Ralhmai Ah Kum 2 Chung A Ummi SAC Ralbawi Pakhat Cu A Chungkhar Ngaih Tuk Lungrawk In Amah Le Amah Ai That
===============
Karen ramkulh Myawaddy peng chung ralhmai ah kum 2 chung a ummi SAC ralbawi pakhat cu a chungkhar a ngaih tuk hna i lungrawk in May 19 ah amah le amah meithal i ai kap i a thi Khit Thit Media nih a ṭial. Chungkhar ngaih tuk lungrawk in amah le amah ai that mi ralbawi (Corporal/တပ်ကြပ်) cu Rakhine miphun Lwin Chain (kum 53) a si. A nupi le fanu pahnih a kaltak hna.
Corporal Lwin Chain cu miṭha le midaidam ngai a si. A umnak ah a kuttang ralkap hna cu raldohnak ah an kal dih caah rian a ummi vialte amah nih a ṭuan dih. A re a thei ngaingai. Cunglei nih hrocer le rianfial a tong peng. A chungkhar sin a tlun lonak a sau cang. Hi thawng hi a lengah chuahter hrimhrim lo dingin cunglei nih nawl an pek hna tiah an kiangkap a ummi pakhat nih a chim. SAC ralkap hna cu an tlawm chin lengmang caah ralbawi si hna seh, ralkap sawhsawh si hna seh chungkhar si tlun le caankarlak i dinh zong an kham tiah theih a si.
Rambuai Hnuah SAC Nih NLD MP Hna Cu Sii Lei Zohkhenhnak An Phih Hna Caah Minung 16 Nunnak Liam; Ralkap nih uknak an laak hnuah NLD party MP hna cu SAC nih tlaih ding in a dawi hna i a himnak ah a ummi hna chung in minung 14 le an tlaih i thong an thlakmi hna chung in minung 2 hna cu sii lei tlamtling in an i thlop kho lo caah minung 16 an nunnak a liam tiah CRPH nih May 19 ah cathanh a chuah.
Thonginn chung ah a nunnak a liammi hna hi Okphu peng i Bagu ramthen MP U Maung Myint le Bilin peng i Mon Ramkulh Hluttaw palai U Kyaw Myo Min an si. Hi hna pahnih hi thonginn chung ah sii lei zohkhenhnak nawl an phih hna ruang ah nunnak a liammi an si.
A dang minung 14 hi cu Pyidaungsu Hluttaw Palai minung 5, ramthen le ramkulh Hluttaw Palai minung 9 an si i an zaamnak hmun ah an nunnak a liam tiah theih a si. Ralkap nih uknak a laak hnuah NLD MP 129 cu an tlaih hna i hi chung ah an thlah than mi zong an um. Atu hi thonginn chung ah MP 88 an taang rih. Cun, Pyidaungsu Hluttaw Palai a si mi U Yemon, U Lwin Ko Lat, Daw Zin Mar Aung le Daw Phyophyo Tin hna cu SAC ralkap nih rammi sinak on a hnawh hna tiah theih a si.
Moe Peng Chung um Khuate Hna cu SAC Ralkap Nih Hriamngan In An Kah i Khuami 10,000 Hrawng An Zaam; Karen ramkulh, Moe Peng chung khuate cheukhat cu SAC ralkap nih hriamngan in an kah i ngakchia pakhat nunnak a liam pinah khua 9 chung in khuami 10,000 leng an zaam, tiah theih a si.
May 18 zinglei suimilaam 8:00 hrawng ah SAC ralkap khah-ma-yiah (ခမရ) 599, 590, tatma 44 le kha-la-ya (ခလရ) 48 hna cu KNU-Moe peng chung Saway khua, Kunetaw khua chung luh duh ah hriamngan pehtlai in voi 25 an kah lawng si loin Ngyionpinthar khua zong ah zuun 5 an kah i kum 14 ngakchia pakhat nunnak a liam, tiah KNU nih cathanh a chuah.
Cun, kum 47 minung Daw Hlah San, Mg Myint Myat (kum 18) hna cu hriamngan in hliam an tuar i sii-inn lei ah an thlopbul cuahmah hna. May 16 zong ahkhan Kha-la-ya 60 nih hnawngkung khua ah hriamngan zuun 7 le May 17 ah Taungsuh khua ah zuun 5 zong an kah tiah theih a si. Cun hi bantuk in khuachung ah hriamngan a kah peng caah khuami 13,991 cu khua chuahtak in an zaam dih tiah theih a si. Credite; The Chin Post