Breaking News!
Mese Khuapi Palik Sakhan Pakhat Mipi Ralkap Nih An Lak, SAC Ralhrang Thimi An Tam Caah Cunglei In Bomb A Thlak
=========
Karenni ramkulh, Mese khuapi palik sakhan cu mipi vengtu ralkap hna nih luhhnawh in an kah caah palik bawi (Sakhan hmu) telh in SAC ralhrang lei a thimi an tam ngai, tiah tualchung mipi nih an chim.
June 13, zinglei suimilam 4:50 tluk ah mipi ralkap ṭangṭi phufonh nih luhhnawh in an kah caah an sakhan an laak khawh. Cu hnu ah mipi ralkap hnu lei an tolh ṭhan i, SAC ralhrang nih helicopter in an kah. Cu pinah hriamngan hna hmang in voi 30 renglo Mese khuapi chung an kah, tiah tualchung mipi nih Khit Thit ah an chim.
“Atu hi helicopter pawl in an hel cuahmah lio a si. An sakhan cu an lakpiak cang hna i, palik bawi zong a thi an ti. Hriamthil zeimawzat zong mipi ralkap nih an laak chih khawh. SAC ralhrang nih tlang cung in khuapi chung ah hriamngan voi tam ngai an kah caah mipi hna cu inn tang le khur chung ah kan i thup hna” tiah tualchung mipi pakhat nih a chim ve.
Tamwe SAC Ralhrang Meilaknak Zung Mipi Hriamtlai Nih Vawihnih Tiang Bomb In An Kah; Yangon Tamwe SAC ralhrang meilaknak zung Tamwegyi ah ummi cu mipi hriamtlai ṭangṭi phu fonh nih vawihnih tiang an kah tiah kan theih.
June 12, zaan ah bomb puah thawng a voikhatnak kan theih hmaisa suimilam cheu tluk a rauh hnu ah voihnihnak kan theih ṭhan a puahnak hmunhma hi Tamwe meilaknak hmun ah a si ti cu kan theih khawh asinain, zaan a si ca ah a hohmamh va kal in kan zoh ngam lo SAC ralhrang motor a chawhvah zong kan hmuh tiah tualchung mi pakhat nih a chim.
Kahdohnak ah a tel mi, mipi hriamtlai ṭangṭi phu fonh hna cu Freeland Attack Force (FLA), Anonymous Fighters Force (AFF) le Emerald Girls Army (EGA) hna hi an si. Zaan suimilam 12:12 tluk ah voikhatnak an kah, 12:37 tluk ah a voihnihnak an kah ṭhan tiah FLA hriamtlai phu nih an chim. Hi kahdohnak hmun in mipi hriamtlai tu phu fonh hna cu him te in an chuak kho ṭhan tiah theih asi.
Thayetchaung Khua Ah SAC Ralhrang Nih A Nu Ca Ah Si-Ai Lak Piak Ding In A Kal Mi Pa An Kah Thah; Tanintharyi ramṭhen Thayetchaung peng Yangyet khua pawng ah SAC ralhrang le mipi hriamtlai phu karlak ah kahdohnak a fak SAC ralhrang nih khuachung ah luh in inn an khangh hna tiah kan theih.
June 11, i Thayetchaung peng mipi hriamtlai phu le SAC ralhrang karlak kahdohnak fakpi in a chuah hnu ah ralhrang nih Yangyet khua ah khuasaknak inn pakhat, sianginn le lakphakti dawr cu mei in an khangh tiah theih asi.
Cu bantuk ṭhiam in June 11, ah Thayetchaung peng Yangyet khua ah Ko Wa Yan Hein cu ralzam a nu hrang ah a harh mi si-ai la in a rak kir lei ah khua chung ah a thup mi SAC ralhrang nih an kahthah tiah Ko Wa Yan Hein a hawipa nih a chim. SAC ralhrang nih Ko Wa Yan Hein ruak hi a umnak inn hnu lei ah an chiah i tualchung mipi hna nih a hnu ah an lak i an vui tiah theih asi. Crd;Lungmili Post