Lailenpi Khuapi Kahdohnak Ah SAC Ralhrang 4 An Thi; Mipi Pakhat A Nunnak Liam
=========
Chin ramkulh, Matupi peng, Lailenpi khuapi ah SAC ralhrang le Chinland Defense Force (CDF)- Mara karlak ah kahdohnak a chuak i SAC ralhrang 4 an thi, mipi pa 1 a nunnak liam, tiah CDF-Mara thawngthanhnak in theih a si.
July 8, zanlei suimilam 2:20 tluk ah Lailenpi khuapi chung ah suimilam cheu chung kaphnih kar kahdohnak a chuak.
Cu kahdohnak ah SAC ralhrang 4 cu hmakhatte ah an thi, SAC ralhrang nih an kahmi hriamngan ruang ah tualchungmi pa pakhat a nunnak liam i mipi inn 2 zong a kaang, tiah CDF-Mara nih an langhter. Lailenpi khuapi um mipi hna cu SAC ralhrang nih ṭhihphaihnak, hnahnawhnak, rit bu in kham le meithal puahhnawhnak pawl an tuahmi ruang ah CDF-Mara nih atu bantuk in an kahdohnak hna a si, tiah CDF-Mara nih an langhter chih.
Chinland Defense Force (CDF)-Mara hi Chin ramkulh chung ralhmai hna ah Chin ralkap CNA le a dang CDF chungtel hna he hmunkhat ah SAC ralhrang a dohtu Chin hriamtlai phu pakhat an si, tiah kan theih.
February 24, 2022; Russia nih Ukraine a kah ni 500 tlin hnu ah Ukraine tualchung mipi ngakchia 500 telh in minung 9,000 tluk an thi cang tiah United Nations nih thawngthanhnak an tuah.
UN kuttang Human Right Monitoring Mission in Ukraine (HRMMU) nih July 7, khan cathanh chuah in “tualchung mipi an tuar tuk” tiah chim in tualchung mipi nunnak liam mi hi 9,000 naak tlawmlo zong an si kho tiah a chim chap.
Tukum chung hin Ukraine tualchung mipi tuarnak hi a rak din deuh kan ti. A sinain, May thla le June thla chung hin an tuarnak a vun sang ṭhan tiah an chim.
June 27, khan Ukraine khuachak lei ram Kramatorsk cu Russia nih missile hmang in a rak kah ngakchia 4 telh in tualchung mi 13 nunnak liam. Kahdohnak hmun in lam hla ah a um mi Lviv khuathlang lei ram zong ah missile hmang in kahdohnak a chuak minung 10 an thi midang 37 nih hliam an tuar tiah kan theih.
Meta nih Twitter El ca ah platform Threads thar a ser mi cu July 8, khan mipi hmuh ah a pholanh. A pholanh in suimilam 7 chung a rauh hnu ah minung 10 million nih an sign-up colh tiah theih a si. Platform Threads thar ser mi hi standalone application sihmanhsehlaw, Instagram account in log-in tuah a hau mi si. Instagram username cu hman a harh ve na in Threads ah hin profile hi customise tuah khawh a si.
IG i block zong automatic in a block khawh ve, Instagram ah chiah mi private cu Threads ah a public khawh fawn.
IG le Threads ah hin post le shear zong tuah khawh ṭhiam si ve in, hmanthlak le video link zong minute 5 tluk cu chiahkhawh asi. Threads ah hin ram 100 tluk hman khawh a ngah i hi lak ah India, United States, United Kingdom, Canada le Japan an i tel. European Union ram tu cu a tlaichih kho lo tiah theih asi.