Pekon Ni 10 Chung Kahdohnak Ah Ralbawi 1 Telh In 27 An Thi, Hriam Tampi An Lak Khawh
==============
Karenni (Kayah) ram, Pekon peng ni 10 chung kahdohnak ah SAC lei ralbawi 1 telh in 27 an thi i hriam pawl zong an lak khawh tiah June 14 ah PDF – Pekon nih an thanh.
SAC ralkap No. 7 raltuk cawnnak telh in Brigade 66 kuttang Battalion pawl nih Pekon peng, Kaungih khua le Setdaw khua lei ah kahdohnak tuah ding in an luh caah PDF- Pekon B1002 le a hawikom phu pawl nih an doh hna, SAC lei ralbawi 1 telh in an zapi 27 an thi i tampi nih hliam an tuar tiah theih a si.
SAC lei a thi mi an tam caah Pekon BSO 7 nih ni 3 chung pehzulh in hriamngan a kah. Kahdohnak chung in MBPDF B1007 chungtel 2 nih ram le miphun caah an nunnak an pek bantuk in hliam a tuar mi cheukhat zong an um tiah theih a si. Kahdohnak chung in MA2 zuun 1, MA3 zuun 1, le kuanzen tampi an lak khawh tiah theih a si.
Myaing Peng, Thayetkua Khua Sakhaan Kahdohnak Ah SAC Lei 8 An Thi; Magway ramṭhen, Myaing peng, Thayetkua khua ah a um mi pyusawhtee sakhaan kahdohnak ah SAC ralkap le pyusawhtee 8 an thi tiah Myaing PDF sin in thawng theih a si.
Kahdohnak chung ah Thayetkua khua ah a um mi pyusawhtee sakhaan PDF phu pawl nih an lak khawh i SAC ralkap le pyusawhtee 20 leng nih an doh ko hna nain PDF phu lei nih an tei tuk hna caah an zaam dih tiah theih a si.
Kahdohnak chung ah ralkap 1 kuan nih a khen i a tluk lio ah PDF chungtel 1 nih hriam lak ding in a va zuanh hnawh lio ah kuan nih a rak khen caah hriam la kho lo in a nunnak a liam tiah theih a si. Zaanlei sml 6:20pm hrawng ah PDF phu pawl an kir kho ṭhan i PDF chungtel 1 zong a ban ah kuan nih a khen tiah theih a si.
Wetlet Ah A Um Mi SAC Ralkap Sakhaan Kahdohnak Ah SAC Ralkap 4 An Thi; Sagaing ramṭhen, Wetlet peng, Hanlin khuahlun chung ah hmunhma a khuar mi SAC ralkap sakhaan an kah hna i SAC ralkap 4 an thi tiah 96 Soldier – PDF nih an thanh.
June 12 zinglei sml 5:30am hrawng ah cuka hmun SAC ralkap sakhaan an kah hi a si i kahdohnak mins 20 tluk a rau. SAC ralkap 4 an thi i 2 an i hliam tiah theih a si. Kahdohnak chung ah MDF-Shwebo Company, Donepyan PDF le 96 Soldier – PDF phufonh hna bawm in kahdohnak an tuah i him tein an kir kho tiah theih a si. Crd; The Chinland Post