Breaking News!
Cyclone Thlichia Ruang Ah Chin Mino Pakhat A Nunnak A Liam
==============
Rakhine ramkulh, Toungup peng, Gyoe -gyar -kwin (ကြိုးကြာကွင်:) khua ah khua a sami Chin mino Salai Nay Lin Aung (kum 20) cu Cyclone thlichia ruang ah a nunnak a liam, tiah theih a si. May 14, zing suimilam 11:00 hrawng i Cyclone thlichia hran aa thok lio ah inn hmai lei thingkung a kiakmi nih a nenhchih caah a nunnak a liam, tiah theih a si.
Sittwe Khuapi Ah Cyclone Thlichia Fak Ngai In A Hran Lio ; Atu Cyclone thlichia hi aa thokka lawng a si rih i aa thoknak hmun rili chung ah Cyclone thlichia taktak cu a um ko rih, tiah khuacaan zohthiam Director U Hla Tun nih Popular News ah a chim.
SAC Ralhrang Nih Thli Le Ruah Lak Ah Dawei Khuapi Special Economic Zone Ah Bomb A Thlak; Tanintharyi ramṭhen, Dawei khuapi Special Economic Zone pawng ah SAC ralhrang nih bomb a thlak, tiah theih a si. “May 14, zing suimilam 8:26 tluk ah Myeik khuapi vanlawng bual in Dawei khuapi um Special Economic Zone pawng ah SAC ralhrang nih jet vanlawng in bomb a thlak” tiah, T1 Zone in ṭuanvo ngeitu pakhat nih a chim.
SAC vanlawng nih bomb 2 cu voi khat ah a thlak, a thlaknak hmun hi tualchung hriamtlai phu hna nih ralhrang an rak kah lengmang hnanak a si caah SAC ralhrang nih an humhak khawhlonak hmun zong a si, tiah cunglei upa nih a chim chap.
Pyin Oo Lwin Khua Thlichia Ruangah Thingkung Nenhnak In Pa Pakhat A Nunnak Liam; Mandalay ramṭhen, Pyin Oo Lwin khuapi Ane palik sakhan hmai ah ruahpi le thli a fakngai caah thingkung a kiak mi nih pa pakhat a nanh caah a nunnak a liam tiah theih a si. “May 14, zing suimilam 8:00 tluk ah thlichia le ruahpi a fakngai caah lakphakti dawr in a chuak mi kum 50 hrawng pa pakhat cu thingkung kiakmi nih a nenh caah hmakhat te ah a nunnak a liam” tiah tualchungmi pakhat nih a chim.
Thingkung nenh ruang ah a lu kuai in nunnak a liammi pa cu Pyin Oo Lwin khuapi sizung ah a ruak an kalpi, tiah theih a si. Cu pin ah Shan ramkulh thlanglei Taungkyi khuapi zong Cyclone thlichia ruangah phone le meihri cheukhat an cat i lam ah an tla, inn kulhnak thingrua le a dangdang zong tam ngai an rawk, tiah theih a si.
Thazaang Ṭhawngmi Cyclone Thlichia Cu Sittwe Khua A Luh Lainak Ding Ah Meng 80 Tluk Lawng Aa Duh Cang; Mocha Cyclone thlichia cu Bangladesh rili in dingteo in a rat lio a si i Rakhine ram Sittwe khua chung a luh lai nak ding ah meng 80 tluk lawng aa duh cang tiah khuacan zohnak zung nih May 14 zing suimilam 11:30 a langh ning in ralrin peknak thawng an thanh.
Mah pin ah Rakhine ram Maungdaw khua a luh lai nak ding ah meng 85, Kyaukpyu he meng 100 tluk, Man-aung khua he meng 120 le Bangladesh ram Cox’s Bazar khua he meng 120 tluk lawng aa hlat cang tiah a langh ter chih.
A tu hnu suimilam 36 chungah thazaang thawng mi Cyclone thli chia cu Chin ramkulh, Magway ramthen, Sagaing ramthen le Kachin ramkulh hna ah dingteo in an kal khawh caah a hlan kan in mipi i ralrin ding in a langh ter chih. May 14 zing suimilam 4 in 6 kar ah Rakhine ramkulh cheukhat ah Cyclone thlichia cu thazaang der deuh in thli he ruah he luh hram aa thok i inn le lo rawk le thingkung pur mi zong a um len cang tiah kan theih. Credite; Lungmili Post|