Breaking News: Pyusawhti le Ralhrang nih chungkhar minung 4 an thah hna!

Launglone Peng Ah SAC Ralkap Le Pyusawhti Nih Chungkhar Minung 4 An Thah Hna!
========
Tanintharyi ramṭhen, Launglone peng Kyauksin khua ah October 20 zan ah chungkhar minung 4 cu, SAC ralkap le pyusawhti nih an thah hna, tiah tualchung mi nih an chim tiah theih a si. Cu zan sml 11:00 hrawngah SAC ralkap le pyusawhti Lay Lay nih a hruaimi phu cu khua chungah motor 2 in an lut i, Maung Soe Tin te chungkhar 4 cu an inn ah an thah hna i mei in an khangh hna, tiah theih a si.

Maung Soe Tin le a nupi Ma Nwe, an fapa Zeyar Htun le an i cawmmi pa pakhat cu SAC ralkap le pyusawhti nih nam in an sawh hna hnuah meithal in an kah hna, tiah tualchung mi hna nih an chim. Maung Soe Tin te chungkhar hi ti a zuarmi an si i, mirum ngai an si. An fapa Zeyar Htun zong Thailand ram ah rian a ṭuan i a rak tlunnak hi thla khat hrawng lawng a si rih, tiah theih a si.

Hinthata Khua Ah Bomb Puahnak In Traffic Palik Soe Min Than A Thi. Ayeyarwaddy ramṭhen, Hinthata(ဟင်္သာတ)khua chungah October 13 zanlei sml 4:00 ah bomb puahnak a chuak i, Traffic palik Soe Min Than cu fak tuk in a rak i hliam caah nizan October 21 ah a hliam hma he a thi, tiah theih a si.

Bomb a puahnak a hliamhma cu a fah tuk caah Hinthata sii-inn in Yangon sii-inn ah an kalpi nain a dam khawh hlei lo caah, nizan October 21 zinglei ah a thih hi a si. Cu bomb puahnak ah palik 4 hliamhma an pu i, 2 hliamhma fak an tuar, cu lakah traffic palik Soe Min Than pakhat lawng hi a thi mi a si, tiah theih a si.

Monywa No. 2 Palik Sakhan Hmai Ah Sentari Congtu Palik Pahnih Kah An Ton Caah Pakhat A Thi. Sagaing ramṭhen, Monywa industry zone sang No. 2 palik sakhan hmai ah sentari congtu palik 2 cu, nizan October 21 zan sml 9:00 hrawngah kan kah hna i palik 1 a thi, tiah Golden Eagle Force- Monywa in Lin Yung nih a chim tiah theih a si.

“Sentari a cawngtu hi palik 2 an si. Zan sml 9:00 hrawngah kan kah hna i cu chungah palik 1 a thi. A hawipa cu a ban ah meithal kuan nih a khen. An ruah padamh in an kan kah ko nain, a thimi le aa hliammi kan um lo,” tiah a chim chap.

A luancia October 16 lio zong ah Monywa khua um, tarnu tarpa an chiah hnanak inn in thlanglei ah Golden Eagle Force- Monywa le SAC ralkap kar kahdohnak a chuak i, SAC ralkap 1 a rak thi.

Myaung Peng Ah SAC Ralkap Nih A Nu Le Pa Chanhchuah Dingah Ai Tim Mi Pum tlamtling Lo Pakhat An Thah. Sagaing ramṭhen, Myaung peng Shwe Bung Thar khua ah SAC ralkap an lut i, hringtu a nule a pa bawmhchanh le chanhchuah dingah ai tim mi pum tlamtling lo pakhat an thah, tiah CDSOM sinin theih a si.

October 19 zing sml 5:00 hrawngah Kyaukyit sakhan in Shwe Bone Thar khua chungah SAC ralkap pawl cu an lut i, pum tling lo Myint Oo(kum 45) cu SAC ralkap nih an thah hi a si, tiah theih a si. “SAC ralkap cu Shwe Bone Thar khua ah ruah lo piin an phan i, khuami cu anmah le himnak cio ah an zam dih.

Pum tlamtling lo Myint Oo cu a nule a pa kaltak awk an ṭhat lo caah an inn lei a ṭin i, innchung a luh lai ah SAC ralkap nih an kah,” tiah CDSOM in ṭuanvo ngeitu pakhat nih a chim. SAC ralkap nih khuami an inn le an lo an hrawhpiak hna pinah tangka kyats sing 1,850,000 le phone lung 2 an fir tiah theih a si.

Wetlet Peng Ah SAC Ralkap Nih Tualchung Mi 2 An Thah Hna, 5 Hliamhma An Pu. Sagaing ramṭhen, Wetlet peng nichuah lei ah SAC ralkap nih hriamngan le hriamhme he nihnih chung an kah caah tualchung mi 2 an nunnak a liam i a zammi an tam, tiah tualchung mi hna nih an chim tiah theih a si.

Nihin October 22 ah SAC ralkap nih Wetlet peng nichuah lei ah rallam an sial caah Chaungmitu(ချောင်းမီတို) khuami hna cu an zam dih i Tamankyin(သမန်းကျင်း) khua lei ah a zammi nuva hna cu SAC ralkap he hmaitonh in an i ton caah SAC ralkap nih an kah hna i, a vapa Aung Ngwe cu a hmun ah a nunnak a liam, a nupi Daw Chu ca zong thinphang ngaingai a si ko, GZ Special Task Force Wetlet nih an langhter.

“Nizan October 21 zanlei sang ah Wetlet peng a hnulei Hlataw sakhan in SAC ralkap nih hriamngan an kah caah Metone(မဲကုန်း), Gyikan, Pinzin le Dunteykone(ဒွန်တဲကုန်း) khua ah hriamngan kuan a tla i, Duntey khuami 3 hliamhma an pu i 1 a nunnak a liam, tiah theih a si.

Seikphyu Peng Ah Bomb Puahhnawh Nak In SAC Ralkap 7 An Thi, Phalanma Khua An Khangh I A Ciam Dih. Magway ramṭhen, Seikphyu peng Phalanma(ဖလံမ) khua pawng ah SAC ralkap cu, bomb nih a puahhnawh hna caah a tlawm bik ralkap 7 an thi, Phalanma khua zong an khangh i a ciam dih, tiah tualchung mi hna nih an chim tiah theih a si.

October 19 ah SAC ralkap nih Kyunchaung le Ywatharkone khua karah zanlei sml 5:30 in 6:00 tiang hriamngan le hriamhme he an kah i Aigyi khua sianginn um sayamah a inn le khuami pakhat inn ah hriamngam a tla i an rawk dih. SAC ralkap pawl cu zan sml 7:00 hrawngah Aigyi khua in Phalanma khua lei an kal lio ah bomb puahhnawh an tong i SAC ralkap 7 an thi i tam ngai hliamhma an pu, tiah Seikphyu PDF nih an langhter.

Inn 50 hrawng a ummi Phalanma khua cu SAC ralkap nih October 20 ah an khangh caah an khua ning in a ciam dih, tiah theih a si. “Inn pakhat sak timi hi a fawimi thil a si lo. Kum tampi timhlamhnak ngeih hnuah sakmi a si. Khuami inn le lo khanghpiak a hmangmi SAC ralkap teinak dingah PDF ralkap hi a lamkip in kan bawmh hna a hau,” tiah We Love Seik Phyu phu in ralkap pakhat nih a chim. Credit: The Chin Post