Mindat Ah Khah-Lah-Yiah 274 In Deputy Battalion Commander SAC Cu Sniper Kahnak In A Thi
=========
Chin ramkulh, Mindat hrambunh Khah-lah-yiah 274 in Deputy Battalion Commander SAC ralhrang bawi (Major) Soe Htet Pine cu Sniper kahnak in a thi, tiah theih a si. May 31 ah Magway ramṭhen ralram hmun pakhat kahdohnak ah a thih hi a si lai, tiah zumh a si.
“Mah kong hi SAC ralhrang sin in leng ah a chuakmi thawngpang a si lai” tiah CDF-Mindat in nawlngeitu pakhat nih a chim. Mindat-Magway ramri ah May thla a zarh 4 naak khan SAC ralhrang thazaang 200 hrawng le tualchung hriamrtlai ṭangṭi phufonh hna karlak ah nifate kahdohnak a chuak.
Cu kahdohnak ah SAC ralhrang 3 naak tlawmlo an thi i, tualchung hriamtlai ṭangṭi phufonh in minung pakhat nih hliamhma fak ngai a tuar caah thinphang ngai a si, tiah The Mindat Post nih June 1 ah a langhter.
Min Hla Peng Ah SAC Ralhrang Nih Ambush Nakin PDF Ralkap 8 An Nunnak A Liam ; Magway ramthen, Min Hla peng De-doh-kan khuapawng ah PDF nih an i cit mi motor pakhat cu SAC ralhrang hna nih Ambush in an kah hna caah PDF minung 8 an nunnak a liam.
May 29 zan suimilam 8 tluk ah kahdohnak a chuah hi a si. A nunnak liam mi 8 hna hi PDF phukomh pathum in an si i raltuk cawn nak in Min Hla khua an rak kir lei ah a tubantuk in ralhrang an Ambush hna hi a si.
“An mah cu the-yet pengkomh ah raltuk an cawn hnu ah an rak kir lei a si. PDF a thi mi hna hi mi zei phu in dah an si hna timi thawngfiang kan hngal rih lo, an mah phu cio in thawngthanh nak an tuah te theo lai” tiah Magway PDF pakhat nih a chim.
“PDF a thi mi 8 an si i meithal zun 7 le kuan zeimaw zat kan sung. A nunnak liam mi PDF hna cu chungkhar lei humhimnak caah thawngthanh nak kan tuah rih lai lo”tiah tangti phu PDF pakhat nih a chim.
May 31 ni ah an i kahnak in falong 4 tluk ah ruak pakhat cu a ke le a paw ah kuanhma he hmuh than a si i Pah-kah-phah lei in a si lai zumh a si.
Aluan cia kum June thla lio zongah May-za-ly hlei cungah motor 2 in hriamngam phur mi PDF hna cu SAC ralhrang nih an rak kah bal hna i PDF 12 an nunnak a rak liam tiah kan theih. Crd;Lungmili Post