Kum 2 Chung Karenni Ramkulh Ah Kahdohnak Voi 1,000 Leng A Chuak, Hriamthil 600 Leng Kan Laak Khawh__KNDF
=========
Karenni ramkulh ah kum 2 chung kahdohnak voi 1,000 leng a chuak i SAC ralhrang sin in hriamngan le hriamhme 600 leng kan laak chih khawh, tiah Karenni Nationalities Defence Force (KNDF) an dirhnak kum 2 tlin camtuak May 31 ah KNDF Chairman Khon Bi Htoo nih a chim.
“Kum 2 chung ah kahdohnak voi 1,000 leng hi KNDF kan i tel kho i, cu kahdohnak ah SAC ralhrang hriamngan le hriamhme 600 leng kan laak khawh pin ah an sakhan hmemi he fonh in 10 laaknak zong ah KNDF kan i tel kho. Battalion hna hriamnam serchuahnak le raltuk thiamnak lei zong ah kan ṭhangcho ngai cang” tiah a cunglei upa nih a chim.
Cu pinah kan hmailei ca zoh tik ah SAC ralhrang a thazaang dernak le kanmah lei kan thazaang a ṭhawnnak kan i theih i, timhlamhnak kan ngeih ahcun atunak in kan hlawh a tling deuh lai, tiah a chimchap. SAC ralhrang kuttang in mipi hna kan luat khawhnak ding caah tiin ram le miphun caah nunnak a petu KNDF chungtel minung 153 an si naak zong a langhter chih.
Karenni ralkap (KA) hruainak hi upat ding le KNDF telh in Karen ramkulh chung um mipi ralkap dihlak lungrualnak cu atu naak in ṭhawnter ding le SAC ralhrang nih mipi ralkap hna karlak ah ṭhencheunak a tuahmi ah ralrin a herhnak zong a chim chih. “Karenni cozah hi Karenni ramkulh chung lawng silo in ram pumpi ca zong ah a ṭhawngmi mizapi cozah uknak a hmu khotu zong a si cang lai” tiah a chimchap.
SAC Ralhrang Thazaang 240,000 Tluk Lawng An Si Cang__NUG; Myanmar ram uknak la tu SAC ralhrang thazaang 240,000 tluk lawng an si cang tiah Ministry of Defence -NUG nih a langh ter. PDF dirh nak kum 2 tlin camtuak May 28 nih ah a tubantuk in SAC ralhrang 240,000 tluk lawng an tangkho tiah an ruah damh hi a si. Ram leng lei nih Myanmar SAC ralhrang thazaang hi sing 3 in sing 5 tiang an si kho tiah an ruahdamh nain a tulio sining ah mah zat cu an si kho lo tiah NUG nih an langh ter fawn.
Uknak lak hnu in kum 2 chung ah SAC ralhrang 30,000 tluk an thi i 10,000 leng hlian an tuar. Mah pin ah uknak tha lo kal tak in mipi sin ah aa fonh mi ralkap le palik 13,000 leng an si cang.
Atu lio ah PDF cu phu 300 leng an um cang i ramthen le pengkomh hmun 250 ah umhmun an khuar hna tiah NUG nih cun a langh ter.
Sidoktaya Peng Kahdohnak Ah CDM Sianghleirun Siangngakchia Asho (Chin) Mino Pakhat A Nunnak Liam; Magway ramṭhen, Sidoktaya peng, Mandatkaing (မဏ္ဍပ်ကိုင်း) khua pawng ah a luancia May 23 ah khan kahdohnak a chuak. Cu kahdohnak ah SAC ralhrang chungtel 3 an thi i 4 nih hliamhma an tuar, People’s Revolution Alliance (PRA-Magway) ralkap pakhat a nunnak a liam, tiah theih a si.
Ram le miphun ca ah a nunnak a petu pasalṭha hi Ngape peng in Asho (Chin) mino pakhat a si i CDM a tuahmi sianghleirun siangngakchia pakhat zong a si, tiah theih a si. “A nih hi tang 10 awngka a si i, Covid-19 ruang ah sianginn a peh kho ti lo. Kum 21 a si i, SAC ralhrang nih uknak a laak ruang ah mipi ralkap PRA ah a lut hmasa bikmi ah aa tel, keimah he neihniam ngaimi kan si ca ah ka ṭa bantuk in ka zoh, bochan awk a tlaak ngaimi zong a si, kai zumh kho hrim lo” tiah nunnak a petu pasalṭha hawikom nih Zalen ah a chim.
Cu kahdohnak ah ṭangṭi phufonh hna a simi People’s Revolution Alliance (PRA-Magway) le Z-Fighter phufonh hna nih kandoh hna i, SAC ralhrang MA-1 meithal zuun khat zong kan laak khawh chih, tiah PRA-Magway nih cathanh an chuah. Credite; Lungmili Post