Matupi Ah Kum 8 Nu Ngakchia Bomb Lamhsualnak In Hliamfak A Tuar
=========
Matupi khua Lay-myo tiva pawngah kum 8 ngakchia nu pakhat cu motor ti rawn ding in Tiva ah a tum lio ah Bomb tarh mi nih a puahhnawh i hliamfak a tuar tiah kan theih. May 25 chun suimilam 12 tluk ah Matupi khua Lawngvan sang um Pu Zaw Min le Pi Pan Pan hna i an fanu Tuem Amang (kum 8 ) cu a pa he Kawlrawn in Matupi lei an tlun pah Laymyo tiva ah dir in motor rawn ding ti an than lio ah Bomb nih a puah hnawh hi a si.
A mah cu a hliamhma a fah caah Matupi siizung ah an thlop lio a si. Bomb puahhnawhnak ruangah a orh lei ke a tlau pin ah a kut khatlei le a hmai zong hliam a tuar tiah Matupi Times nih a langhter.
Kalay Myo Khuachung Chawlehthal Tuah Mi Ngunkhuai Pe Lo Poah Dantat Ding In Mipi Ukhrauinak Nih Ralrin Pek; Sagaing ramthen Kalay myo khua chung chawlehthal tuah mi chungin ngunkhuai a pe lo mi hna cu dan kan in tat cang hna lai tiah Kalaymyo peng mipi ukhrauinak phu nih ralrin peknak thawng an thanh.
Chawlehthal tuah in nguikhuai a pe duh lo mi hna cu mipi ralkap humhaknak hmun chung ah nan thilri zuarzamhnak nawl phih nan si lai, May 26 thok in ni 10 chung fimchimhnak caan kan in pek hna tiah an langhter.
“Khuachung um mi ngunkhuai pe lo paoh ralrin pek an si bantuk in ngunkhuai pek mi kongkau zong a tunmer zia thiamnak ding caah a si. A tu lio ah ngunkhuai a pe mi an um bantuk in a pe lo zong an um hna caah a pe lo mi pawl ralrin kan pek hna hi a si.” tiah tuanvo ngeitu pakhat nih a chim.
“Ngunkhuai an peknak thawng in mipi he rian kan tuan tinak caah bawmchan tu a si pin ah NUG cozah a kal khawhnak ding ca zong ah chawlehthal tuah mi nih an pek mi ngaunkhuai in rian tampi aa tuan kho.” tiah a chimchap.SAC cozah chuah mi thilri poah kham le doh an si bantuk in cu pawl hna cu ngunkhuai pek dingmi thilri chung ah aa tel lo tiah an langhter chih.
Bible Sianginn Kai Aa Timmi Chin Mino 3 SAC Ralhrang Nih An Tlaih Hna I An Hrem Hna; Chin ramkulh, Mindat peng mino pa 3 hna cu Bible sianginn kai dingin an kal lio ah SAC ralhrang nih an tlaih hna i an hrem hna hnu ah minung pakhat lawng an thlah ṭhan, tiah theih a si.
A luancia May 23 ah khan Bible sianginn kai dingin motor he an kal lio ah Magway ramṭhen, Chauk (ချောက်) khuapi um SAC Checkgate ah pa mino 3 hna cu SAC ralhrang nih hramhram in an tlaih hna i an hrem hna, tiah mit hmutu hna nih an chim.
“Mino 3 chung ah 1 cu an thlah ṭhan, an tukvelh hnu ah an thlah ṭhan hi a si. A dang 2 hna cu kan thlah hna lai lo an ti i, an kalpi hna caah nihin tiang an thawngpang kan thei kho ti hna lo” tiah mit hmutu nih May 25 ah a chim.
Sualpuh in tlaihkhih a tongmi mino 3 hna cu Mindat peng tualchungmi hna an si i, SAC ralhrang nih an kalpimi mino 2 hna hi nihin tiang an thawng theihkhawh a si ti lo caah an chungkhar hna nih theih an duhnak kong cu The Mindat Post ah an chim. Credite; Lungmili Post