SAC Ralkap Hna He Naihniam In A Ummi
==============
Yangon ramṭhen, Yankin peng ah SAC ralkap bawi hna he naihniam in a um i, SAC ca ah rian a ṭuantu Mah Bah Tah le Li Li Naing Kyaw hna cu meithal in kah an tong i, sii-inn i an tlikpi hna hnu ah an thi, tiah Khit Thit Media nih a ṭial.
May 29 zan suimilam 7:00 hrawng ah Yankin peng No. 2 sang ah SAC ralkap a dirpitu Mah Bah Tah le Lily Naing Kyaw hna cu khuachung ah a cawlcangmi Guerrilla phu nih an kah hna. Lily Naing Kyaw hi SAC ralkap hruaitu ralbawi hna he naihniam ngai in a ummi a si i SAC ralkap nih nawlngeihnak an laak hnu in ralkap uk duhlonak a langhtertu hna le umkheng tum in duhlonak a langhtertu hna cu SAC ralkap a tlaihter hna. Yankin peng le Shwe Ungpin peng in dohthlennak ah aa telmi zong SAC ralkap sinah thawng a pek tawn hna, tiah theih a si.
Lily Naing Kyaw cu SAC ralbawizik chang Soe Win, General Zaw Min Htun le SAC ralbawi dang hna he zong an i kom i, SAC ralkap nih an sermi telegram zong ah PDF konglam thawngpang a petu a si, tiah an chim.
SAC Ralbawizik Chang Soe Win Le Tuluk Ralbawi Naypyidaw Ah Tonnak An Ngei! SAC ralbawizik chang Soe Win le Tuluk ralbawi(Military intelligence) Major General Yang Yang cu Naypyidaw ah tonnak an ngei. Nizan May 30 ah SAC ralbawizik chang Soe Win le Tuluk Central Military Commission Director, Major General Yang Yang hna cu Naypyidaw ah tonnak an ngei i, Tuluk-Myanmar ramri a daih khawh nakding kong an ceih, tiah SAC nih an thanh.
Atu lio hi Tuluk cozah nih AA, TNLA le MNDAA telh in Myanmar ram chaklei hriamtlai phu ṭangṭi phuthum(3) le SAC ralkap karah remdaihnak kong ceihmai ding in Mingla hmunram ah tonnak ngeih ding in timhtuahnak ngei lio a si, tiah theih a si.
Karen Le Mon Ramkulh In PDF Pathum Kan Sinah An Lut Tiah SAC Nih An Thanh; Mon ramkulh, Ye peng Sinphyusin hall ah a ummi PDF ralkap pahnih cu hriamnam le zen-kuan he kan sinah an rak lut, tiah SAC nih an thanh. Hriamnam le zen-kuan he kan sin i an rak luh caah lawmman phaisa kan pek hna i, PDF sin um ti lo ding in minsen an thut hnu ah an nu le an pa sinah kan kuat hna, tiah an langhter.
Cu bantuk ṭhiam in Karen ramkulh, Myawaddy peng, Gyiaphyu Column in PDF ralkap pakhat cu SAC sinah a lut, tiah SAC lei nih an thanh.
SAC nih zarhkhat chung ah PDF ralkap 40 an thi i, 10 tlaih an tong, tiah May 29 ah an thanh. Cu pinah hriamngan zun 12, kuan phuntling 2,025, bomb lung 45, hridawh bomb lung 138, ralkap he aa pehtlaimi thilri 87, cycle 22 le motor 2 kan laak, tiah SAC lei nih cun an langhter.
Timit Kahdohnak Ah SAC Ralkap 20 Renglo An Thi; Atu i a kal cuahmah mi Timit kahdohnak ah SAC ralkap lei 20 renglo an thi tiah theih a si. Cu nak in a thi mi an tam deuh kho. Tutan Timit kahdohnak hi SAC ralkap nih cunglei he tanglei he thazang tampi he an nam hna. Kan Chin ralkap hna nih a si khawh chung in an kah ve hna tiah theih a si.
Kan Chin ralkap hna hi minung thazang le hriamnam in bawmh le zuanhnawh an herh tuk lio a si. SAC nih an i timh mi cu Timit lak i cuticun Thantlang zong lak dih ding khi a si caah tutan Timit kahdohnak hi kan tei hrimhrim a herh. Credite; The Chin Post