Breaking News; Nizaan Hakha lamtonnak ah tlaih mi Kawlpa pakhat an velhnak ah a thi!

Nizaan Hakha lamtonnak ah tlaih mi Kawlpa pakhat an velhnak ah a thi
=========
Nizaan November 2, Hakha lamtonnak ah Kawl ralkap le palek nih an tlaih mi hna lak ah Kawlpa pakhat an velhnak ah a thi, tiah kan theih.

“An chim ning aa dang cio. An velhnak ahcun sidawh a si ko. Amin le mizei, khoika ra mi tibantuk cu kan hngal kho cio lo. Kawlpa an velhnak ah a thi, tiin kan theih cio,” tiah khuami pakhat nih The Hakha Times ah a chim.
November 2 chunlai ah hin Hakha lamtonnak le Sanpiah Sawng pawng (ahlan Kyaw) ah mi an chek i a tlawm bik minung 10 motor in an kalpi hna.

Cun, November 1 zaan, Hakha lamtonnak (Pale store 2 hmai) ah a tlawm bik minung 5 an rak tlaih bal cang hna.

Dalaan ruang ah Ralhrang nih Rev. Van Cem inn kan chuh, tiah ca an taar i amah zong tlaih ding ah kawl. Hakha Cawbuk Sang um Rev. Van Cem cu Dalaan ruang ah Ralhrang nih a inn an chuh, amah zong tlaih ding ah an kawl len, tiah kan theih.

“Ralhrang leitang Dalaan hmursau rual hna nih thi ding in an report hnu ah an tlaih i Pathian thawnnak nih a khamh i a luat than. Cu hnu October 29 ah ralhrang pawl nih tlaih nolh ding in an kawl than,” tiah khuami pakhat nih The Hakha Times ah a chim.

Rev.Van Cem cu a inn an bauh i thilri an lak leng ah a inn tawh an hrenh i kan ting (chuh) cang tiah ca an tar, tiah kan theih. Cun, an inn pawngkam minung umlonak inn pawl zong an bauh hna i thil an lak pin ah dum chung i an hmuh mi thingthei le haanghnah an tawh (lawh) dih, tiah kan theih.

CDF-Tonzang sin ah Council ralkap Pakhat aa fon. Shan ramkulh, Mongyawng khua hrambunh Kha La Ya – 335 ralhraang battalion in Ralkap Hau En Lian nih September 7 ah rammi zapi lei ah ttang in ralhraang a chuahtak hna i November 2 ah CDF-Tonzaang sin ah aa fon.

“Min Aung Hlaing ralkap chung ah riantuan ka duh ti lo ca ah October 7 ah rammi sin ah kaa fon cangĀ“ ti in nihin November 2 ah CDF-Tonzang sin ah thawng a kan thanh i lunglawm tein kan don,” tiah CDF-Tonzang nih thawng an thanh.
(Burmese)

Myaung peng ah ralhraang motor Bomh puah an tong; palek le ralhraang 15 nak tlawm lo an thi. Sagaing ramthen, Myaung peng, Bomyattha khua thlanglei Puaktaw tiva hlei pawng ah ralhraang motor bomb an puah hna caah 15 nak tlawm lo an thi tiah kan theih.

Myaung peng tangti phu 10 i bawm in November 2 zaanlei suimilaam 2:30 hrawng ah ralhraang motor pathum cu Bomb in voi hra kan puah hna tiah tangti phu nih an chim. Bomb puah ruang ah motor chung um palek le ralhraang hna cu an i hlerh dih i 15 nak tlawm lo an thi. Mizapi vengtu lei in hliam tuar kan um lo tiah an chim.

October 30 ah ram le miphun ca ah man ngei tein a thi mi paraltha Eain Sat caah phuba kan hlam mi a si tiah tangti chungtel pakhat nih a chim. Ref.DVB