Thawngpang Chia Fonh!
==================
Taningtharyi ramṭhen, Tayatchaung peng, Yange khuachung Inbu sang cu SAC ralkap nih an khangh i, tualchung mi 200 renglo an tlaih hna, tiah tualchung mi nih Khit Thit Media ah an chim.
Tu zinglei ah SAC ralkap nih Yange khua, Inbu sang cu luhhnawh in tualchung mi an umnak innlo cu an khangh nain inn zeizat dah a kangh fiang in theih a si lo. Yange khua mi 200 renglo zong ralphaw caah an tlaih hna, tiah tualchung mi nih cun an chim.
Yange khua mi tam deuh cu Thailand ah rian a ṭuan mi an tam caah Thailand ramchuak inchung thilri a ngei mi hna cu SAC ralkap nih an hrawhpiak hna pin ah thilri mansung hna cu an fir hna, tiah Khit Thit Media nih a ṭial.
Mandalay ramṭhen, Tha-beik-kyin peng, Koe-bin khua ah SAC ralhrang nih an thahmi hna mipi ruak 3 cu nizan June 15 zing ah an hmuh hna, tiah Thabeikkyin Revolution-TR nih June 16 nihin ah thawng a thanh.
Thah a tongmi hna hi pa lawngte an si i, Koe-bin khuami cu an si lo. SAC ralhrang nih tlaih in an thahmi hna an si nain khoika khuami dah an si ti cu kan thei fiang rih lo, tiah an langhter. Tualchungmi hna nih cun “SAC ralhrang pawl nih bomb hmanh dingin an kal lio ah thah a tongmi 3 hna hi thilri an phurhter hna. Bomb an hmanh dih hnu ah mi dang an chimh sual hna lai ti ah an thah hna hi a si lai” tiah an chim.
Nizan June 15 ah Magway ramṭhen, Htilin peng ah SAC ralhrang le PDF karlak ah kahdohnak a chuak i, cu kahdohnak ah PDF minung 2 nih ram le miphun caah nunnak an pek i, pasalṭha pakhat zong a tlau, tiah theih a si. Htlin khuapi in a chuakmi SAC ralhrang Lah-khah-yiah (50) Battalion, pyusawhti fonh thazaang 150 hrawng hna cu a luancia June 14 ah Ohntwe (အုန်းတွဲ) khua ah zaan an riak i, mipi thilri pawl an firpiak hna hnu June 15 chun ah atu bantuk in tualchung hriamtlai hna nih an kahdoh hna hi a si, tiah theih a si.
“Ohntwe khua cu ralhrang pawl nih June 14 ah kan luhhnawh i, June 15 chun ah ralhrang a taangmi an um ko lai ti ruah ah kan kal. Mah lio ah rauhlopi in sentari cawngmi ralhrang pawl he kan i tong. Kan kal lai hi thawng an rak theih cang. Khua in aa chuahter mi ralhrang pawl zong nih suimilam 2:00 hrawng a rauh hnu ah kan hnu lei in an kan kah ve i, karlak ceh in an kan kah caah mipi ralkap fonh in minung 2 an nunnak a liam hi a si” tiah YRF Htilin in ṭuanvo ngeitu Tha Khin Zaw nih Tachileik News Agency ah a chim.
Ralhrang pawl cu Gangaw pengkomh Battalion 15, 16, 17, YRA Htilin le KKG fonh in an neih hna caah kaphnih karlak kahdohnak a chuah hi a si, tiah theih a si. “A tlaumi mipi ralkap pakhat hi ralhrang pawl nih an tlaih lai ti ah kan zumh. A ruang cu hmai ah a kalmi a si i, kan hmu kho ti lo caah a si. Hriamthil zong aa ken lo” tiah a cunglei upa nih a chim chih.
Hi kahdohnak ah YRA Htilin in Commander Way Yan Lin le ralkap Win Ko Naing nih ram le miphun caah an nunnak an pek i, ralkap Pyi Phyo Aung le Pah-kah-phah chungtel pakhat nih hliamhma an tuar. Ralkap San Oo nih a kan tlau tak pinah PDF fonh in M4 meithal zuun 1 zong kan sung chih, tiah an langhter chih.
2021, February 1 ah SAC ralhrang nih hramhram in nawlngeihnak an laak in June 15, 2023 tiang ah SAC ralhrang le an kuttang hna kut in mipi nu 536 an nunnak a liam cang. Cu chung ah Sagaing ramṭhen ah minung 250 an i tel i, atam biknak hmun a si, tiah Assistance Association for Political Prisoners (Burma) nih cathanh a chuah.
Sagaing ramṭhen, Magway ramṭhen chung ah a lutmi SAC ralhrang chungtel pawl nih nu hna cu tlaih in ningcang lo in thahnawnnak an tuahmi cu a karh ngai ngai, tiah Sagaing ramṭhen chung ralhrial hna zohkhettu chungin nu pakhat nih a chim.
“Ralhrang nih rallam an rak sial i, an kir hnu cun ningcang loin an thahmi hna nu pawl ruak cu hnipuan zong hruk lo in zohchia ngai in hmuh an si hna. Chungkhar lei nih mah bantuk an tonmi kong ah midang nih an theih an duh lo. Tantakmi chungkhar hna ningzak in an um sual lai an phang” tiah a chim chih.
Nu hna hi tualchung hriamtlai phu hna he pehtlaihnak nan ngei tiin an tlaih i an thahmi hna zong an um. Cu pinah duh paoh in hriamngan an kahmi ruang zong ah a thimi an um i, rallam sial in mipi an kan luhhnawh lio ah an kahthahmi hna zong an um i, mipi inn an khangh piak hna lio ah mei nih a kanghchih mi hna zong an tam ngai ve, tiah a chunglei upa nih a chim chih.