Breaking News; Ralhrang pawl Tlangzar an Phan, Ramthlo Khua Miakpi in an Kah!

SAC Ralhrang pawl Tlangzar an Phan, Ramthlo Khua Miakpi in an Kah
——–
Nihin zaanlei sml. 4:00 hrawng ah SAC ralhrang pawl cu Tlangzar khua ah an phan i, Tlangzar he meng 2 a hlatnak Ramthlo khua lei ah miakpi in an kah len, tiah khuami nih an chim.

Khuami pakhat nih, “Tlangzar khua an luh lio motor 30 hrawng cu kan mit in kan hmuh. Tlangzar khualuhnak zawn Signboard pawng in Ramthlo lei ah miakpi voi 3 hranwg an kah,” tiah a chim. Tlangzar cu inn 70 hrawnghrang a umnak khua a si i Hakha he meng 25 hrawng a hlatnak ah a ummi a si.

Taal um ralhrang hna cu, kee in an rakra i Tlangzar khua an phan cang, an motor pawl tucu Tlangzar khua in Taal lei furlong pa 2 fai tluk hlatnak mengtung 19 nak zawn ah an dir dih cang. Cuka mengtung 19 zawn cun Ramthlo khua voihnih an hei kah tiah theih si.

Ralhrang kee in Tlangzar lei kalmi hna hi, micheu motor lam in,micheu lamchak le lamtlang ti in an kal hna tiah theih si. Tlangzar le Taal kar mengtung 19nak zawn hmaanthlak si.

Ralhrang Phu Motor 30 Leng Cu Tlangzar Khuachung Ah Lut In Ramthlo Khua Lei Ah Hriamngan In An Kah Hna. Chin ramkulh Falam peng Tlangzar khuachung ah ralhrang phu motor 30 leng cu nihin zaanlei suimilam 4:00 hrawng ah lut in Ramthlo khuachungah hriamngan in an kah hna tiah khuami hna nih an chim.

Ramthlo khuami pakhat nih cun” a tu(suimilam 4:20) ah ralhrang phu hna cu Tlangzar khuachung ah duhsah in an luh lio a si, khua in ralhrang motor 30 cu ka hei hmuh khawh ko, cunak hmanh in an tam deuh kho, cun kan khuachung ah hriamngan in voi thum an kan kah, meithal puahthawng cu a tam tuk hringhran, Tlangzaer khuami cu khuapi ning in an zaam dih” tiah a chim.

Tlangzar khua cu inn 70 hrawng a umnak khua a si i, Falam-Hakha kalnak lampi zong a si.Falam khua in meng 5 a hlatnak hmun ah a ummi khua a si tiah Zalen nih an tial.

SAC Ralhrang Hrem Ruang ah Pu Kham Bawi le Pu Tler Ling an Thihmi a si, tiah Sergeant Tin Lian Biak nih a Chimphuan. Hakha ah an rak tlaihmi hna Pu Kham Bawi (27) le Pu Tler Ling (57) cu SAC ralhrang nih an hrem hna ruang ah a thihmi a si, tiah CDF sin ah a zaammi Sergeant Tin Lian Biak nih a chimphuan. Aluancia May 9 ah Pu Tler Ling cu Nawi ah an rak tlaih i, Hakha ah a rak tlawng tami Pu Kham Bawi zong a tlunnak inn ah an rak tlaih.

Pu Tler Ling cu Kalaymyo sizung lei kalnak lampi ah COVID-19 in a thi, tiah May 11 ah SAC ralhrang nih chungkhar thawng an thanh hna. Cun, Pu Kham Bawi zong cuap zawtnak in Kalaymyo sizung ah a thi, tiah May 12 ah SAC ralhrang nih Hakha biaknak lei upate an chimh hna.

May 11 chuak Myanmar Alin thawngzamhnak ah Pu Tler Ling cu lung zawtnak in le Pu Kham Bawi cu cuap zawtnak in an thi, tiah lih in thawngpang an rak chuah. Cu kong he pehtlai cun Sergeant Tin Lian Biak nih, “Ka lung a fah cemmi thil pakhat cu Hakha ah minung pahnih an rak tliahmi hna kong kha a si. An tukvelh hnanak ah an thi.

Nunnak a um ti lomi an ruak ah Glucose an thlaih hna i cuticun Kalay sizung ah an kalpi hna. Cun, an ruak cu operation an tuahter hna i, zawtnak in an thi tiah Kalay sibawite kha hramhram in ca an chuahter hna,” tiah a chim.
Sergeant Tin Lian Biak nih SAC ralhrang kong a chimphuannak video cu Chinland Defense Force Page ah October 18 ah an tar. Credit: The Chin Journal

Peter Thian Bawm Sang nihin ah a Luat ve Cang! Kalay thonginn ah an kuatmi Peter Thian Bawm Sang cu nihin ah a luat ve cang, tiah thawng kan theih. Peter hi Hakha ah a ummi Chin Center for Peace and Reconcilation (CCPR) ah rian a ttuanmi a si i, March 8 ah Laipawnglung ah SAC ralhrang nih an rak tlaih.

Pohma 505 (a) in taza an cuai i kum 3 thongthlak ding in bia an chah hnu September 30 ah Hakha in Kalay thonginn ah Helicopter in an rak kalpi. SAC ralhrang nih nihin ah ramkhel thongtla 1,300 leng thlah an timh hna. Hakha thonginn in cun atu ca kan ttial tiang ah an thlahmi hna an um rih lo.

Thlacam in bawm uh law tiah ka lo sim than rero mi cu,Zumtu nan/kan thlacamnak cu Kan Pathian in a tak rorin in co hlang ta.

Ka nau Pater Thian Bawm Sang cu Kalay thawng inn pi sung in him dam ten Kawl ram Canher/nazi 4pm ah himdam ten a suak fel ta. Bawipa atha Thinlungtak ten thla in camsak tu Mipi nan tlunah lungawi thu simcawk lo kan nei.

Min Aung Hlaing ASEAN summit kai lo ding an biachah mi SAC phu Ramdanglei Minister nih a dohkalh. ASEAN chungtel Ramdanglei Ministers hna nih tutan ASEAN Summit meeting ah Min Aung Hlaing i tel hlah seh, tiah an biachah mi SAC phu Ramdanglei Minister Wunna Aung Lwin nih a dohkalh, tiah theih a si.

“Min Aung Hlaing tel lo ding nan biachah mi cu fakpi in ka dohkalh. Hi nan biachah mi hi ASEAN ca thatlonak lawng a chuahpi lai, tiah Wunna Aung Lwin nih nizaan ah tuah mi ASEAN upa lakhruak meeting ah a ti hna,” tiah SAC phu TV (MRTV or MWD) nih a chim, tiah BB C nih a tial. Aralai mi ASEAN summit meeting cu October 26 in 28 tiang an tuah lai, tiah theih a si.

Kalaymyo um SAC ralkap chungkhar minung 50 hrawng vanlawng in an laak than hna. Nihin October 16 zaanlei 4:40 hrawng ah Kalaymyo um SAC ralkap chungkhar minung 50 hrawng vanlawng in an hung laak than hna, tiah theih a si.

“Zaanlei ah khan SAC ralkap vanlawng a tum than. Thilri a phurh mi a thumhtak i a kirlei ah ralkap chungkhar minung 50 hrawng a phurh than hna,” tiah Zalen nih a langhter. Aluancia October 10, zaanlei 6:30 le October 11 zinglei zong ah SAC ralkap chungkhar an rak laak bal cang hna, tiah kan theih.

Falam-Hakha kar Lam Rawhnak ah SAC Ralhrang an Taap, Falam JCB an Auh. Falam peng, Thlanrawn-Taal karlak lam an hrawhnak hmun ah SAC ralhrang pawl an taap i Falam lei ah lamremhtu JCB an auh, tiah thawng kan theih. SAC ralhrang pawl Hakha lei ah an lanh khawh lo nakhnga Thlanrawn le Taal karlak ah lam an hrawh i cuka hmun ah cun SAC ralhrang pawl cu nihin ah an phan.

Khuami pakhat nih, “SAC ralhrang pawl nih minung thazaang lawng in an remh len nain an remh kho lo. Falam ah JCB pakhat hramhram in auh,” tiah a chim. Falam ah JCB an auhmi hi lam a rawhnak tiang a phak le phak lo theih a si rih lo. Nihin zinglei sml. 10:00 hrawng ah SAC ralhrang motor pakhat le ralkap 30 leng Falam lei ah an kir i Lungpi khua pawng ah CNA/CDF nih an rak kah hna caah an taap ve.

October 14 in aa thawkmi Falam-Hakha kar CDF/CNA le SAC ralhrang i kahnak ah ralhrang a thimi le hliam a pumi tampi an um pin ah SAC ralhrang motor an hrawh khawhmi zong an um len, tiah theih a si nain mithi/hliampu milu zat fiang in theih a har rih.

NCA Kum 6 Tlin Camtuak ah CNF le KNU an Kai Lo. U Thein Sein cozah chan (2015) ah minsen an rak thutmi rampi kahdaih hnathlaknak kum 6 tlin camtuak cu nihin ah Naypyidaw ah a tawinak in tuah a si nain CNF le KNU an kai lo, tiah theih a si.

CNF an kai lonak kong he pehtlai in CNF Vice President-2 Dr. Lian Hmung Sakhong nih, “NCA timi cu tlangcungmi hriamtlai bu hna le Myanmar ramkomh cozah karlak ah rak thutmi hnatlaknak a si. Kum 6 tlin camtuak hi mipi thimmi cozah nih an tuahmi si sehlaw kan kai ko hnga. Sihmanhsehlaw, SAC nih uknak an chuh hnu in NCA hi sullam a ngei lomi bantuk ah aa chuah cang. Cucaah, kan kai lo,” tiah Irrawaddy thawngzamhnak ah a chim.

“Myanmar ram daihnak kong a tawlreltu Peace Process Steering Team-PPST chungtel ka hawile hna zong nih atu kan ram sining hi fiang tein an hmuh a herh. Min Aung Hlaing zaanmang ah khuasa len ve hna hlah seh ti ka duh. Rammipi an duhnak zong upatpiak hna u. Rammipi he ttan tti loin ramkhel biaruahnak hna tuah timh lengmang hi tuanbia ah ro a ling dingmi palhnak a si. A caan a um lio ah dirhmun an i thlen lo ahcun tuanbia dantatnak an tuar te ko lai,” tiah a chim chap.

KNU nih nihin ah cathanh an chuah ve i, “SAC nih uknak a lak ruang ah Myanmar rammi dihlak namneh le hrem an tuar. Myanmar rampi a tlu dingmi dirhmun ah a phan cang. Federal Democracy rampi sernak kong he pehtlai in SAC nih phungning in ca a chuah a herh i, Myanmar ramkhel chumtual in a chuah zong a herh,” tiah an langhter. Nihin NCA kum 6 tlin camtuak ah RCSS, NMSP, ABSDF, KNLA-PC, DKBA, LDU, ALP le PNLO hna hi an kai hna. Credit: The Chin Journal