Nihin Kan Theih Khawh Mi Chungin Thawngpang Chia Fonh!
============================
Sagaing ramṭhen, Wetlet peng ah SAC ralhrang nih mipi 2 an kahthah hna pinah khuate 2 zong an khanghpiak hna ca ah inn 15 a ciam, tiah Shwebo pengkomh No. 15 Battalion in ṭuanvo ngeitu pakhat nih nihin ah a chim. June 22, zinglei suimilam 8:30 tluk ah Wetlet khuapi in thazaang 70 hrawng a rak chuakmi SAC ralhrang pawl cu Tha-hpan-kone khua le Ta-kaung-min khua karlak ah kahdoh an tong.
Cucaah Ta-kaung-min khuami meheh a congmi pa Nine Soe (kum 30) cu meithal in an kah i an tlaih. Cuhnu ah an hremnak in a lu hmun 3 ah a kuai ca ah a nunnak a liam, tiah theih a si. “Nine Soe hi meheh a conghnak hmun an kah i an tlaih, cuhnu ah meithal in a lu an tuknak ah hmun 3 in lu cu a kuai ca ah a thih hi asi.
Pu Sein Myint zong thingkung cung a kainak hmun ah SAC ralhrang nih meithal in an kahthah ve. Thah a tongmi 2 hna hi Ta-kaung-min khuami an si” tiah Shwebo pengkomh No. 15 Battalion in ṭuanvo ngeitu pakhat nih Khit thit ah a chim. Magway ramthen Pakukko peng, Poukdaw khua ah June 20 zan an ihkar ah chungkhar nu lawngte minung 5 hna cu thah an tong tiah kan theih.
Thah a tong mi hna hi chungkhat sahlawh lawngte nu minung 5 an si i meithal le nam hman in a thih hi a si. “Zan an ih kar zantim 12 ah mizei titheih lo mi minung 5/6 hrawng nih an thah hna tiah kan theih. Thah a tongmi chungin an tapa pakhat zong a luan cio zarh lio ah an rak thah bal ve. SAC ralhrang nih checkhlatnak zong an rak tuah.”tiah Pakkuko khuami pakhat nih a chim.
Thah a tongmi hna hi Sein Sein Aye (kum 42),Han Sein Nywe (kum 39), Yar Moe Aung (kum 14), Khin Mar Lyn (kum 28) le Aye Thi Da (kum 25) hna an si. An ruak cu June 21 ah an vui hna tiah kan theih. Mandalay ramṭhen, Myingyan peng, Yunghtu khua thlanhmun pawng ah SAC ralkap le PDF kar kahdohnak a chuak i PDF ralkap 5 an thi, 1 hliamhma a pu, tiah 27 Revolution Force nih an thanh.
June 20 zan suimilam 7:30 hrawng ah Myingyan pengkomh Battalion 1(27 Revolution Force) le Myingyan pengkomh Battalion 8 in PDF ralkap 20 cu cycle in an kal lio ah SAC ralkap nih an kah hna, tiah theih a si. “SAC ralkap lei nih thawngpang an theih chung caah a si men lai, Yunghtu khua thlanhmun pawng in an kan bawh. Kan ralkap 10 cu cycle in an kal lio ah SAC ralkap nih an kah hna i, cycle 2 le ralkap 4 an luat,” tiah 27 Revolution Force in ṭuanvo ngeitu nih a chim.
Cu kahdohnak hmun ah cun kan ralkap 4 cu an thi colh. Sii-inn ah 2 an phan i ralkap pakhat hi a thi tam tuk a chuah caah a nunnak a liam ṭhan, tiah a chim chap. SAC ralkap nih PDF cycle 3, M 79 zun 2, meithal zun 2 telh in meithal zun 7, drone 1, 40mm lung 2, drone bomb lung 4, meithal kuan le kuanbawm hna zong an chuh hna, tiah theih a si.
PDF ruak hna cu SAC ralkap nih tualchung mi an fial hna i an khanghter hna, tiah theih a si. A luancia April 12 lio zong ah Yunghtu khua kam ah SAC ralkap le PDF kar kahdohnak a rak chuak i SAC ralkap 10 leng an rak thi, PDF lei in 2 an nunnak a rak liam ve, tiah theih a si.
Taninthary ramṭhen, Palaw peng ah kahdohnak a chuak i SAC lei 10 an thi tiah Palaw PDF nih an thanh. Pawatkone khuate pawng ah phu 3 in kahdohnak a tuah mi SAC ralkap pawl an kah hna i SAC ralkap 10 hrawng an thi i ruak 1 zong an hmuh khawh tiah an langhter. June 20 chun sml 11:40am hrawng ah Kadece khuate in SAC ralkap phukhat,
Pawatkone khua, Pyidaungsu lam lei in phu 2 tiah phu 3 ṭhen in thazang 200 hrawng in a rak lut mi SAC ralkap pawl PDF phufonh nih an kah hna i June 21 zaanlei sml 7:00pm tiang kahdohnak a fak. SAC ralkap 10 hrawng an thi i ruak 1 zong an lak tiah an langhter. Kahdohnak chung ah Myeik PDF B01 le adang PDF phu pawl bawm in kahdohnak an tuah hi a si i No.1 Battalion in hriamtlai 1 ram le miphun caah a nunak a pek tiah theih a si.
Sagaing ramṭhen, Kalay peng thlanglei ah a um mi ni chuahlei Santha khuachung, June 21 zinglei sml 9:00am luan hrawng ah SAC ralkap hriamngan a tla i a puah caah kum 5 hngakchia 1 a thi i chungkhar minung 3 an i hliam tiah theih a si. Cu hriamngan cu Kalay Technology University ah hmunhma a khuar mi SAC ralkap pawl nih an kah mi a si i ni chuahlei Santha khua mipi a khen caah hngakchia 1 a thih i chungkhar minung 3 an i hliam hi a si.
A thi hngakchia te hi a lu ah hriamngan ci nih a khen i hliam a tuar mi kum 40 a nu zong a ke khatlei a bul tiah theih a si. A thi mi hngakchia te i a upa kum 7 hngakchia te zong a lu ah fak ngai in hliam a tuar bantuk in kum 12 a si mi an unu zong fak ngai in aa hliam ve tiah theih a si.
Kalaymyo ah SAC ralkap nih kah mi hriamngan ruang ah June 16 in June 20 tiang ah sualnak ngei lo mipi 4 an thi cang i hliam a tuar mi 8 an um cang tiah khuami hna nih RFA ah an chim. Hpakan peng ah a um mi KIA zung SAC ralkap nih an luh hnawh hna lio ah minung 3 an thi i minung 7 an i hliam tiah theih a si.
Mawṭaw 5 in a rak raa mi SAC ralkap pawl nih an kah hna hmasa hna caah minung 3 nak tlawm lo kuan nih an lu a pemh caah an nunnak a liam i minung 7 Hpakan sizung ah an kalpi hna tiah theih a si. SAC ralkap nih minung 30 leng an tlaih hna tiah khuami nih The 74 Media ah an chim. SAC ralkap pawl nih KIA zung cu an khangh i nan remh ṭhan lai lo tiah an tlerh hna tiah cuka khua ah a um mi minung 1 nih The 74 Media ah a chim.