BREAKING NEWS; Norway nih Kawlram mipi thawngpang tha kho taktak bak an kan thanh!!

Kawlram Mipi Bomhchanhnak Ka Peek Peng Ko Hna Lai-Norway
===============
Myanmar mipi hna i Democracy ngah khawhnak an khual lam ah pehzulh in bomchanhnak kan peek peng ko hna lai tiah Norway Embassy nih cathanh a chuah. Tuni September ni 15, International democracy ni ah Myanmar ram kongkau he pehtlai in Norway Embassy nih a tubantuk in cathanh a chuah nak hi a si.

Myanmar democracy thlen khawhnak le daihnak cu bomh peekchanhnak ah Norway ram aa teltum ve nak sector (Section) ah a zungzal in bomhnak cu ka peek ko hna lai tiah an langhter. Myanmar ram ah tuni cu, Mipi hna a tu caan ah congah awk a tlak mi an ngah khawh lomi mipi nawl ngeihnak hna le zalonnak a um nak kong an kan theihtertu(hmuhsak) ni a si.

Ram tampi hna nih an ton cia bantukin Democarcy goal tung hmuitimh pakhat a si bantuk in caan saupi chungh rak pah (tuar) mi a taktak ah a cang mi thil pakhat zong a si, ti zongin an langhter.

Tamu ah ti dawpnak seh a firtu pa an tlaih hnu ah an luatter ṭhan, Sagaing ramṭhen, Tamu khuachung Sandako (ဆန္ဒကူး) sang saram sibawi inn ah thilri a firtu mifir pakhat cu nihin September 15, zinglei suimulam 5:00 ah Gorkha mino nih an tlaih tiah theih a si.

Thil a firnak saram sibawi inn ahcun inn ngeitu an umlonak a sau cang i, cu inn ah cun voithum tiang thil a fir cang tiah theih a si. Gorkha mino phu chungtel pakhat nih cun ” nihin zinglei suimilam 4:00 hrawng a luh in bawh a si cang, suimilam 5:00 hrawng ah ti dawpnak seh a fir i a rak chuak, cun sangchung ummi Gorkha mipi nih an tlaih. Cu a firtu ahcun Chinlay le Soetu tiin minung pahnih an i tel.

Nizaan zong ah thing an fir i ruahsur lak ah an zuar rubes 300 an ngah. Hmailei ah thil fir tilo ding in an cawnpiak hna hnu ah kan thlahṭhan hna” tiah a chim. September 4 zaan suimilam 11:00 hrawng ah Zamyu Yadana (ဇမျူရတနာ) sianginn pawng ah misual 5 cu Gorkha mino phu nih an tlaih hna i palik kut ah an ap hna tiah theih a si.

Kalaymyo le Tedim ah Covid -19 zawtnak ngeimi minung 5 an hmuh hna, Sagaing ramṭhen, Kalaymyo ah Covid-19 zawtnak aa chawnhmi minung 2 le Chin ramkulh Tedim pengah Covid-19 zawtnak aa chawnhmi minung 3 kan hmuh hna tiah, SAC ralkap kuttang um ngandamnak lei vuanci zung nih nizaan September 14, zaan suimilam 9:00 ah cathanh an chuah.

Cu an cathanh chung ahcun Myanmar ram pumpi huapin September 12 zaan suimilam 8:00 in September 13, zaan suimilam 8:00 chung tiang Covid zawtnak a ngei tiah fehter mi mizaw hi minung 299 an si tiah an langhter. Cu an langhtermi chungah Sagaing ramṭhen chungin Covid-29 zawtnnak a ngei tiah fehter mi mizaw 11 an si i, cu chung in minung 2 cu Kalaymyo in an si tiah an langhter.

Kalaymyo in Covid zawtnak ruangah a damlo mi minung 2 hna cu ihnak 300 tlum sizungpi ah thlopbul an si tiah tualchung mi nih cun an chim nain, zeitin dah cu zawtnak an i chawnh ningcang a si timi bel fiang in theihmi a um lo. Ṭuanvo ngeitu hna nih Covid -19 zawtnak i chawnh kong ah an mah he pehtlaihnak a ngeimi hna cu dothlatnak tuah in um kal riakhiah piak an herh tiah tualchung mi cheukhat nih an chim.

Covid-19 zawtnak aa chawnhmi hna chung in 80% cu raikhamsi aa chunlo mi an si i, 15.9% cu raikhamsi voikhat aa chun mi an si, cun 4% cu raikhamsi tlamtling in aa chun mi an si i 0.1% cu raikham si tlamtling i chunh hnu ah aa chun nolh ṭhanmi an si tiah SAC ralkap kuttang um ngamdamnak lei vuanci department nih cathanh an chuah.

Ayeyarwady tiva ah SAC ralkap tilawng nihnih chung bomb puahhnawh an tong, ralkap 5 an thi, Sagaing ramṭhen, Myaung peng Ayaryarwady tiva ah petrol phurtu tilawng runvennak a tuahtu SAC ralkap tilawng cu drone hmang in kahdohnak an tuah hna i a thi mi zong an um tiah Wings Of The Irrawaddy nih an thanh tiah theih a si.

SAC ralkap thazaang 50 nih zulhmi tilawng cu nihin September 15, zinglei suimilam 11:00 ah drone in bomb thlakhnawh an ton caah SAC ralkap 3 an thi, hliamhma tuarmi an tam. Nizaan September 14, zinglei suimilam 10:30 hrawng zongah PT Power petrol a phurtu tilawng runvennak a tuahtu SAC ralkap tilawng cu bomb thlakhnawh an ton caah ralkap 2 an thi tiah theih a si.

Cu kahdohnak cu CDSOM, YF Dronr Team le Wings Of The Irrawaddy phufonh nih an kahdoh hna. Bomb a tak cu a man a fahtuk caah kan hmang kholo, Drone hman ding in serchommi bomb cu hrang a tlai na in, hma a kallo leng ah nihin tiang bawmhnak zeimanh kan ngahlo caah bawmhchanhnak tampi kan herhko tiah an chim. Maylatt Athan

Paletwa peng ah, kawm(fangvoi) a tlat liomi bomb aa lamh sual caah faak ngaiin hliam a pu!!! Chin ramkulh, Paletwa peng, Ngapuai(ငပွဲ) khua mi, U Thein Aung cu, September 9 zinglei sml 11 luan hrawng lochung kawm a tlat lio ah bomb aa lamh sual caah fak ngaiin ai hliam tiah theih a si.

U Thein Aung cu ai hliam le cangka in Paletwa Siinn ah an kalpi i, a kee khatlei cu a hliamhma a fah ngai caah, an tan piak tiah theih a si. “Amah hi fa pakhat a ngei i, lo tuahin paw aa cawmmi an si caah siinn umthutnak kongkau ah phaisa bomhnak a herh ko tiah khuami sinin theih a si.

Paletwa khuachung ah, AA le SAC ralkap kar kahdohnak ruangah, lo chung zongah vawlei chung phummi bomb a kenkip ah an tarh i lo kal zong ah kan nunnak caah tihnung a si tiah khuami hna nih an chim chap.

A luancia August 24 lio zong ah khan, Abaungthar khua mi a tlaumi pa pakhat an kawl lio ah, nu pakhat zong bomb aa lamh sual caah a nunnak a rak liam cang. Paletwa peng chung ah hin, 2022 kum chung ah, bomb lamh sualnakin ke bul mi le mitcaw mi dihlak hi minung 10 hrawng an um cang tiah theih a si.

Thailand Ram Kanchanaburi District Ah Myanmar Mi 48 Tlaih An Tong!, Thailand ram Kanchanaburi District ah phungning loin a lutmi Myanmar rammi minung 48 cu september 13 zaan suimilam 10 hrawngah Thailand ram Wang Karek khua check gate ah Thailand rammi minung pali nih khalhmi mawtaw cungah district tuanvo nih chekhlatnak ngeitu hna i myanmar mi minung 48 an tlaih hna tiah, theih a si.

Myanmar rammi hna cu agent sinah minung pakhat nih baht 20000 in 25000 kar pek in phungninglo riantuan ah a rak lutmi an si, kal an i timhnak hmun hna cu, Bangkok, Kanchanaburi, Phetchaburi, Nonthaburi, Samut Sakhon, Larkbury hna an si.

Mawtaw in a rak phurtu minung pali hna cu Thailand mi an si i, agent zong an si chih tiah an thanh. Tlaih a tongmi hna cu Thailand sii-zung ah an ngandamnak an chekhlat hna i phungning bantukin dan-tatnak pek ding in Palik sakhaan ah kuat an si.

Yeephyo peng, sualnak ngeilo thilzuar pa pahnih cu SAC ralkap nih an tlaih hna, Tanintharyi ramthen, Htawai pengkomh, Yeephyo peng, Hnan Kywae khua ah, nihin September 15 zinglei ah mah inn teah thil a zuar mi pa pahnih cu, SAC ralkap nih aruang um loin an tlaih hna i, motor in an kal pi hna tiah theih a si.

SAC ralkap hna nih Ko Lwin Ooo le Ko AJu hna cu zinglei suimilam 10 hrawngah Vigo mawttaw he an ra i an tlaih hna hnu ah anmah duhnak lei ah an kalpi hna hi a si. “Hi pahnih hna hi inn teah dawr a ong i thil a zuar cuahmah mi an si, cycle he khuachung ah i chawh in an zuar caan zong a um, tutan ah hin zeiruangah dah an tlaih timi tu cu kan thei lo” tiah khuami pakhat nih Mizzima ah a chim tiah theih a si.

Myaing Peng Palik Sinin MVRF Nih Meithal Le Kuan Tam Ngai An Lak, Magway ramṭhen, Myaing peng Taungsone(တောင် စုံ) khua pawngah ral a vengmi palik 8 cu nizan September 14 zaanlei sml 1:00 ah MVRF nih an kah hna hi a si, cu kahdohnak ahcun palik pakhat a thi i, hriamnam zong an lak, tiah theih a si. “Myaing peng ah ralvengtu SAC kuttang um palik 8 cu Myaing Villages Revolution Front(MVRF)nih kan kah hna i palik Shin Khant a thi, an meithal le kuan zong kan lak” tiah MVRF in chimphuannak nawlngeitu nih a chim.

“Palik 8 cu Taungsone khua pawng well-2 zinan chuannak lei kap an kal lioah kan kah hna i, palik 1 kan thah. Meithal G3 zun 1, kuan 115, kuan bawm 1, phone 1, tangka kyats sing 1 le zung rianṭuannak card kan laak,” tiah MVRF in chimphuannak nawlngeitu Thu Rein nih a chim. Cu kahdohnak ah SAC kuttang palik 7 cu an zam i, palik 1 hliamhma fak ngaiin a pu. MVRS lei in ralkap pakhat meithal kuan nih a khen i, tualchung mi pakhat zong hliamhma a pu, tiah theih a si.

Taiwan Cu Dollars 4.5 Billion Tlukman Hriamnam Zuarh Ding In, US Senate Nih An Fehter! China nih a tlerhkhonh cuahmahmi Taiwan caah US Senate nih US $ 4.5 billion tlukman hriamnam zuarh ding in an fehter tiah, theih a si. US nih cun Taiwan hi kum tampi hriamnam a rak zuarh bel cang i, Senate Foreign Relations Committee nih september 14 ni ah khan a tu bantuk in Taiwan humhimnak caah 4.5 billion cu kum 4 chungah zuarh dingin hnatlaknak an ngeih hi a si.

Senate Foreign Relations Committee nih cun ramhnih kar pehtlaihnak a that deuhnak ding ah Taiwan Policy Act zong an cohlan i an fehter colh tiah, theih a si. US nih China he raltuknak si lo le ramhnih kar i ngiarnak cu um hlah seh ti kan duh nain Jeo Biden hruaimi cozah nih cun Taiwan kan dirkamhnak cu fiang hlang tein kan langhter a hau tiah, Democrat Senator Bob Menandez nih a chim. Taiwan nih a mah tein a ram a runven khawhnak dingah a tu bantuk in runvennak hriamnam 4.5 billion man zyarh ding in hnatlaknak kan ngeihmi a si tiah, senate pakhat nih cun a chim ve.

Pauk Peng Sinzar Khua Pawng Ah Thah A Tongmi Ruak Panga An Char, Magway ramṭhen, Pakokku pengkomh Pauk peng Sinzar(ဆင်ဇာ) khua lampialnak chuah ah nizan September 14 zinglei ah thah a tongmi ruak panga kan hmuh, tiah mi bawmchantu phu sinin theih a si. “Pintaung khuami Maung Aye(54) Thitchukone(သစ်ချိုကုန်း) khuami Naing Zaw(47) le Min Thet Oo(18), Wataw khuami Aung Myint(52), Htan Maung(17) hna cu Pauk khua in thil cawk dingah an kal i, an kir lei ah Sinzar khua chak ah kah thah an tong,” tiah mi bawmchantu pakhat nih a chim.

Pakokku pengkomh palik he aa naihniam mi pakhat nih, “September 13 zanlei ah Pauk khua in thil cawk dingah a kalmi minung 5 cu an kir lei Sinzar khua chak ah hngalh lomi minung 8 nih an bawh hna i, an kah thah hna. A thimi hna hi tualchung mi sawhsawh an si i, ramkhel kong ah aa teltum mi an si lo, tiah theih a si.

Cu kong he pehtlai in Pauk peng palik nih checkhlatnak an tuah,” tiah a chim. September 11 lio zong ah Pakokku pengkomh Pauk peng Didauhkwin(ဒီးဒုတ်ကွင်း) khua pawng ah thil cawk ding in a kalmi tualchung minung 3 zong kah thah an rak tong i, an cycle 3 zong chuh an tong, tiah tualchung mi hna nih an chim.

Yangon, Yekyi Le Palaw Ah SAC Ralkap Kuttang Rianṭuantu Khuabawi Pathum Kah Thah An Tong, Yangon ramṭhen, Kunchangone(ကွမ်းခြံကုန်း) pengah SAC ralkap kuttang rianṭuantu khuabawi Soe Aung cu nizan September 14 ah kah thah a tong, tiah theih a si. Nizan September 14 zaan sml 7:00-8:00 karah Yangon ramṭhen, Kunchangone peng Tawku khua, khuabawi Soe Aung cu a inncung an kai hnawh i, meithal in an kahthah hi a si, tiah theih a si.

“Soe Aung cu amah inn lial ah an kahthah le cangka SAC Ralkap motor an phan colh. Tawku khua cu ralkap nih an kulh dih,” tiah tualchung mi pakhat nih a chim. Ayeyawaddy ramṭhen, Yekyi peng Zayethla(ဇရပ်လှ) khua, SAC ralkap kuttang rianṭuantu khuabawipa Tar Bu(တာဘူး) cu nizan September 14 zanlei sml 3:00 ah cycle in a kal lioah kah thah a tong i, a hmun ah a thi colh. Cu hnu tlawmpal mins 20 hrawng ah ralkap an phan i, a ruak cu an lak, tiah tualchung mi pakhat nih a chim.

Cu lawng siloin Tanintharyi ramṭhen, Palaw peng ah September 13 zing sml 11:05 ah Taungyakan(တောင်ယာကမ်း) khua, khua bawipa Yu Naing cu hngalh lomi minung 5 in an kah thah. Myeik-Dawei lamkam tiluhor ah a ruak cu an hlonh, tiah tualchung mi hna sinin theih a si.

Yelaykyun Hmunram Ah PDF Ṭangṭi Phu Hna Nih SAC Ralkap Bomb An Puahhnawh Hna Caah Ralkap 8 An Thi, Magway ramṭhen, Yelaykyun(ရေလယ်ကျွန်း) hmunram ah rallam a sialmi SAC ralkap (Khah Mah Yah 101) cu PDF ṭangṭi phu hna nih, bomb kan puahhnawh hna caah SAC ralkap 8 an thi, tiah Black Wolf – People’s Defense Force – MDY in chimphuannak nawlngeitu Bawino Ta Maing nih a chim.

September 6 zing sml 11:30 ah Pauktawkyi(ပေါက်တောကြီး) in Yelaykyun hmun lei ah rallam a sialmi SAC ralkap (Khah Mah Yah 101) cu, Pauktawkyi khuahlun tlang in an kai lioah PDF ṭangṭi phu hna nih, bomb lung 9 an puahhnawh hna caah SAC ralkap sergeant pakhat telh in 8 an thi, hliamhma pumi zong an tam, tiah theih a si.

“A ruang tampi ruangah kahdohnak kong hi tuan deuh in kan thanh kho lo. Uico pawl cu zeitik caan paoh ah rallam an sial khawh i, an duhnak paoh ah an kal kho. September 14 tiang cu dirhmun a ṭha lo ngaingai, kahdohnak pehtlai in a chuak kho. Mizapi nih hriamnam nan kan bawmh khawh ahcun dohthlennak hi a rau ti lai lo,” tiah Black Wolf – People’s Defense Force – MDY in chimphuannak nawlngeitu nih a chim.

SAC ralkap a thimi le hliamhma pumi hna cu pawngkam khuate phungki an umnak ah an kalpi hna. Pauktawkyun khua hlun lei ah hliamhma pumi a va chiatu SAC ralkap pawl cu, bomb kan puahhnawh ṭhan hna lai kan ti ko nain, tualchung mi an tlaih hna caah kan puah ṭhan hna lo,” tiah PDF nih an langhter. Tutan kahdohnak ah Black Wolf PDF (MDY) Battalion 3, Companny(3), People’s Defense Force Mandalay Battalion 3, Setawkyi PDF le Shwe Lal Kyun LPDF (SLK LPDF) ၊ KNT hna i bawm in an tuah mi a si tiah theih a si.

Kyaukpantaung Peng Ah Motor Pahsualnak A Chuak I, Minung 11 Leng An Nunnak A Liam, Aa Hliammi An Tam, Mandalay ramṭhen, Kyaukpantaung(ကျောင်းပန်းတောင်း) peng Ziphyokone(ဇီးဖြူကုန်း) khua chak ah khualtlawng a phutmi Express mawtaw pahnih le a dang motor pakhat cu, nizan September 14 zan sml 8:45 ah pahsualnak a chuah tiah theih a si.

“Cuti pahsualnak ruangah a thimi ruak 11 kan char hna i, a thimi le hliamhma pumi an dihlak 30 cung an phan kho”, tiah bawmchantu hna nih an chim. “Hi motor pathum cu an i pah sual ruangah a thimi ruak 11 kan char, Hliamhma pumi zong an tam, cucaah rianrang tein thi an herh ko”, tiah bawmchantu pakhat nih a chim.

KPG Update News nih cun, “A thimi hna hi minung 14 an si i, 15 cu an phan men lai. Ruak 12 cu fehter a si cang,” tiah an langhter. Khualtlawng motor pahnih ah khualtlawng aa citmi hna hi a tlawm bik 60 cu an si lai, tiah zumh a si ko nain fiang tein hngalh a si rih lo, tiah a thimi le hliamhma pumi bawmchantu pakhat nih cun a chim.

United League Of Arakan/Arakan Army(ULA/AA) Nih Emergency Cathanh An Chuah, September zarhhnihnak thok in SAC nih vanlawng, tilawng, motor le ke in Rakhine ram chungah ralkap thazaang an chap pinah hriamnam le zen-kuan tam ngai an chap. Cu lawng si loin mi sawhsawh(civil) motor in a thli tein an um-kal lengmang. Cucaah ti lam le tlang lam vialte cu AA nih chekhlatnak kan tuah cang lai, tiah nizan September 14 ah United League Of Arakan(ULA) nih cathanh an chuah.

September zarkhatnak lio kahdohnak ah SAC lei in a thimi le hliamhma pumi an tam tuk caah Rakhine ramkulh le Bangladesh ramri pawng mengtung No. 40 sakhan le Khah Mah Yah 352 Battalion sakhan telh in Paletwa hmun cheukhat hna cu SAC nih Jet Fighter in bomb an thlak, tiah an langhter. Rakhine le Paletwa hmunram chungah kahdohnak a fak i, kakip hmunkip zongah kahdohnak a chuakmi a si cang caah ti lam le tlang lam hna cu AA nih chekhlatnak kan tuah cang lai, tiah ULA/AA nih an ca thanh ah an langhter.

Cucaah motor ngeimi hna nih khualtlawn nan i timh tikah Rakhine cozah sinah thawng nan theihter hmasa lai. Khual nan tlawn tik zongah AA nih chekhlatnak an in tuah hna lai i, cu hnu lawng ah nan lut chuak kho cang lai. Thawng theihter loin motor lut chuak nan um i, thil poipang a um sual ahcun ṭuanvo kan in la hna lai lo, tiah an cathanh an chuah. Crd-The Chin Post