Mizoram Champhai District Ramri Ah Myanmar Lei Kalpi Ding Saphu Kep Rupees Sing 44 Man Tluk An Tlaih
=========
India-Myanmar ramri a si mi Mizoram Champhai District chungah Myanmar ram ah kalpi ding Saphu kep a phur tu hna cu Assam ralkap nih an tlaih hna tiah kan theih. June 3 ah Mizoram Aizawl in Myanmar ram lei kalpi dingin Mizoram mi minung 2 cu Champhai District Melbuk le Zokhawthar khua kar ah Assam ralkap nih an tlaih hna hi a si.
Phung ning lo in Myanmar ram lei ah kalpi an timh mi Saphu kep hi 44 kg tluk a rit i India tangka Rupee sing 44 man tluk a si. Saphu cu ramsa lak ah man ngei a si bantuk in a ci tlau lo nak ding in humhak mi ramsa phun khat zong a si tiah kan theih.
Kalay Khua Pawng Sianginn Pakhat SAC Ralhrang Nih Helicopter In A Kah Caah Mipi 1 A Thi, 4 Hliam An Tuar; Sagaing ramṭhen, Kalaymyo peng, Shuhkintha khua um sianginn pakhat SAC ralhrang nih helicopter in a kah caah mipi 1 a nunnak liam i, 3 nih hliamhma an tuar, tiah CNO Upper Chindwin Refion- UCR in ṭuanvo ngeitu pakhat nih a chim.
Nihin June 5, zinglei suimilam 10:30 tluk ah Kalay peng, Letchaung-Yarzagyo lampi um Shuhkintha khua le sianginn cu SAC ralhrang nih helicopter pakhat in minute 5 tluk chung a kah caah mipi pakhat a nunnak liam i, 4 nih hliamhma an tuar hi a si.
“Kalaymyo in a kaimi helicopter a si lai, minute 5 lawng a kah caan hi a rau i, cu hnu ah a kir colh. Kahdohnak zong a um lo, sianginn ah tonpumhnak an ngei ti a theih caah a rak kah hi a si, hriamngan zong in an kah hna, a rawkmi kong ah thawngfiang kan thei dih rih lo” tiah a cunglei upa nih a chim.
Cu pinah chun suimilam 11:37 tluk ah Kalaymyo khuapi chung umhmun a khuarmi SAC ralhrang nih hriamngan voi khat an kah ṭhan caah mipi hna kan i ralrin a herh, tiah CNO Upper Chindwin Refion- UCR nih ralrin peknak an tuahchih.
Chin Ram Ah Mocha Thlichia Ruang Harnak Tongmi Hna Bawmh Ding Ah SAC Ralhrang Nih Facang A Kuat; Chin ramkulh chung ah Mocha thlichia ruang ah harnak a tongmi mipi hna bawmhchanh ding ah tiin SAC ralhrang nih helicopter pakhat in Hakha khuapi ah bawmhnak a kuat, tiah theih a si.
A luancia June 3 ah Kalaymyo khuapi vanlawng bual ah SAC ralhrang nih facang tun 320 a kuat i, a cheu cu cunglei in Hakha khuapi ah a kuat cang. A cheu cu motor in kuat a timh, tiah June 5 ah Zalen nih a langhter. Crdt; Lungmili Post