Thawngpang Chia Fonh!
==================
Karenni ramkulh, Baw-la-khe peng, Sawlon khua cu SAC ralhrang nih tuzing ah jet vanlawng in bomb a thlak caah kum 17 nu pakhat a nunnak a liam khuami hna sii peknak inn telh in mipi inn 8 a rawk, tiah theih a si. “May 17, zinglei suimilam 4:00 tluk ah SAC ralhrang nih jet vanlawng in bomb a thlak caah nu ngakchia pakhat a nunnak a liam i kum upa pa 4 nih hliamhma an tuar.
Sii peknak inn (Building) 2 telh in mipi inn 8 a rawk. Cu pinah phungki sianginn zong tlawmpal a rawk i mipi hliamhma faak lo a tuarmi zong an um” tiah Bawlakhe PDF in ṭuanvo ngeitu pakhat nih a chim. Bawlakhe pengkomh cung ah SAC ralhrang nih mipi hna umnak inn bomb a thlak hi a voi 3 naak a si cang i mipi hna nih cunglei kahdohnak kong ah ralrin a herhnak, tiah Bawlakhe PDF in ṭuanvo ngeitu pakhat nih Khit Thit ah a chim.
May 17 zinglei ah Yangon peng Pazuntaung khua tlanglawng dinhnak pawngah pa pakhat cu tlanglawng nih a pah caah a nunnak a liam tiah kan theih. A thi mi pa hi kum 18 mi a si i Pazundaung le Ma-hlua khua kar ah a pah hi a si. A ruak cu mibawmchan tu hna nih an lak i Yangon khua siizung ah an kal pi tiah kan theih.
Mocha thlichia ruangah hartongmi Myanmar mi sing 8 hrawng cu rianrang in bawmhnak an herh, tiah World Food Programme(WFP) nih nizan May 16 ah an langhter. Bangladesh ram ralzam camp ah a ummi minung sing 960,000 leng cu thlichia ruangah harnak nganpi an tong cuahmah, tiah WFP nih cun an langhter.
Rakhine ramkulh, Sittwe khuapi ah a ummi World Food Programme(WFP) zung le bawmhnak thilri an chiahnak zung hna zong thlichia nih a hrawh dih, tiah RFA nih a ṭial. Mocha thlichia nih a hrawh mi cazin latu hna nih May 16 tiang an khawmhsuat ning ah Rakhine ramkulh, Chin ramkulh, Ayeyarwaddy ramṭhen, Magway ramṭhen le Sagaing ramṭhen telh in Myanmar ram chung ah Mocha thlichia ruangah hin minung 400 leng an thi, tiah theih a si.