Martyrs’ Day Philhlonak Ah Mandalay Yadanabon University Hmai Um SAC Ralhrang Cu Bom Puahhnawh An Tong Mandalay Yadanabon hmai ah hmunhma a la mi SAC phu cu July 19 zaanlei sml 3:00 pm ah bom kan puah hnawh hna tiah Ditful Citizen Team nih an chim. Kan nih bu cu Mandalay hrambunh phu kan si lo. Khualtlawng pah in kan tuah mi a si.
July 19 ni ah Dai tein um lo ding hi kan langhter duh mi a si. Nihiin zingka tein bom puah ding kan i zuam. Bomb mine cheukhat a puah lo caah zaanlei kan tuah than i suimilam 3:00pm ah bom a puak. Khuachung inn le lo a rawk mi a um lo. Martyrs’ Day philhlonak ah kan tuah hram mi a si” tiah MFP nih a chim. Nihin July 19 ni hi A voi 76 nak Myanmar ram Martyrs’ Day a si. Credit: The Chinland Post
Relchap: Chin, Sagaing le Karenni Hmunhma Hna Ah Kahdohnak Ṭhawnter Ding In Min Aung Hliang Nih Nawl A Pek Hna Chin ramkulh, Sagaing ramṭhen le Karenni ram hna uk khawh le tlaih khawh nak caah SAC hruaitu Min Aung Hliang nih ralbawi ngan pawl nawl a pek hna tiah Myanmar Now nih a langhter. Hramhram in uknak lak a si hnu 2021 thawk in Karenni, Sagaing le Chin ramkulh hna cu SAC phu fakpi in an dohnak hmunhma pawl an si.
Dothlennak thazang a ṭhawnnak cu peng le ramṭhen 3 hna cu “Hramhram thiltuah a tambiknak hmunhma pawl” tiah SAC nih an thanh. A luancia July thlachung, Karenni hmunhma ah SAC kuttang BGF Battalion 2 nih mipi hriamtlai phu lei ṭang in SAC ralkap an doh ṭhan hna lawng siloin Myanmar-Thai ramri, Mese peng ralkap sakhaan vialte an sung dih tiah Myanmar Now nih a ṭial.
Atulio Chin ramkulh chaklei ah a lut mi SAC ralkap le CNA, CDF hna karlak, Hakha-Thantlang karlak ah kahdohnak a fah lio a si. A luancia zarh ah Tedim peng, Taingen khua ah a um mi SAC sakhaan cu CDF phufonh nih an kah i hriam cheukhat zong an lak khawh bantuk in SAC nih vanlei kahdohnak biapi in a tuah tiah CDF CDM Siyin nih thawng a rak thanh.
SAC ralkap le Mipi hriamtlai phu hna karlak kahdohnak pawl ah vanlei kahdohnak biatak in a hman lengmang. Mipi umnak khua, sianginn le biaknak lei inn zong hrial lo in kahdohnak a tuah tiah theih a si. Credit: The Chinland Post
Relchap: KIO/KIA Laiza Headquarter A Rak Fuh Mi SC Battalion 11 Fonh Ralkap A Thi Mi An Tam Kachin Independence Organization (KIO)/ Kachin Independence Army (KIA) Headquarter umnak Laiza khua pawnghrawng ah June thla zarhkhatnak in SAC Kekal Ralkap Battalion phu 11 nih an rak fuh hna. KIA le AA ralkap le ṭangrual phufonh in an kah hna caah ralhrang lei a thi mi an tam ngai cang tiah theih a si.
“June 3 in July 14 tiang ah SAC Kekal ralkap hna nih Laiza Headquarters lei an hun fuh. Vanlawng le Hriamngam he bom an thlak. SAC lei Battalion commander pakhat a thi i an ralkap mi tampi an thi” tiah Ayeyawaddy Times nih a langhter.
June 16 ni ah Nan San Yang khua pawng ah kahdohnak a um hnu ah July 3 ni in SAC kekal ralkap bu battalion phu 8 he tiah minung tampi an hun kai chap. SAC lei Kekal ralkap bu Battalion 13, 7, 103, 236, 83, 77, 318, 385 phu 8 fonh an rak kai lio ah KIA, le ṭangrual ralkap phu hna nih an rak kahnak lio ah SAC lei Kekal ralkap Battalion phu 13/236/103 in a thi mi an an tam.
July 14 ah Kekal ralkap battalion 56, 78 le ခမရ (ခြေမြန်တပ်ရင်း) ခမရ 387 phu 3 an hun i chap ṭhan. Mah battalion hna hi Light Infantry Division (ခြေမြန်တပ်မ) LIB 11 hruainak tang a um mi an si. Nihin Laiza headquarter nor ding in SAC ralkap an dihlak Battalion phu 11 an si cang.
July 13 zing 5:40am ah Kachin ram, Bhamo peng, Dot Phung Yang khua in Nan San Yang khua lei a rak kai mi SAC Kekal ralkap battalion 56, 77, phu cu KIA ralkap LIB 5 tang um Battalion no. 24 nih an rak kah hna lio ah Ralhrang lei a thi 40, hliamtuar mi 50 leng an si i KIA nih ei-din le hriamnam tampi an lak piak hna.
July 3 ni ah Kachin ram, Wai Maw peng le Nan San Yang khuate lei ah BhaMo khua in thazang a rak chap mi SAC ralkap pawl KIA nih lam in an bawh hna i an kah hna tiah thawng theih a si. SAC ralkap pawl Nan San khuate lei ah hriamngan an kah i vawlei lei in kahdohnak an tuah, Nan San Yang khua hi Laiza he ramri aa peh mi an si caah Laiza lei an tlerhkhawn hna a si. Nansanyan khua hi ahlan ah SAC ralkap pawl nih hmunhma an khuarnak a si caah atu hi uk le tlaih khawh ṭhan an i zuam.
A tu KIA le AA fonh in SAC ralkap pawl an kah hna thawng hi Kachin ralkap sin in theih a si. Kachin ram Wai Maw peng le Nan San Yang khuate pawng kahdohnak ah SAC ralkap a thi mi an tam i SAC ralkap Machine Gun zuun 1, 60MM 1, MG zuun 1, MG dohnak 1 le meithal zuun 3 hna KIA nih an lak khawh i SAC ralkap ruak 2 zong an hmuh tiah an rak langhter. Credit: The Chinland Post
Relchap: Magwe Ralkap Sii Inn Ah Ralhrang Hriamtuar Tam Ngai Helicopter In A Vun Chiah : A Thi Mi Zong An Um Magwe peng, Nat Mouk lam um No. 16 Ralkap ihkhun 100 siizung (16/100) ah hliam a tuar mi ralhrang pawl cu ralkap Helicopter nih a vun chiah hna. Hliamtuar an tam; cu chung in a zualhma le a thi mi zong an um tiah Me Latt Authawng (မြေလတ်အသံ) nih a langhter.
July 16 zanlei 3:00 hrawng ah ralkap hriamtuar mi tam pi cu Magwe vanlawng chiahnak battalion in Ambulance motor 4 nih ihkhun 100 siizung lei ah an hun chiah hna hi July zarhhnihnak chung ah ni 3 nak tam a si lai an ti. Hliamtuar ralkap rual hi Yaw area, Pakokku, Pauk peng lei kahdohnak ah hma a pu an si. Hliamtuar mi chung in a thi mi zong an um caah ralkap siizung hmun chungbah ruakvuinak program an tuah.
July 17 zing 1:00am ah Magwe vanlawng chiahnak battalion cu Mipi ralkap nih bom in voi 5 an kah hna caah vanlawng gasoline chiahnak inn le ralkap inn cheukhat ah bom a tla i ralhrang lei a thi mi an um tiah PDF nih an chim. Credit: The Chinland Post
Relchap: Myanmar Rampi Huap In July 18 kahdohnak Ah Ralhrang 164 An Thi, 9 Tlaih An Tong Myanmar rampi huap in July 18 kahdohnak ah SAC ralhrang 164 an thi. Mi 9 tlaih an tong tiah Mipi ralkap lei in thawngthanhnak an tuah cio mi zoh in theih a si.
Magway ramṭhen, Gangaw pengkomh, Saw peng, Laungshay hmunhma in Cinduai khua lei ah a kai mi SAC ralkap mawṭaw pawl cu bomrap an puah hnawh hna, Rocket in an kah hna caah SAC ralkap 80 nak tlawm lo an thi tiah NUG Ministry of Defense nih thawng a thanh.
Karen ram, Kyainseikgyi peng, Kwilondai sakhaan in a rak kir mi SAC ralkap pawl cu ni 4 chung an kah hna i ralbawi telh in SAC ralkap 50 hrawng an thi tiah KNLA sin in thawng theih a si. Magway ramṭhen, Pakokku pengkomh, Seikphyu peng chung ah a um mi SAC ralkap sakhaan le SAC ralkap pawl kahdohnak ah ralkap 7 an thi i tampi an i hliam tiah NUG Ministry of Defense nih a thanh.
July 18 zinglei sml 4:00am hrawng thawk in SAC ralkap 150 hrawng nih hriamngan voi tampi bawm in kahdohnak an tuah hmasa i an nam hna caah ralhrang 11 an thi. Ralkap pakhat meithal he mi pi sin ah aa fonh.
Karen ram, Myawaddy peng, Latkhat tlang pawng ah SAC ralkap nih hriamngan tampi thlah in kahdohnak an thawk caah mipi hriamtlai phu pawl he kahdohnak a fak i SAC lei in Captain 1 a thi, meithal zuun 1 le kuanzen pawl an lak khawh tiah Cobra Column nih thawng a thanh.
Chin ramkulh, Kanpetlet peng le Magway ramṭhen, Saw peng karlak ah CDF phufonh le SAC ralkap karlak ah kahdohnak a chuak i SAC ralkap 5 nak tlawm lo an thi, hliam a tuar mi zong an tam tiah CDF-Kanpetlet, Khonu Battalion sin in thawng theih a si.
Karen ram, Kyainseikgyi peng ah a um mi SAC ralkap Khuhkhua sakhaan, Palek sakhaa, GAD zung, Me-sa-yin zung le bawmh ding in a ra mi SAC ralkap pawl an kah hna i 5 an thi tiah Special Operation Force (S.O.F) nih thawng an thanh.
Sagaing ramhṭhen Taze peng ah SAC ralkap le PDF phufonh hna karlak ah kahdohnak voi 2 a chuak i SAC ralkap 30 nak tlawm lo an thi, 9 an i hliam tiah Taze peng dothlennak phu nih thawng an thanh. Sagaing ramṭhen, Chaung -U peng ah SAC ralkap le PDF phufonh hna kahdohnak ah SAC ralkap 4 an thi. Sagaing ramṭhen Monwya peng ah SAC ralkap le PDF phufonh hna karlak kahdohnak ah SAC ralkap 2 an thi.
Sagaing ramṭhen, Ye-U peng ah SAC ralkap le PDF phufonh hna karlak kahdohnak ah SAC ralkap 1 an tlaih. Mon ram, Kyaikto peng Kahdohnak ah SAC ralkap 3 an thi. Shan ram, Tachileik peng kahdohnak ah SAC ralkap 1 a thi. Pago ramthen, Yedashe peng kahdohnak ah SAC ralkap 1 a thi. Credit: The CHinand Post
Relchap: CNDF Hriamtlai Salai Thang Za Sel A Nunnak A Liam CNO/CNDF hriamtlai a si mi Salai Thang Za Sel cu July 19 zinglei ah a nunnak a liam tiah theih a si. Salai Thang Za Sel hi SAC kuttang ah rianṭuan a duh lo caah CDM a tuah hnu in CNDF sin ah hriam a tlai mi a si tiah theih a si. Credit: The CHinand Post
Relchap: Nihin July 19 zing suimilam 8:43 ah SAC ralkap Helicopter pakhat cu Hakha a phan i, suimilam 8:52 ah a kir ṭhan, tiah theih a si. Hriamnam le zen-kuan maw a chanh hna ti cu hngalh a si lo. Nizan July 18 zanlei suimilam 4:30 hrawngah SAC ralkap hliamhma pumi hna cu motor in Hakha sii-inn pi ah an ratpi hna i, motor chung in an ṭhumh hna lioah palik nih humhimnak an lakpiak hna, tiah tualchung mi hna sinin theih a si. Credit: TCP
Relchap: July 19,Nhin Ah Timit/Tita leiah Langta pahnih nih kan ralkap pawl bom a thlak/kah hna e tiah an ti. Kan ralkap pawl caah faakpi in thlacam ko rih hna usilaw.July 19,Ni zan July 18 zanlei ah khan ralhrang hliam 9 hna cu Hakha siizungpi ah an hun chiah hna tiah kan theih.
Tulio Hakha ah ralrin herh ko rua tiah kan ruahmi ahcun zan sml 8/9 PM hnu cun vahvaih sawh lo a ttha, rianherh le thilpi pa taktak ngeih bel cun phun dang. Hakha ralhrang hna hi zan hnu pi ah a thli in Hakha khuachung sang zeimaw ah an lut ziar i, mi an bawh lengmang. Zahan July 18 zongah Catholic( RCM) biakinn pawngkam lamtte kip in mi an bawh tiah kan theih chap. Credit: Salai William
Reelchap: Ramchung A Daih Tiang Chin Miphun Ralzaam Hna Mizoram Ah I Dor Ding In ICA Nih Forhfialnak An Tuah Chin ramkulh chung ah SAC nih vanlei kahdohnak telh in mipi hna a phunphun in a tlaih hna, a thah hna i ramchung ahcun nifatin hi nunnak caah thinphang a si caah Mizoram ah aa dor mi Chin miphun hna nih ramchung buainak a daih tiang Mizoram ah i dor ding in Istitute of Chin Affairs – ICA Deputy Director Van Sui Sang nih forhfialnak a chim.
SAC nih vanlei kahdohnak biatak in a hman caah Chin ramkulh chung ah kum tling lo hngakchia telh in mipi 100 leng an nunnak a liam cang i hliam a tuar mi 200 deng an um cang tiah ICA cathanh ah hmuh khawh a si.”Zei bantuk harnak ton hmanh ah, a si khawh chung in, daihnak kan hmuh tiang Mizoram lei ah i hnek ṭulmal rih ko uh tiah chim ka duh.
Zeiruang kan ti a si ahcun, atulio ramchung nan kir ṭhan a si ahcun harnak phun tampi nan tong lai, harnak ton ciocio ah Mizoram ahcun kan nunnak a him deuh. Ramchung ahcun ṭhutdirnak a tlamtlin lo bantuk in sml 24 chung nunnak caah thinphang a si. Zeitik ah dah vanlawng in an kan kah lai?
Zeitik ah dah an kan tlaih lai ti thinphan lengmang nak in kan nunnak a him deuh nak Mizoram ah um ding in forhfial kan duh hna” tiah ICA Deputy Director Salai Van Sui Sang nih Ayeyarwaddy Times ah a chim. Chin ramkulh ah CNA, CDF le SAC ralkap pawl karlak ah kahdohnak a fak chin thluahmah i SAC nih vanlei kahdohnak a hman chin thluahmah ve.
Cun Chin ramkulh ah raifanh zawtnak a karh ṭhan i Chin mipi hna tampi nih ngandamnak lei si-ai tlamtling in an hmuh kho lo, sii le eidin a dih thluahmah, SAC ralkap pawl nih hriamngan, meithal in kah ruang ah a thi mi an karh chin, thilfirnak a tam chin, rian a har chin le covo buarpiak a si mi dirhmun hna i Chin ramkulh chung mipi hna nih nifatin in an ton.
“Mizoram lei ralzaam pawl tampi harnak an ton caah mah umnak khualei kir ṭhan an duh. A hleikhun in kum upa hna hi an si. A hlan bantuk in eidin bawmhnak zong an hmu ti lo. Rian zong a har tuk. Cucaah mah umnak khua te ah a him lo nain kir cio an duh” tiah Chin miphun ralzaam chungtel pakhat nih Ayeyarwaddy Times ah a chim.
SAC nih hramhram in uknak a lak lio ah Chin ramkulh hi vanlei kahdohnak a tuah lo nain khuami hna a ruang um lo in tlaihkhih, khua luhchuaknak phih, zalong tein umkalnak nawl phih, khuate chung ah luh in mipi inn pawl khangh, hriamngan le meithal kahthlorhnak hna an tuah caah 2021 thawk in Chin miphun 60,000 leng ramchung/ramleng ah an zaam hna tiah theih a si.
