Thinlung Lei Damlonak A Ngeimi Nu Ngakchia Voi Tam Ngai A Tlaihhremtu Pa Cu TNLA Nih Dantatnak A Tuah Lai
=========
Shan ramkulh chaklei Namhsan peng, Longtauk khua ah thinlung damlonak a ngeimi kun 16 Nu ngakchia voi tamngai a tlaihhremtu pa Mine Hla Win (kum 23) cu May 17 ah TNLA nih an tlaih i upadi ning in dantatnak kan tuah lai, tiah Ta’ang National Liberation Army (TNLA) nih cathanh a chuah.
Mine Hla Win nih mah ngakchia nu cu 2022 kum December thla thok in thlakhat ah voi khat an khua sianginn ah auh in a tlaihhrem i ngakchia nu cu fa a pawi caah an theih hi a si, tiah theih a si.
“Tlaihrem a tongmi nu ngakchia hi a thlatlin ruang ah mi nih an chawnh zong ah mi a let lomi a si i a umning aa dan caah a nu le pa nih checknak an tuah i fa a pawi cu an ngalh khawh. A nu le pa nih an lemsawi hnu lawng ah anmah khua a simi Mine Hla Win nih a tlaihhrem cu a chimphuan” tiah TNLA nih cathanh an chuahmi ah an langhter.
Nu ngakchia nih a pawimi a fa cu thla 3 a si cang, tiah theih a si.TNLA nih a luancia kum 2021, April, 1 ahkhan kumtlinglo ngakchia a tlaihhremtu pakhat cu thihdan an rakpek bel cang i mizapi hmai ah meithal in an rak kahthah bel cang, tiah theih a si.
Mokha-Cyclone Thlichia Ruang Ah Harnak Tongmi Hna Ca Ah India Cozah Nih Tilawng 3 In Bawmhnak A Pek; Mokha-Cyclone thlichia ruang ah harnak a tongmi Myanmar ram mipi hna ca ah tiin India cozah nih bawmhchanhnak thilri hna le eii-din ding hna cu India ralkap tilawng 3 in a voi khatnak bawmhnak a pek i May 18 chun ah Yangon khuapi um MITT hleidonh ah a kuat, tiah theih a si.
India ralkap tilawng INS- ShivalikINS- Kamorta le INS-Savitri hna cu SAC kuttang ṭuan Yangon ramṭhen lutlaitu vuanci U Soe Thein, Yangon ramṭhen SAC bawizik Zaw Hein, Myanmar ramkong he pehtlaiin ṭuanvo ngeitu India ram aiawhtu (Ambassador of India to Myanmar) H.E.Mr. Vinay Kumar le ṭuanvo ngeitu hna nih an don hna, tiah theih a si.
Bawmhnak an pekmi hna cu MITT hleidonh in SAC nih Mingaladon cunglei sakhan ah an kuat hnu zanlei sang ah SAC ralhrang nih Sittwe khuapi ah vanlawng in an kalpi i thlichia ruang ah harnak a tongmi mipi hna cu bawmhnak pek hna dingin timhlamhnak an ngei, tiah theih a si.
Australia Ram Ah Chin Mino Pakhat Nam Sawhnak In A Nunnak A Liam; Australia ram ah khua a sami Chin ramkulh, Matupi peng Pa Pasawm Lyhym (kum 16) cu May 18, zanlei suimilam 3:00 tluk ah Victoria ramkulh, Melbourne nitlak lei hmun ah ruahlo tuk in nam sawh a ton caah a tonnak hmun ah a nunnak a liam, tiah theih a si.
Mithmutu hna nih “Pasawm cu Bus a hngah lio ah minak pa nih nam in a sawh caah a nunnak a liam hi a si” tiah an chim. Chin mino Pasawm a thattu minak pa cu atu tiang an tlai kho rih lo i ṭuanvo ngeitu palik bawi hna nih an kawlhawl cuahmah liopi a si, tiah theih a si. Nunnak liammi Pasawm cu Melbourne khuapi ah taang 11 a kai liomi a si, tiah kan theih. Credite; Lungmili Post