung ramleng ngiathlaitu hna nih cun SAC ralkap cu sing thum in sing nga kar an si lai, tiin an zumh ko nain cu tluk cu an taang ti lai lo, tiah May 28 ah NUG runvennak zung nih cun an langhter.
Min Aung Hlaing ralbawizik a si hnu in Battalion pakhat an ser ning zoh ah Battalion pakhat ah ralkap 857 in 200 kar hrawng tam in upadi an ser, tiah NUG runvennak zung nih an langhter.
SAC ralkap nih ralkap le palik thar an khawmhnak ah harnak an tong ngaingai i cuhlan mithar an laak khawh biknak Myanmar ram laifang le nitlaklei hrawng zong ah mithar an khawm kho ti lo i, cuka hmunram a ummi hna cu SAC ralkap faak piin a dohtu an si cang. SAC ralkap rianṭuan a duh lo i, CDM a tuahtu ralkap le palik hi thong hleikhat leng an si i, kum hnih chung kahdohnak ah SAC ralkap thong sawmthum tluk an thi cang, tiah an langhter.
SAC ralkap cawlcangh ning a ngiathlaitu, US ram ummi Ye Myo Hein nih cun SAC ralkap hi an dihlak sing khat le cheu tluk hrawng lawng an taang cang lai, tiah May thla chung ah a langhter. Cu chung ah ral a tu khomi hi thong sawmsarih tluk lawng an si, tiah a chim. SAC lei nih cun an ralkap a thimi cazin an langhter bal lo caah SAC lei in a thimi zat an thanhmi hmuh ding a um lo.
US Dollar Man A Kai Chin, US Dollar 1 Ah MMK 3,000 Leng A Phan; Myanmar ramchung ah US dollar a tlawm tuk cang i Central Bank nih a herhning in US dollar zuar ding a ngeih ti lo caah dollar man a kai chin lengmang tiah theih a si.
US dollar man hi fang 1 ah MMK 2850 in 2900 karlak a si tawn nain SAC nih ramleng ah detsi cawknak US dollar a ngei ti lo i detsi a cawk tawn zat a ṭhumh ruang le ramleng thil-lut tampi a phih ruangah dollar a har nak a si.
Rangoon ah US dollar 1 ah MMK 3,100/3,200 in an thlen. Ramleng ah ngandamnak aa zohkhenh dingmi, sianginn a kai dingmi le rianṭuan ah a kal dingmi hna nih dollar cu an herh cio tikah an duh zong duh lo zongah an thlen a hau ko, tiah Rangoon i dollar cawk-zuarnak a tuahtu pakhat nih a chim.
SAC nih dollar thlen man rikhiah a tuahmi cu MMK 2,100 a si i dollar man kongah thawng diklo a thanhtu cu dantat an si lai tiah May 26 ah khan SAC nih an thanh. Atu ningin a si ahcun a rauh hlan ah US dollar 1 ah MMK 3,500 a phan lai tiah Rangoon i dollar cawk-zuarnak a tuahtu hna nih an chim. Credite; The Hakha Post