Thailand-Myanmar Ramri Ah Hriamnam An Tlaih; Myanmar Mi Nu Pakhat Telh In Minung 3 Palik Nih An Tlai Hna
=========
Thailand-Myanmar ramri a si mi Thailand ram Trok (တာခ့်)pengkomh May-la-mat hmunram inn pakhat cu tuanvo ngeitu hna nih check hlatnak an tuah i meithal le hriamnam he aa pehtlai mi thilri le Myanmar mi nu pakhat telh in minung 3 an tlaih hna tiah Thailand ram thawngzamh ca nih an langhter.
May 14 May-la-mat ramchung inn pakhat cu check hlatnak an tuah hnu ah motor pakhat chung ah thuh mi meithal le hriam nam a thong renglo cu palik nih an tlaih hna hi a si. “Hriamnam thilri he Myanmar mi nu 1 le Thailand ram mi minung 2 zong an tlaih chih hna. An tlaih mi hna chungah Pistol, M- 16 menthal le a thilri, M -15 meithal le a thilri pin ah hriamnam he aa pehtlai mi thilri a thong renglo an tlaih hna” tiah an langh ter chih.
An tlaih mi hna minung 3 cu taza cuai dingin palik zungah an chiah chung hna i hriamnam an lak nak zong hlathlai ding in Palik nih an i zuam lio a si. Aluan cia May 1 lio zongah Thailand-Myanmar ramri a si mi Mae Sot khua pawng ah Myanmar mi minung 2 cu cycle cungah hriamnam he Thailand palik nih an rak tlaih bal cang hna tiah kan theih.
Thlichia Nih Hakha Peng Sakta Khua Inn 30 Leng Umnak Tha Lo In A Rawk; Cyclone thlichia nih Hakha peng Sakta khua May 14 zanlei suimilam 3 in zan suimilam 8 tiang thlihran ruang ah inn 30 leng umnak tha lo in a rawk tiah kan theih.
“Minung a hliam mi an um lo. Thawng fiang deuh kan in thanh than te hna lai. Ahme tuai deuh pawl le inn tawh aa hrenh mi pawl kan thlak khawh lo mi zong an um len. Internet line a har tuk caah Sianginn , Biakinn, Quarter, zung tibantuk zong kan rak langhter chih kho ti lo.” tiah Van Thawng Ling facebook cahmai ah a langh ter.
Thlichia Nih KIA Humhaknak Hmunram Ralzam Inn Cheukhat A Rawk; Thazaang thawng ngaimi Cyclone thlichia nih Kachin Independence Army (KIA) humhaknak hmunram ah um mi Maga Yang ralzam Camp cheukhat a rawk tiah kan theih.
Myanmar-Tuluk ramri KIA humhaknak hmunram ah May 14 zan suimilam 8 in May 15 zanlei suimilam 1 tiang thli le ruah fak ngai in a hran caah ralzam umnak inn cu a tubantuk in a rawk hi a si.
“Hi thlichia hran ruangah Maga Yang ralzam Camp inn 18, ekinn 20 le rawlchumhnak ah hman mi coka 20 a rawk. Mah pin ah Sha It Yang ralzam camp zong a rawk mi a um nain fiang tein kan hngal thlu rih loh” tiah Kachin Gender Star Group nih a langh ter.
Pago Ramthen Hluttaw Palai Pakhat Kum 19 Thongthlak Hnu Ah Thihdan Pek Khawhnak Upadi In Taza An Cuai Than; Pago ramthen Pyay khua ah SAC cozah nih Upadi poh-mah 6 in kum 19 thong an thlak lio mi NLD Hluttaw palai Kyaw Zay Ya cu thih dan pek khawhnak upadi phun 2 in taza an cuai than tiah chungkhar neihniam pakhat nih a chim.
Amah cu SAC cozah nih lainawnnak, phungning lo thimnak kong, zuu zuar zamhnak kong le 505 (a) case phun 2 in kum 19 thong an thlak lio mi a si pin ah Lainawn nak upadi phun 2 in sual an puh than hi a si.
“A ra lai mi May 19 ah biaceih zung ah an chuah pi lai ti kan theih caah sihni hlan a hauh caah a tu lio cu sihni hlan ding an har ngai, an duh hna lo. Upadi phun 2 an chap piak mi hi kum 10 thong pin ah thih dan tiang pek khawh mi a si caah a si khawh chungin sihni kawl kan i tim” tiah chungkhar neihniam pakhat nih a chim.
Amah cu SAC cozah nih 2022 June 9 ah an rak tlaih i Pyay khua thonginn ah 2022 December 19 ah kum 19 thong thlak dingin bia an rak ceih piak mi a si. Kyaw Zay Ya cu Pago ramthen Pyay peng ah ramthen Hluttaw palai hmunhma 2015 le 2020 ah voi hnih tiang teinak a hmu mi a rak si tiah kan theih. Credite; Lungmili Post