NUG nih Gangaw pengkomh B-13 hriamnam a pek hna
==========
Battalion No. 13 a si mi The Youth Force – Saw & Kyaukhtu cu NUG Runvennak Minister Zung nih hriamnam a pek hna tiah, anmah B-13 nih May 18 ah an thanh.PDF No. 1 Command tang ah a um mi Gangaw pengkomh battalion – 13 le Magwe ramthen Commanding Office in tuanvo ngeitu hna an i ton hnu ah atu bantuk in hriamnam cheukhat an pek mi hna a si tiah cathanh ah an langhter. Battalion chung ralkap hna cu dingrep a ngei mi rammi ralkap si ding in Magwe ramthen commander nih a forhfial hna ti zong an langhter.
Uknak an laak hnu in Dollar billion pakhat man raal hriamnam SAC nih an cawk; Myanmar ram ah ralkap nih uknak hramhram in an laak hnu ah SAC nih Dollar billion pakhat (Nuai 1,000) man raal hriamnam le kuanzen an cawk tiah Myanmar ram UN nuhrin covo lei palai Tom Andrews nih a chim.
2021 February 1 ah ralkap nih uknak an laak hnu in SAC nih Russia le Tuluk lawng siloin Singapore hrambunh company hna sin zong in raal hriamnam pawl a cohlan tiah a chim. Ralkap council nih nuhrin covo buarnak le sualtuahnak tampi a tuah ko nain ram cheukhat nih raal hriamnam zuarh in an bawmhnak an ngol hlei lo tiah Tom Andrews nih a chim.
Cu cazin pawl cu May 17, New York khua, UN hmunpi ah Myanmar ram UN nuhrin covo lei palai Tom Andrew nih a dikthlir in a chuahpi mi a si. Cu cazin chung ah cun SAC ralkap aiawhtu agent hna le hriamnam a zuartu hna an i pehtlai i an i cawk ning, an i kuat ning 12,500 leng a langhter. Myanmar ram ah ralkap nih uknak hramhram in an laak hnu ah ram dang sin in an cawk mi hriamnam phun le a zat tampi in a karh ti zong UN palai nih a chim.
Ralkap Council nih an cawk mi raal hriamnam lak ah raltuknak vanlawng, drone le raltuknak tilawng hna tel in pehtlaihnak thilri le a dang seh phun hna zong an i tel tiah a chuahpi mi ca chung ah a langhter.
Mocha thlichia nih Chin ramkulh ah inn 1774 le biaknak inn 29 a hrawh tiah ICNCC nih a thanh; May 14, Chin ramkulh ah a hraang mi Mocha cyclone thlichia ruang ah minung umnak inn 1774 le biaknak inn 29 a rawk tiah Interim Chin National Consultative Council (ICNCC) nih nihin ah a thanh.
Mocha thlichia nih Chin ramkulh chung inn a hrawh mi lak ah, Matupi peng ah inn tam bik a hrawh i inn 887 a hrawh. Kanpetlet peng ah inn 112, Mindat peng ah inn 364, Paletwa peng ah inn 220, Thantlang peng ah inn 27, Tedim peng ah inn 5, Falam peng ah inn 74, Hakha peng ah inn 85, Chin ramkulh chung fonh ah a dihlak inn 1774 a hrawh tiah ICNCC nih a langhter.
Cu leng ah Biakinn le biaknak lei inn 29, ngandamnak lei inn 5, siang inn 30, rawlruk 19 zong Mocha thlichia nih a hrawh. Hi cazin hi May thla 17 tiang khawmh khawh mi cazin a si i pehtlaihnak a har ruang ah aa thleng mi a um kho ti zong ICNCC nih thawngthanhnak ah an telhchih.
A thazaang a thawng tuk mi Mocha cyclone thlichia cu 2023 May 14 ah suimilaam pakhat ah meng 50-70 thazaang in Chin ramkulh ah a hraang i Chin ramkulh hmun kip ah thlichia ruang har a tong mi tampi an um tiah theih a si. Credite; The Hakha Post