Mizoram, Serchhip Khua Pawng Ah Lainawngtu Ah Lunghrinhmi Pa Pakhat cu Palik Nih An Tlaih Nak Kong Le Mizoram Palik Nih An Myanmar Rammi Nu Pakhat Le Myanmar Rammi Pa Pakhat Cu Bingrang He An Tlaih Nak Hna Kong
==================
May 16 zing ah Mizoram ramkulh, Serchhip Bukpui le Chhiahtlang chim veng karlak ah a ruakin hmuh mi Lalsangzuala(kum-31), Mission veng, Aizawl khuapi i khuasa mi thattu ah zumhmi pakhat cu Palik nih nizan May 17 ah an tlaih. Hi lainawnnak kongkau ah ṭuanvo latu ding i rian khinh mi Special Investigation Team(SIT) nih ṭha tein hlathlainak an tuah hnu ah lainawngtu ah ruah mi Laldinthara(kum-42), Khuaruhlian khua mi cu an tlaih.
Laldinthara cu Serchhip palik station ah ap a si. Hi kongkau ah hin midang tlai mi an um rih lo, tiah theih a si. Lainawngtu ah ruahmi Laldinthara nih cun May 16 zinglei ah khan Maxi cab(Sumo) in Aizawl lei a rak panh i Laldinthara a cawlcangning cu palik nih an lunghrinh caah an dawi i, Aizawl palik hna he an tlaih hnu ah lainawngtu a si kong zong amah tein aa phuang cang, tiah an chim.
May 16 zinglei ah khan Lalsangzuala cu Serchhip Bukpui le Chhiahtlang karlak lamthlang ah a ruak in hmuh a si i, a ruak an hmuhnak lampi ah thisen tam ngai zong hmuh a si. Lalsangzuala nih cun a fa sem kum tling lo pakhat le a nupi a kaltak hna, tiah Mizo thawngzamhtu hna nih an ṭial.
Mizoram Palik Nih An Myanmar Rammi Nu Pakhat Le Myanmar Rammi Pa Pakhat Cu Bingrang He An Tlaih Hna-India, Mizoram ramkulh, Aizawl khuapi ah Myanmar rammi pa pakhat le Mizoram mi nu pakhat hna cu May 18 ah ritnak siivai Biangrang 414 gram tluk a ritmi he Mizoram palik nih an tlaih hna, tiah theih a si.
Tlaihkhih a tongmi pa hi Chin ramkulh, Hakha khuapi, Chin Oo Sii sang ah ummi Pu Thang Cung (kum 46) le Mizoram ramkulh, Hnahthial khuapi, Peniel sang ah khua a sami Pi Lalnunsiami (kum 50) hna an si i ritnak siivai an tlaihmi hna cu India tangka in Rupee Sing 200,000 leng man a si. Cu caah ritnak siivai upadi ning in tazacuai an si, tiah Mizoram palik nih an langhter.