Sagaing-Shwebo Lampi Kahdohnak Ah PDF 14 An Nunnak Liam, Pale Peng Ah SAC Ralhrang Nih Bomb A Thlak; Phungki 1 Telh In Mipi 10 An Nunnak A Liam
=========
2023, June 28, nihin zing ah Sagaing ramṭhen, Sagaing-Shwebo lampi cung ah mipi ralkap PDF hna le SAC ralhrang kar ah kahdohnak a chuak i, PDF ralkap 14 an nunnak a liam, tiah theih a si. Ram le miphun caah nunnak a petu hna cu Sagaing pengkomh Battalion 3 in minung 9 an si i, a dang 5 hna cu mizei hriamtlai phu ti fianter khawh an si rih lo, tiah Tachileik News Agency nih a ṭial.
“SAC ralhrang nih rallam an sial caah kham dingin kal kan i timh lio ah kahdohnak a chuah hi a si. SAC ralhrang lei in sentari cawngtu pawl he kan i kahdoh hi a si” tiah Sagaing pengkomh PDF Battalion 3 in ṭuanvo ngeitu pakhat nih a chim.
Atu tiang ah nunnak a petu pasalṭha hna ruak an la kho rih hna lo. SAC ralhrang nih Ta-laing-kyun khua an luhhnawh pinah Sint-gaing khua zong mei in an khangh piak hna, tiah theih a si. A luancia June 25 zong ah Sagaing peng, Kintaw khua pawng um PDF sakhan pakhat cu SAC ralhrang nih an luhhnawh caah PDF ralkap 17 an nunnak a liam i, hriamthil pawl zong an laak piak chih hna, tiah theih chih a si.
Sagaing ramṭhen, Pale peng, Nyaung-kone khua cu June 27, zanlei sang ah SAC ralhrang nih cunglei in bomb a thlak caah phungki 1 telh in mipi 10 an nunnak a liam, tiah theih a si. Nyaung-kone khua cu a ruang umlo in SAC ralhrang nih jet vanlawng pakhat in voi 2 tiang bomb 5 a thlak caah phungki pakhat telh in pa 7 le nu 3 an nunnak a liam hi a si, tiah Pale Joker PDF sin in theih a si.
“Zeiruang ah atu bantuk in bomb a rak thlak timi kan thei lo. Kahdohnak zong a um lo, mah inn le lo umko mi mipi hna cu tinhchih tein bomb a rak thlakhnawh hna” tiah Pale Joker PDF in ṭuanvo ngeitu pakhat nih Tachileik News ah a chim. SAC ralhrang nih atu bantuk in bomb a thlakmi ruang ah mipi inn 13 le phungki sianginn 1 zong a rawk chih, tiah theih a si.
Myanmar ramchung ah innlo a zaamtak mi 1.8 Million leng (1,851,700) an um cang tiah UNHCR nih theihternak a tuah. UNHCR report nih a langhter mi ning ahcun, innlo a zaamtak mi 1.8 million chung ah 1.5 million leng (1,532,700) hi cu hramhram in uknak lak a si hnu ah ramchung le a pawngkam ram hna ah aa dor mi an si i minung 328,000 hi cu hramhram in uknak lak a rak si hlan ah ramchung ah innlo a zaamtak mi hna an si tiah UNHCR nih a chim.
Hramhram in uknak lak a si hnu Sagaing ramṭhen ah innlo a zaamtak mi 765,200 an um i SAC ralkap nih innlo an khangh a tam bik nak hmunhma zong a si tian an thanh. Magway ramṭhen ah minung 205, 600 nih innlo an zaamtak tiah an langhter. Chin ramkulh chung zong ah innlo a zaamtak mi 43,500 an um cang tiah UNHCR report ah hmuh khawh a si.
Mon ram, Ye peng, Hnitkayin khuate ah a um mi palek sakhaan cu KNLA le PDF phufonh nih an kah hna i SAC chungtel 9 an thi tiah Kyapyo phu nih an thanh. A luancia June 25 chun ah Hnitkayin khua palek sakhaan cu KNLA Brigade 6, B27 le PDF phufonh nih an kah hna hi a si i kahdohnak sml 2 leng a rauh hnu ah SAC ralkap 9 an thi i 1 aa hliam tiah theih a si.
Cu palek sakhaan ah palek an um lo ti nain SAC ralkap 30 hrawng nih hmunhma an khuar caah an kah hna hi a si tiah theih a si. Palek sakhaan ah kahdohnak a chuah dih hnu in SAC Helicopter Mi 35 pahnih nih Hnitkayin khua lei ah bom an thlak tiah theih a si.
Cubantuk vanlei bomthlak ruang le hriamngan ralkap (317) nih hriamngan an thlah ruang ah Hnitkayin khua minung 3 an thi tiah theih a si. Hliam a tuar mi 6 hrawng an um i Lamine sizung ah an thlop hna tiah theih a si.